Habakuk 1
1
1Yoongu Hala cɔɔmul Habakuk, vana-tɛɛngaa-diom Hala-o-o.
Habakuk ɲuna Mɛlɛka le malaa sɔlaa
2Éé Mɛlɛka! Háá lɔ́ɔ́ kuɛɛ ya lo yɛnin nɔm veeloo
le malaa sɔlaa nɔm o ba?
Nɔm yɛ a co lani yaŋɔɔ le.
Háá lɔ́ɔ́ kuɛɛ ya lo yɛnin yondaa a
dɛnɛ vɔɔn co tosanndo-o o kɔɔ?
Nɔm yɛ a co naa baŋa le.
3Le yɛɛ n co yɛ ya dɛnɛ vɔɔndo cɔmndo?
Vɛ́ ma va delɔɔcoo ho tofaa?
Delɔɔcoo a dɛnɛ vɔɔndo kínɛí
ya co cɔu vanaa balu ya-a tɛɛn ni.
Sɛɛngianndan a sɔngɔlan la co bɔɔ tosanndo!
4Lelan, vannda co lɛ tɔŋndo biyɔɔ le,
sandei cuu few.
Vana kɔlvesɛiyo co vana sandu-o kafalan tosallo,
mì yaman lacòòvan va kiolɔnndo.
Hala yɔngu mulio: Babilɔnnda del vannda coo a cɔwvo
5Mɛlɛka dimi aa:
«La tofa vɔ o vanaa-mangalaa-isɔɔa tɛɛn.
Kɔndɔfillo co niaa biyɔɔ taw,
kani dɛnɛ pum co hunɔɔ tosan o telen niaa,
hali vana ce dɛnɛ kon-ndo hun dimul niaa bɛɛ,
la laalannin te.
6I co vannda vomɔɔ fulaa Babilɔn,
kani nda nɔ iɲíí le, a nɛi vɛlɛ kɔl fula le.
A kei kan vannda delɔɔ coo,
mà poondiaa ɲɛm ndan-nda pɛɛn.
7A vueinun taw, vana ce nda pɛ, siòònde bii nɔm,
yongaa pila nda nɔ ni,
ɲɛ hɛnan nda-o, ndu nda tosà ni.
8Soa ndaa hiow tambilla keleŋaa,
a hiow tunaa yondoa yiaan ma co nɛiyo-a tɔɔliaa.
Vanaa co soa ndaa ɲaanɔnndo-a
co hunɔɔ vuulɛ-vuulɛ,
a co fulaa nɛɛ levil-vil.
A co hunɔɔ isùlùlùei
maa mɛɛ kovɔ́ɔ̀ toal ɲɛ o co mɛngɛlaa-o coo nuaa yɛ.
9Le dɛnɛ vɔɔndo tosaa kínɛí nda kpow co hunɔɔ ni,
nɛɛ nda co kɔlan-nda kínɛí nda co tofaa ni.
A co vanaa nda co biyɔɔ-a mɔɔsiaa nɛɛ pilɛ maa n'sióón.
10Nda mam masaa ni,
a luei simlacia yii le.
Kpakio co ɲɛ-ɲɛ nda o hɔl te,
a heelu pɛ puuloo bémbé bɛndoo,
a cica lekɔɔli le kobila lan biyɔɔ.
11A cii lon pɛ, a hiow vɛlɛ laci maa hoeyii fùkù-fùkù,
le kɔlan nɛɛ celen.
Nda nda, kpaaya ndaa co hala ndaa ni,
ndu nda tiindan ni.»
Habakuk ɲuna vɛlɛ Hala le malaa sɔlaa
12Kɛ nɔm yɛ, vɛ̀ɛ̀ o co nɔm te co Mɛlɛka nuu
le fɛɛn a fɛɛn te?
Hala nuu, O-Diandaa nuu pɛɛn.
N vinin o laan te few!
Nɔm Mɛlɛka, nɔm hɛli Babilɔnnda ha
le naa yamɛi kiolɔɔ ni.
Nɔm Hala co tiindan nuu ni,
nɔm vem nda le naa dɛnɛ palaa tuisio coo nuaa ni.
13A sandu bɔɔ le dɛnɛ vɔɔndo baa handɔɔ coo,
a ci ndu ma mɛi ndu lon te few.
Kɛ vɛ́ niko mà co yɔŋ vɔɔn vanaa vɔɔnda ha cɔu,
mà va vanaa sandu-a delɔɔ coo,
a co muli le?
14Le yɛɛ n mal-lɛ vannda
maa suvaa co o mɛmma ihɛllan nin-nda,
te kon te maa visia pɔmbɔa
nɔ vana le nda cɛw le-a?
15Babilɔnnda co Israɛlla biwvo
maa mɛɛ vana bii suwva o dolinnde nuaa yɛ.
A co nda biyɔɔ a yalala ndalan,
mà va nda cuungiaa o kayala ndalan nin
a ɲaale bɛndoo.
16Le hee, nda co yalala ndalan sálàlan solullo,
mà va ansan lomɔɔ le kayala ndala lan ni,
kani lan la co nda baloo yɔngoo,
mà va ɲɛdiaa sɔvɛɔ dioo ni.
17Vɛ̀ɛ̀ a hiaw lɛnin pá laci
a vanaa celen diwvo a hɔlta vesɛilan?
Currently Selected:
Habakuk 1: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
