Fulaa 23

Tɔŋndo a dɛnɛ sandaa tosaa o kɔɔ

1«La sɛŋi sɔɔn lacòòvan te. La sim vana yɔŋ vɔɔndo kɔɔli mì la timbi seile lacòòvalen le ndu dio keo le. 2La del fàngà-kundaa kɔɔli le dɛnɛ vɔɔndo tosaa le. Taa veelu nɔm pɛ le seilen timbio o kɔɔsɔɔ, del fàngà-kundaa kɔɔli le toɲaa vionɔɔ le. 3La sim vannda kɔɔli o còòlan coo o kɔɔsɔɔ nin te, hali o va vana bala fondoo.

4Te la saalun pɛ naw luusian yaamɔɔ niaa o ba-o, te kon te sofɛlɛ ndɔ luusian ndu o ba-o, la cuu ndu ndu. 5Te la komal pɛ sofɛlɛ yaamɔɔ niaa o delaa o volɔɔla lusulan bɛngu, la hiawnun mì la kɔɛnnun te, kɛ la mala yaamɔɔ niaa kon le sofɛlɛ ndɔ kon mingio isisi.

6La dímì còòlan mì la ven di vana bala fondoo o kɔɔsɔɔ le. 7La luei balan o sɔɔn lacòòvan nin te. La dii vana tɛɛmbuu isɔɔ loo le, la dii vana sandaa le. Kani ya Mɛlɛka, i ci vana tɛɛmbua tɔŋndo vana sandaa le. 8La cɛl ɲɛm nda vanin niaa yɔngoo le niaa luɛyɔɔ nin-ndon te, kani ɲɛm vaa lende n suumiaa vanaa co cɔu-va, mì n laasiaa sɔɔn vanaa sandaa. 9La luei mialaa co niaa o bɛngu coo-a mɔnɛi le, niaa pila sina mɛɛ calle o sumialle i kendu yɛ. Kani mialla niaa bɛɛ yɔŋnun o lɛŋnde Esipte len nin ni.»

Tɔŋndo le vɔsila pɛngiaalan a palɛi pɛngiɛi

10«O vɔsilan tan ŋɔmpum bɛngu, la tiwba mì la vàá ciɛɔn niaan, mì la kow yɛiyun niaa saŋ-ndon. 11Kɛ o vɔsi ŋɔmmɛwndɔɔ, la bɛnda mì la ke yondoo pɛngio. Ɲɛ-ɲɛ vanaa ikɔɔa niaa tɛɛn a komal pɛ o ciɛɔn mun nin vɔsi kon, a dɔwnun balo a kon. Ɲɛ tɔ̀ nda mɛinin-ndo visia koma dɔwnun balo a kon. La tosa lende a nakɔla niaala n'rɛsɛnndan a á nakɔla niaala olivieelan.

12O palɛi ndii ŋɔmpum bɛngu, la tiwba mì la tosa baalala niaalan kpow. Kɛ o paale ŋɔmmɛwndɔlen coo, la bɛnda mì la tosa baala le, haliko mi navaa niaa a sofɛlɛa niaa sɔla pɛngio, mì poaa cɛa niaa laandua a mialaa co niaa o bɛngu coo-a sɔla vɛlɛ yoomuma sɛnɛi.

13La bɛnda mì la bii sɔɔn ya dimul niaa-on kpow. La sooluu halaa celen te, la pial bɛɛ nda diolan te.»

Tɔŋndo a kafola bɛndulan tan yáá o kɔɔ

(34.18-26, Tɔŋ miingua 16.1-17)

14«O vɔsi oo vɔsi nin, la bɛnda mì la tosa kafolan tan yáá le ya Mɛlɛka biiloo. 15La bɛnda mì la tosa kafo bulu toosian a lɛvɛn too. Mɛɛ ya dimul niaa le tosaa o telen kelun o paangii Abib-e nin-ndo yɛ, o palɛi ndii ŋɔmmɛw bɛngu, bulu toosian a lɛvɛn too niaa bɛnda ni mi la va dioo. Kani o paangii ken nin niaa faŋan o lɛŋnde Esipte len nin ni. Vana-vana bɛnda mò hun sim ya Mɛlɛka o hɔl bala fondo le. 16La bɛnda vɛlɛ mì la tosa duɲɛi kafo koavaa telen niaa kandunin ɲɛm niaa vàá o ciɛɔn niaan nin-ndon kovɔɔ-o, ɲɛm tasen niaa koawnin-ndon pɛɛn. O vɔsio mɛɛlulan, la tosa vɛlɛ duɲɛi kafo lakùùo telen niaa ciinin ciɛɔn niaan kovɔɔ-o. 17Bɛmbɛ leyáá o vɔsio nin, vanpiaandua kpow bɛnda mà hun sim Maalii o hɔl, ya Mɛlɛka pɛɛn. 18La hun a bulu toosian a lɛvɛnndo-o telen niaa co va ya sálàla n'cɔlulan solullo-o le. La mándà cuɛima cɔlua nda co ya sálàlan solullo o kafola nilan coo-a-an háá diimandɔɔ idiiyo le. 19La bɛnda mì la kɔɛ a ɲɛm tasen niaa koawnin o ciɛɔn niaan nin-ndon o Cɛi-Mɛlɛka Hala niaa nin. La yaw cuin cuaa o mɛɛma kala ndɔan nin te#23.19 La yaw cuin cuaa o mɛɛma kala ndɔan nin te: O dina Kanannda nin, naamu kon va tosanndo lɔ́ɔ́ kon ni. Tofa vɔ 34.26, Tɔŋ miingua 14.21. Mɛɛ vanaa tɛɛsiaa Sɛbɛ Hala-o taw-va pum bii fondaa ho bila yɛ, ndu co ni maa vana faŋa cuin lendoo kala ndɔ ikɛi telen o co vɔ vɔɛiyo-o mì vana dii ndu le..»

