Habakuk 2
2
1Ya, i vanin o fonda ni cumulaa,
mì sim cumullo o kpakio coo
le sinaa ɲɛ Hala dimulnin ya-o,
a le sinaa mɛɛ o mululnin ya a cɛɛŋɔnnda nilan o kɔɔ yɛ.
Muli Hala yɔngu-o: vana yongaa tiwnin ba le
2Mì Mɛlɛka mulul-la aa:
«Sɛva o ya co nɔm cɔmndo-o,
sɛva ndu o pɛngɔn coo
le mɛɛ vana tiwba ndu dimio vakpa yɛ.
3Kani telen vundulen nden
le peelunnin-ndo co nin o tuaa,
o co nin kpɛɛlun le tiiyaa,
o venin sɔɛi yom lɔ́ɔ́ le.
Hali, ɲɔɔ viow bɛɛ mɛ̀ɛ́-mɛ̀ɛ́,
nɔm calnun ka sii, ma cum.
Kani fɔ mì sɔɛi ken hun peelun kangalan.
4Vana nɔ tuula vɔɔnndan-ndo
pɛ a yongaa ca,
yiyannda ndɔlan la sendu le,
kɛ vana sandaa vanin yoomu le laalan ndɔɔ.
5A toɲa, mɔiyan ma pala vana:
vanaa yongaa nɔ pɛngi le,
yeemɛi ndɛi cuu lɔ́ɔ́-lɔ́ɔ̀ le.
Te ciee-piɔ́m sanga pɛ a vanvílɛ́iya,
mɛɛ nda bɛɛ a sanganin a vannda delɔɔ coo
le nda siinguuo cɛa ndaa.
6Vanaa nda bii kan-nda kpede simulnin nda,
mà dɔw nda danga,
mà dimul nda aa:
«Dangaa co le niaa!
La co caanda kafalan tosallo,
mì la va ɲɛ-sɔlaa ndaa cuungiaa,
mì la va vɛlɛ hiovɔɔ laci a vannda delɔɔ coo.
Telen kuɛɛ niaa mal-lɛnin dɛnndan-ndan?
7Vanaa niaa del coo-a hinulnin niaa
maa mɛɛ vana kueo kɔa suukoo nuaa yɛ,
mì nda bɛɛ poondiaa ɲɛm niaan.
8Le tùú niaa poondiaa lɛŋii bɔɔ-bɔɔ ɲɔɔn o laba-o,
niaa bɛɛ, lɛŋii tɔ̀ɛi poondiaanin ɲɛm niaan
le vanaa niaa diw-va,
le kafala niaa tosa o lɛŋnden nin-ndan
a le delɔɔ niaa del kobio a vanaa co lenin-nda coo-o.
9Dangaa co le niaa!
La co ɲɛm pilan cɔwviaa a kafalan
le kɔlan cɛila niaalan tangullo nɛɛ kɛndɛ-kɛndɛa
yɔŋii dɛnɛ palaa komal niaa.
10Tuula niaalan kpede la co niaa pila mingulɔn,
mì siɛmbulan la bii vanaa niaa.
La va yiyanndo maa la diw pɛ vannda taw,
la sɔla baŋaa, kɛ nduyɛ, ken co niaa dɛnɛ palaa yɔngoo ni.
11Hali cìì cɛiye bɛɛ yondanin,
mì toulen le saala sɔɛi ken
le dɛnnda niaalan cɔɔmuuo.
12Dangaa co le niaa!
La co delɔɔ coo le kobilan kilaa,
mì la va vannda diwvo le lan tangullo.
13Lelan Mɛlɛka-Nɔ-Kpaayaa-Kpow-vo
co tosaa ni mì ɲɛ-sɔlaa vannda co ŋɔu o yin,
mì vanaa bɔɔ-bɔɔ va sanga fondoo fúú.
14Kani vannda sinanin biilu Mɛlɛka-o
mò hiow ba,
15Dangaa co le niaa!
Le niaa vanaa co puapilɛa niaa
mɔiyan keo le kolɔɔ-a,
a le niaa vanaa co man talaa le caanda koesio
háá mì ma bii nda,
haliko mi la va a nda-a.
16La cii bɛɛle va le niaa len tɛɛmbuu,
siɛmbulan la vanin le niaa.
Mɛɛ niaa bɛɛ, la kol mì la fula tumnda fondo!
Mɛlɛka co niaa lɔɔ a kɔl ndɔ tuwvo,
mì bɛɛle niaalen le siŋnun siɛmbulan.
17Dɛnnda vɔɔnnda niaa tosa Liban-ndan
la mingulunnin niaa pila:
la diw visia mí la tɛɛmbuu lɛŋnden,
kobilan a vanaa va lenin-nda kpow.
18La co cilinndon teengiaa,
mì la va tuuliaalan toosiaa a mun
le vannda còòlan dimullo.
Piɔmndo suu le, o kpeŋan a ba ndɔ le,
le yɛɛ mì la tiindan ndu?
Ɔ́ɔ̀ kpeku piɔmndo solul vana-o?
19Dangaa co le niaa!
Niaa co yɔm nda sɛl-lo dimullo aa: «Cɔn»-nda,
mì la va vɛlɛ pow nɔla isɔɔ loo dimullo aa: «Cɔn».
O kɛ́-kɛ̀ kindi vana kɔl te,
vana yikpa bɛɛ nda a sianion te kon te a volion,
sanga fondoo fúú.
20Mɛlɛka caando co lende le,
o co o cɛi ndɔ diandaa nin,
lɛŋnden kpow le bɛnda mì le mei ndu o hɔl.
Currently Selected:
Habakuk 2: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
