Fulaa 21

Tɔŋndo a cɛa co Israɛlla-a o kɔɔ

1Mí Mɛlɛka dimul Moise aa: «Má cè tɔŋndan le lan Israɛlla tɛɛngullo: 2Te la pendu pɛ cɛɔ, mì cɛ kon va Hebreenɔɔ, o bɛnda mò tosal vana pendu ndu-o baalaa o vɔsilan laŋɔmpum bɛngu. Kɛ o vɔsi ŋɔmmɛwndɔɔ, o sɔla hɔ́ɔ́yɛi ndɔɛi, o kɔɛnnun. O bɛnda mò sala ɲɛ-ɲɛ le baŋan ndɔ kon te. 3Te yemboo o va telen nda va ndu piondɔɔ-o ni, o va pɛ kɔlan, o kɔɛnnun ndu pilɛ. Te a lanɔɔ o ba o siŋnun cɛɔ ni, o va pɛ kɔlan, o kɔɛnnun a laa ndɔ. 4Te vana ndɔ bɛndoo#21.4 vana ndɔ bɛndoo: Vana pendu ndu-o co vana ndɔ bɛndoo ni. Kani te o co vɔ pɛ o cɛlen nin, mɛɛ sumialii vana pendu ndu-o o co ni. ke pɛ ndu lanɔɔ, mò velu cuawva a lanɔ kon, lanɔ kon a cuavaa kan a bɛnda mà lo le vana ndɔ bɛndoo, mì cɛ kon ndu sɔla hɔ́ɔ́yɛi ndɔɛi, mò kɔɛnnun ndu pilɛ. 5Kɛ te cɛ kon dimi pɛ aa: ‹I yeema vana ni bɛndoo, laa nuu a cuavaa nia, i yeema mì mɛi nda mì sɔla ihɔɔya le›, 6o kon, vana ndɔ bɛndoo sɔɔnguu a ndu Hala o hɔl, o kɔɛ a ndu o koŋndo ikɛi, te kon te o kèédei coo, o buli ndu nilen a yɔɛi buliaa laniei. O tosa pɛ lende, langbanɔ kon siŋnun cɛ ndɔɔ le fɛɛn a fɛɛn.

7Te vanndo pisi pɛ cua ndɔ laandoo le siŋnɔnndo cɛɔ, ndu sɔlanin baŋaa mɛɛ cɛa tɔ̀a sɔ̀là baŋaa yɛ le. 8Te o hɛnan vana ndɔ bɛndoo le vaa laa ndɔ le, vanaa velu ndu-a baŋa ndu. Kɛ te vana ndɔ bɛndoo cii pɛ ndu dúmbú yii#21.8 dúmbú yii: Nanu, mí vannda pum bii ndi bila aa: «o cii pɛ ndu sina vanalanɔ.», o nɔ lɛ di mò pisi ndu vanaa-mangalaa-isɔaa celen o ba le. 9Te le po ndɔɔ yɔngoo o pendu ndu ni, o bɛnda mò bii ndu mɛɛ vana bii hɔ́ɔ́ laandu n velu-o yɛ. 10Te vana ndɔ bɛndoo cii nin pɛ ndu cua maa laa ndɔ, mò yil vɛlɛ lanɔ celen o ndu kɔɔli, vana ndɔ bɛndu kon bɛnda mò dɔɔnial ndu ɲɛ-ɲɛ hiovɔɔ lanɔ kon coo le, o va o ɲɛdiaa nin, o va o ɲɛ cuɛinan nin, o va o kpelemɔɔsaa nin. 11Te o nɛŋi ndu kɔl o sɔɔn yaan mún nin te, cɛ kon nɔla mò sɔla hɔ́ɔ́yɛi ndɔɛi, mò kɔɛnnun. O bɛnda mò yɔngu n'voli le baŋan ndɔ kon te.»

