Hebreea 1
1
Hala soo a sondo po ndɔɔ
1Sindɛ Hala va sɔɛi a sondo vanaa-tɛɛngaa-diom Hala-a o fuɲaa naa mamaa lo le telennda bɔɔ-bɔɔ a o nɛila yɛ́-yɛ́ coo. 2Kɛ sunsun, o palɛi mɛɛlɛi he nin, mó soaa o naa lo a sondo po ndɔɔ. A po ndɔ kon o cɔw ceendo ni, ndu Hala koni hɛli vɛlɛ ni mí ɲɔɔn kpow n va le ndu. 3Po kon co ɲɛ-tengaa biilu Hala-o ni, ndu co vundule Hala len ni. Kpaaya fula o sɔɛi ndɔɛi nin-ndo co ceendo mandaa ni. Ndóò ciiyo vanndacieea dindio le hakila ndalan, mó hel o halataala, o co Hala vana kpaayaa kpow icali o ba kɛndɔɔ coo.
Po Hala-o hiow mɛlɛkaa
4Po Hala-o co fisa a mɛlɛkaa, lelan Hala ke ndu diola hiow diola mɛlɛkaa lan ni. 5Lepilɛ bɛɛ o dimul mɛlɛkanɔ kɛ́-kɛ̀ le aa:
«Nɔm co po nuu ni,
kandɔɔ hau, i siŋnun Fuɲa nɔm.»
Nduyɛ, lepilɛ bɛɛ vɛlɛ o dimul lɔ mɛlɛkanɔɔ pum te aa:
«Ya co va fuɲaa le nɔm ni,
mì nɔm va po nuu.»
6O kon kɔɔli, telen o cuu po ndɔ tasoo o ceendo coo-o, mó dimi aa: «Mɛlɛkaa Hala-a kpow a bɛnda mà biilu ndu.»
7Ɲɛ Hala dimi le mɛlɛkaa-o co hoo ni aa:
«Mɛɛ ya tosa a hoeiye yɛ koni ya tosa a mɛlɛkaa ni,
kpeku piɔɔ-volia soli ya-o koni nda solul-la ni.»
8Kɛ le po ndɔɔ mó dimi aa:
«Àá Hala! Masale nɔmnden le co le lɔ́ɔ́-lɔ́ɔ̀.
O sandei nin n co vanaa nɔmnda masalen tosaa coo ni.
9Dɛnɛ sandaa n yeema ni,
mì dɛnɛ vɔɔndo nɛinun nɔm.
Àá Hala! Lelan Hala nɔmndo hɛli nɔm ni,
mó tala nɔm cuɛima kafoan o lebol.
Mó hɛli nɔm caaŋaa nɔmnda tɛɛn.»
10Mó dimi vɛlɛ aa:
«Mɛlɛka, nɔm cɔw sindɛ lɛŋnden ni,
nɔm koni toosiaa halataalaa a bala nɔmndan ni.
11Ɲɛm n toosiaa mun-ndon tambunin,
kɛ nɔm a co va le fɛɛn a fɛɛn.
Lɛŋnden a halataalaa siŋnunnin maa volɔɔla cuɛinan.
12A tui-tuinin ndan maa doma bɛndu,
mì la mangalan maa volɔɔ cuɛinan,
kɛ nɔm ɲɛ pilɔɔ kpé n co ni,
yoomu nɔmndo nɔ lamɛɛlu le.»
13Lepilɛ bɛɛ Hala dimul-lɔ mɛlɛkanɔ pilɛ le aa:
«Cal-la o ba kɛndɔɔ coo,
mì tosa mà nɛw yaamɔaa nɔmnda a n'pelu.»
14Mɛlɛkaa nda co macoaa maa kiilaa Hala-a, nda Hala viam le kɔlan vanaa sɔlanin cindaa-a sɔɔn dimullo ni.
Currently Selected:
Hebreea 1: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
