Fulaa 22

1«Taa bii pɛ vuiyo o cɛi pilaa bulio#22.1 Nanu, mí vannda pum hivi aa: «… o cɛi pilaa bulio icɔl». Bɔɔle le dimin o dimin o nɛi diinndɔɔ (22.2) aa «ipala»-o nda handu nanu ni aa «icɔl». le luɛyɔɔ vuilen, mà lɔɔ ndu mò vi, vana lɔɔ ndu mó vu-o bɛnda mò sɔla isɔɔ le. 2Kɛ te ipala dɛnɛ kon yɔŋnun ni, mà dii ndu, vana dii ndu-o bɛnda mò sɔla sɔɛi le vanaciee o dii-o.

Vuiyo ciimbuu pɛ ɲɔɔ, o bɛnda mò luɛi bɔnɔɔ le ɲɛ pilaa salaa. Te o nɔ ɲɛ le, a pisi ndu pila le ɲɛ o ciimbuu-o salaa.»

Tɔŋndo le ɲɛm pilan

3«Te cɔloo o ciimbuu ni, o va naw, o va sofɛlɛ, o va saa, taa saalun pɛ cɔlu kon o kiyɛiyo ndu o ba, o sala cɔlua nda ŋiɔn sɔngɔ cɔlu pilɛ o ciimbuu kon-ndo.

4Te vanndo yɛɛ pɛ cɔlua ndɔa o ciɛi pílɛi nin, te kon te o nakɔ n'rɛsɛn pilaa nin, mà kɔ dio tɔlɔɔ co lon-ndo, o bɛnda mò salal vana ɲɔɔ ɲɛm kɛndɛ-kɛndɛn o koawnin o ciɛi ndɔɛi nin-ndon, te kon te tɔlɔɔ kɛndɛ-kɛndɛ o kiandunin o nakɔ n'rɛsɛn ndɔɔ nin-ndo sɔ̀ngɔ́ cɔlua ndɔa de o pílaa-o.

5Te vanndo mal pɛ yinnden, mì yinnde len le cii bɔɔ yɔmii n'yɔɔ lomɔɔ, mì le hiow, mì le kɔ lom malun pilan nda yii tumbulan-ndon, te kon te malun pilan kuwnun-ndɔ lon, te kon te ciɛi pílɛi, vana yinnde len le hɛlun-ndo bɛnda mò sala ɲɛ píla o lom-ndo. 6Te vanndo yɔngu pɛ vanndo ɲɔɔ pum le mandaa, o va n'voli, o va ɲɛ sɔvɛ pum, mì vanndo ciimbuu ɲɛ kon vana nda ke ndu le mandaa-o o ba, taa bii pɛ vui ciimbuu ndu-o, o sala ɲɛ o ciimbuu-o lediin. 7Taa bii vui kon te, vana ɲɛ kon lo o ba-o sim Hala o hɔl le sinaa te o co ndu le co ɲɛ pilaa dioo a lakafa le. 8Dɛnɛ oo dɛnɛ sɛɛngianndo co pɛ nin, o va dɛnɛ naw, o va dɛnɛ sofɛlɛ, o va dɛnɛ saa, o va dɛnɛ volɔɔla cuɛinan, o va dɛnɛ ɲɛ-ɲɛ lo, te vanaa ŋiɔn va pɛ sɛɛgianndo lecoo, mì vana-vana va dimio aa: ‹Ɲɛ nuu co hoo ni›, vanaa ŋiɔŋaa kan a bɛnda mà kɔɛ a sɔɛi ken Hala o hɔl. Vana Hala yàála pɛ, ndu salal vanndo pilɔɔ ɲɛ kon lediin.

9Te vanndo yɔngu pɛ vanndo sofɛlɔɔ, nawvo, saa, te kon te cɔlu súú-súù congɔɔ, te cɔlu kon vi pɛ, te kon te mò yem pelei, te kon te mì vuiya hun del o tàndà kon coo, mà ciimbuu cɔlu kon, te sei ve ikɛi le, 10sendío bɛnda mò luɛi vanaa ŋiɔŋaa kan tɛɛn o diola Mɛlɛka lan. Vana va cɔlu kon mandaa-o bɛnda mò mɛnan maa o co ndu le co cɔlu pilaa dioo a lakafa le. O kon, vana cɔloo cɛl sendí kon. Vana cɔlu kon va o ba-o bɛnda lɛ le ndu sala le. 11Kɛ te ndu macɛlu nda ciimbuu cɔloo ni, o bɛnda mò sala cɔlu pilaa. 12Te visi biyaa dii cɔlu kon ni, mó sɛɛsiaa ndu, o bɛnda mò hin a ɲɛ tɔ̀ visi kon mɛinin-ndo le seilen. O kon, o bɛnda lɛ mo sala cɔlu kon te. 13Te vanndo yow pɛ vanndo cɔloo o ba#22.13 vanndo yow pɛ vanndo cɔloo o ba: Cɔlua ndáà yovan o laba-a a pum va haa ni: sow, sofɛlɔɔ, ɲɔɔmɛɔ. Le baalaa tosaa a nda ndáà yow nda ni., mì cɔlu kon yom pelei, te kon te mò vi vana ɲɔɔ kɔɔli, vana yow ndu-o bɛnda mò sala cɔlu pilaa. 14Kɛ te vana cɔloo o hɔl sulalii ken fula vana yow ndu-o o ba ni, o bɛnda mò sala ɲɛ-ɲɛ le. Te o salaa coo nda bɛnda telen o va ndu yowvo-o ni, sala o co kon yɔngu-o bɛnda ni mo kumbu sulalii ken.»