Yɔŋ vɔɔn vana tosa mà sɔla piɔ́mndo-o

12«Te vanndo lɔɔ pɛ vanacieo mì vanaciee kon vi, vana lɔɔ ndu kon-ndo bɛnda mò sɔla piɔ́mndo kangalan. 13Kɛ te o ve mɛngɛla le o mɛngɛla ndu mó dii ndu le, o va pɛ maa Hala tosa ni mí sulalle fula vana kon o ba, Hala toosiaanin fondaa mì vana kon kɔ vionnun#21.13 mì vana kon kɔ vionnun: Kobilan lapum la va le vanaa sulalle fula o ba-a kɔlan vionnɔnndo, yɔŋii vanaa sɔɛi ken va nda tɛɛn-nda ndóò komal ndu o fondaa pum mì ndóò dii ndu. Le sɔɛi kobila lan sinaa, tofa vɔ Kundalan 35.9-15, Tɔŋ miingua 4.41-43, 19.1-13, Yosue 20.. 14Kɛ te vanndo tisa pɛ vanacieo coo, mò dii ndu a kɔlvesɛiyo, hali vana kon kɔ vionnun bɛɛ o fonda-loamaa-lasálà Hala-o ikɛi, la bɛnda mì la kɔ nan ndu lon, mì la hin a ndu, mì ndu bɛɛ sɔla piɔ́mndo.

15Te vanndo lɔɔ pɛ fuɲa ndɔ, te kon te kala ndɔ, vana kon bɛnda mò sɔla piɔ́mndo.

16Te vanndo ciimbuu pɛ vanacieo, o bɛnda mò sɔla piɔ́mndo. Hali o pisi bɛɛ vanaciee o ciimbuu kon-ndo maa cɛ, te kon te a saalun bɛɛ vanaciee kalaa ndu o ba, vana ciimbuu ndu kon-ndo bɛnda mò sɔla piɔ́mndo kangalan.

17Te vanndo mɛna pɛ fuɲa ndɔ, te kon te kala ndɔ, vana mɛna kon-ndo bɛnda mò sɔla piɔ́mndo#21.17 Te vanndo mɛna pɛ fuɲa ndɔ, te kon te kala ndɔ: Vana nɔla ma hivi vɛlɛ fondaa ho aa: «Te vanndo dɔw pɛ fuɲa ndɔ, te kon te kala ndɔ danga». Vannda pum hivi fonda kalaa aa: «Te vanndo yei pɛ fuɲa ndɔ, te kon te kala ndɔ…»..»

Yɔŋulɔnndan a boolɔnndan

18«Te vannda cɔlɔba pɛ, mì o pilɛ lɔɔ o pilɔɔ a bɔtáà#21.18 bɔtáà: Vanndo tuu pɛ suon o ba ninndo nin, mì ba nin kon siŋnun kpungbɛi, kon co bɔtáà ni., te kon te a powvo, te vana nda lɔɔ-o vi le, kɛ mò hini a sanga kon, 19te o cɛn pɛ mò nɔla vɛlɛ kelaa o bɛ́ɛ̀ a tindáá, a bɛnda mà yɔŋ vana lɔɔ ndu-o ɲɛ-ɲɛ le. Kɛ o bɛnda mò sala caando le palɛi o tosa ihini o ve vali tosa le-e. O bɛnda vɛlɛ mo cɛw ndu háá mo sengu.

20Te vanndo lɔɔ pɛ cɛ ndɔ piaandoo, te kon te cɛ ndɔ laandoo a yɔmndo, mò dii ndu o foofo, cɛ kon bɛnda mò sɔla màá mingullo o vana kon ndo. 21Kɛ nduyɛ, te cɛ nda lɔɔ kon-ndo tosa vɔ pɛ yoomu paale pilɛ, te kon te palɛi ŋiin, vana mingi lɛ màá ndɔ o vana ndɔ bɛndu lɔɔ ndu-o lo le, kani a volin ndɔn o pendu ndu ni.