Mɛlɛka yɔngu Israɛlla silalan le kɔla nda vanin-ndan

20«I co mɛlɛkanɔɔ vomɔɔ niaa laci le niaa mandaa nɛi-tɛɛn a le niaa yɔɔ o fonda ya bɛɛndial niaa-o. 21La caa kelaa a ndu mì la bii ndu diom. La simul ndu le, kani te la tɛɛndan ndu pɛ, o melnin niaa haki le. Bau diola nilan la co ndu coo. 22Kɛ te la bii pɛ sɔɛi ndɔɛi ɲɛkɛndɛi, mì la tosa sɔɔn ya dimul niaa le tosaa-on kpede, i siŋnunnin yaamɔɔ vanaa co niaa yaamɔɔlen tosallo-a, mì simul vanaa simulnin niaa-a. 23Kani mɛlɛkanɔ nuu vanin kɔlan niaa laci háá mo kɔ tiiya niaa o lɛŋnde Amoriia, Hitiia, Perisiia, Kanannda, Heviia a Yebusiia nin. Vanaa kan yɛ, i ciinin nda kpede.

24La sooluu halaa ndaa le, la baŋ vulan nda o labɛngunin te. La kélà mɛɛ nda co kela nɔɔlɛiyo yɛ le, kɛ la pesipesi piɔmaa ndaa, mì la koombiaa powta sálàla ndalan. 25Ya Mɛlɛka, ya co Hala niaa-o kínɛí niaa bɛnda le biiloo ni, haliko mi dɔw niaa duaa, mì yɔngu niaa ɲɛdiaa kɛndɛ-kɛndɔɔ a mɛnndan taw-taw, mì kanda niaa vɛlɛ le nààlan. 26O lɛŋnde niaalen nin, vanalanɔ oo vanalanɔ tembunin ipulu le, o kɛ́-kɛ̀ vanin vɛlɛ vana vialaa. Handɔɔ o kon coo, i yɔngunin niaa yoomu vilɛiyo.

27I co vanaa co icali niaa laci-a siòòŋii niɛi luei. Nɛɛ-nɛɛ niaa va pɛ luɛyɔɔ, i toawnin vanaa vanin niaa laci lon-nda. I vanin yaamɔaa niaa tovɔɔ mà va niaa ɲaanɔnndo. 28I co sunbungaa yɔɔ niaa laci, mà kɔ tow Heviia, Kanannda a Hitiia. 29Kɛ nduyɛ, i tuwnin nda niaa laci o vɔsi pilɛ bɛngu le, yɔŋii lɛŋnden le lo lemalnannden mì visia yondoa kui le niaa cɔlɔbaa. 30Lelan, o pɔm-pɔmbɔ ya vanin nda tovɔɔ niaa laci ni, haliko mi la lo kuiyo háá mì la tiwba le lɛŋnden kpow cuaa, mì la tiw lenin kpede. 31I handunin pɛɛngula lɛŋnde niaalen cɔnɔnndo a mɛmma ihɛlma makpɛ̀ndɛ̀an, kɔ bii a mɛmma ihɛlma Filistia, kandɔnndo vɛlɛ a lɛŋnde veselɛilen Sinai, kɔ bii a pee bɛndoo Efrate. Kani i malnin vanaa co o tàndà kon nin-nda niaa o ba, mì la tow nda polon. 32La yii kpema niaa ndaa le, la yii kpema a halaa ndaa le. 33La cɛl lɛ mà cal o lɛŋnde niaale len nin te, yɔŋii nda viom niaa hakio tosaa a ya Mɛlɛka, mì la sooluu halaa ndaa. Kani te la tosa pɛ lende, mɛɛ la haw o yaŋɔɔle ndalen nin.»

Currently Selected:

Fulaa 23: BKG

Highlight

Copy

Compare