Tɔŋndan a laasianndo o kɔɔ

15«Te vanapɔnɔɔ pum hiŋ pɛ cuaambɔ laandu vana fula vɔ kɔɔli le nɔ loo hɔlla, mò va a ndu#22.15 mò va a ndu: Kon co dimio ni aa «mò sina ndu vanalanɔ», «mò hini a ndu»., o bɛnda mò dɔw ndu fulu, mò yil ndu o nɔ̀u nin. 16Te fuɲaa cua kon kɛɛ pɛ le cua ndɔɔ kɛsio o nɔ̀u ndu o ba, langbanɔ kon luɛi bɔnɔ o volion nin mɛɛ nda dema cuaambɔa laandua hiw-vɔ vanapɔnɔ kɔɔli le-a fulu dɔvɔɔ yɛ. 17La cɛl mì vanalanɔ mangalaa#22.17 vanalanɔ mangalaa: Vannda pum a veelu vɛlɛ «vanalanɔ mangalaa» ho aa «kueinɔɔ». va yoomu niaa tɛɛn te.

18Vana-vana hini pɛ a cɔloo, ndu bɛnda mò sɔla piɔ́mndo kangalan. 19Vana solul pɛ halaa celennda sálàlan, te o co yɛ Mɛlɛka le o solul sálàlan te, ndu bɛnda mò sɔla piɔ́mndo kangalan.

20La sáángiaa mialaa co niaa o bɛngu coo-a le tɔnɔɔ solio nda o n'dial te, la luei nda mɔnɛi le. Kani niaa bɛɛ, mialla niaa yɔŋnun o lɛŋnde Esipte len nin ni. 21La luéi vanlaandua piaandaa ndaa vi-a a vííya mɔnɛi le. 22Te la luei pɛ nda mɔnɛi, mà cɛɛŋun ya Mɛlɛka o lani, í tuei nda diom. 23O kon, i tuulu kɔl a niaa, i tuisi niaa cɔwvo coo, la cuu vu kpow, haliko mi laandaa niaa bɛɛ nda siŋnun vanlaandua piaandaa ndaa vi-a, mì poaa niaa bɛɛ siŋnun vííya. 24Te la yɔngu pɛ vana pilɛ o yungu nuu tɛɛn#22.24 vana pilɛ o yungu nuu tɛɛn: Nanu, a cuavaa Israɛlla o kɔɔ Mɛlɛka co sɔɛi ni. Israɛlla co yungu ndɔ o hɛli mó kɛsi nda le ndu pila-o ni. Lelan, te o dimi pɛ aa «vana pilɛ o yungu nuu tɛɛn», kon co dimio ni aa Hebreenɔɔ, te kon te Israɛlnɔɔ. volion kueo, vana ikɔɔ co niaa ikɛi-yo pɛɛn, la bɛnda mì la kuel ndu le ndu suukoo le. La tisa ndu vɛlɛ kɔɔli le niaa mun mingullo a tɔnɔ lecoo le.

25Te la bii pɛ vanndo doma ndɔ bɛndoo o ba o landei nin, la bɛnda mì la mingul ndu doma ndɔ kon telen pá mì paalen le del. 26Kani kola kuumbuan ndɔɔ co kon ni. Te la mingul ndu doma bɛndu kon te, o yɛɛ nin o simbulun yɛnin le lɔan? Te la mingul ndu ndu le, o cɛɛŋun pɛ ya o lani, í tuei ndu diom, kani Hala iɲííyo ya co ni.

27La soaa diomnde vɔɔnnden a Hala le, la soaa diomnde vɔɔnnden a vana co simlacinɔɔ yungu niaa coo-o le.

28La tamala le ya Hala ɲɛm tasen niaa kow o ciɛɔn niaan nin-ndon a mɔima niaama tasean yɔngoo le. La bɛnda mì la yɔngu ya poaa niaa tasea. 29La bɛnda vɛlɛ mì la yɔngu ya cɔlua piaandua tasea cɔlua niaa koam-nda: nawva, saa a cuinnda. Te kalaa ndaa kom nda pɛ, a bɛnda mà lo nda ikɛi háá palɛi ndii ŋɔmmɛw. Kɛ o paale ŋɔmaandɔlen coo, la bɛnda mì la yɔngu ya nda. 30La bɛnda mì la va vanaa diandaa le ya Mɛlɛka. Lelan, la dia visin cɔlu visia biyaa sɛɛsiaa-o le, la bɛnda mì la yɔngu tunnda visin mun.»

Currently Selected:

Fulaa 22: BKG

Highlight

Copy

Compare