22Te vannda lo pɛ cɔlɔbaa, mà kundu vana folio, mì telen ndɔ vialaa tiiya le, kɛ mo velu le kundɔɔ nda kundu ndu kon-ndo, te dɛnɛ palaa celen tosan o kon kɔɔli le, vana kundu ndu-o luɛi bɔnɔɔ yamaa o hɔl mɛɛ pɔnɔɔ vana foli kon kialunin yɛ. 23Kɛ te sulalle fula pɛ lenin, la tosa mɛɛ o dimin yɛ: vana dii pɛ vanacieo, a dii vana kon. 24Vana pɛl pɛ vanndo hɔlten, ndu bɛɛ a piɔl ndu hɔlten. Vana bɛŋi pɛ vanndo ciŋnde, ndu bɛɛ a bɛŋi ndu ciŋnde. Vana yem pɛ vanndo baa, ndu bɛɛ a yem ndu baa. Vana yem pɛ vanndo pelei, ndu bɛɛ a yem ndu pelei. 25Vana lom pɛ vanndo, ndu bɛɛ a lom ndu. Vana boli pɛ vanndo, ndu bɛɛ a boli ndu. Vana soli pɛ vanndo bulunndan, ndu bɛɛ a soli ndu bulunndan.

26Te vanndo lɔɔ pɛ cɛ ndɔ piaandoo, te kon te cɛ ndɔ laandoo hɔlten mò pɛl ndu len, o bɛnda mò ke ndu hɔ́ɔ́yɛi ndɔɛi sɔngɔ hɔlte o pɛl ndu len-nden. 27Te o bɛŋi pɛ ndu ciŋnde, o bɛnda mò ke ndu hɔ́ɔ́yɛi ndɔɛi le ciŋii o bɛŋi ndu ken-nde.

28Te nawvo kundu pɛ vanacieo mò dii ndu, o va vanapɔnɔ o va vanalanɔ, a bɛnda mà vii naw kon a powtan háá mà dii ndu. Visin ndɔn bɛnda mì n dennun te. O kon, vana naw kon bɛnda mò sɔla isɔɔ le. 29Kɛ o va bɛɛ lende, te naw kon dema nin pɛ vannda kundɔɔ paandu, mà kanalan vana nawvo, mò saalan le ndu biyɔɔ le, te naw kon kundu nin pɛ vanndo mò dii ndu, a bɛnda mà vii ndu a powtan háá mò vi, mà dii vɛlɛ vana naw kon. 30Taa kilul pɛ vana naw kon ɲɛ pum le yoomu ndɔɔ baŋaa, o bɛnda mò yɔngu ɲɛ nda kilul ndu kon-ndo kpow. 31Te poombɔ piaandoo, te kon te cuaambɔ laandoo nawvo kundu ni, naw kon bɛɛ a tosa a ndu mɛɛ tɔŋ pilɛ kon dimi yɛ. 32Te cɛ piaandoo, te kon te cɛ laandoo nawvo kundu ni, vana nawvo bɛnda mò yɔngu vana nɔ cɛ kon-ndo volin latámán beleyaa. O kon kɔɔli, a vii naw kon a powtan, a dii ndu.

33Te vanndo faŋa pɛ kumboo o soondo coo, te kon te mò tow soondo, mò mɛi ndu sondoo fondo, mì naw pilaa, te kon te sofɛlɛ pilaa del lenin, 34vana tow soon kon-ndo bɛnda mò dɔw cɔlu pilaa vɔngu mɛɛ cɔlu kon nɔ báà yɛ. O kon, ndu loo cɔlu vílɛ́i kon.

35Te naw vanndo kundu pɛ naw pilaa mò dii ndu, a pisi naw dii kon o pilɔɔ-o, vana naw vi-o a vana naw dii ndu-o a piɔvan volion tɛɛn, a piɔvan vɛlɛ naw vi-o. 36Kɛ te o va pɛ maa naw dii kon o pilɔɔ-o dema nin kundɔɔ lende, mì vana nawvo saalan le ndu biyɔɔ le, o bɛnda mò sala naw kiyɛiyo sɔngɔ naw pila vi-o, mì ndu loo naw vílɛ́i kon.»

Tɔŋndo le cɔlua ciimbuaa

37«Te vanndo ciimbuu pɛ nawvo, te kon te saa, mò dii ndu, te kon te mò pisi ndu, o bɛnda mò sala nawva nda ŋuɛɛnu le naw pilɛ o ciimbuu kon-ndo, te kon te saa nda hiɔɔlu le saa pilɛ o ciimbuu kon-ndo.»

Currently Selected:

Fulaa 21: BKG

Highlight

Copy

Compare