Fulaa 20

Tɔŋnda tɔ́la Hala yɔngu Moise lan

(Tɔŋ miingua 5.6-21)

1O kon, mí Hala soaa sɔɔn mun kpow, mó dimi aa:

2«Ya co Mɛlɛka ni, Hala niaa pɛɛn. Ya soli niaa o lɛŋnde Esipte len nin ni, lɛŋnde#20.2 lɛŋnde: O hebrei nin, nuaa o dimin ni aa: «cɛi niaa lecɛo», te kon te aa: «cɛi niaa va nin o cɛlen nin-ndo». niaa va nin o cɛlen nin-nden.

3Lelan, la bɛnda mi la sooluu halaa celen o ya kɔɔli le.

4La selnun piɔmnda le. La tuula ɲɛ-ɲɛ le: o va ɲɛm co o halataala-on, o va ɲɛm co o lɛŋnden coo-on, o va ɲɛm co o mɛnndan nin o lɛŋnden bɛngu-on. 5La baŋ vulan ɲɛm mun o labɛngunin te, la sooluu mun te. Kani ya Mɛlɛka Hala niaa, Hala paŋalaa ya co ni. I soaŋ cuavaa vanaa nɔ nɛyɔn nuu-a le hakila fuɲaa ndaa, i soaŋ cuavaa ndaa háá o lambi yàándɔɔ, háá o lambi hiɔɔlundɔɔ bɛɛ. 6Kɛ vanaa kaola ya má bii tɔŋnda nilan-nda, i lo nda kɛndɛi tosallo háá o lambi vaa pilɛndɔɔ.

7La pial diola Mɛlɛka Hala niaa o fondo fúúo coo#20.7 o fondo fúúo coo: Diomnda dimin o fondaa ho o hebrei nin-ndan la yingila taw. Lelan, mí vannda pum hivi lan aa: «La pial diola Mɛlɛka Hala niaa le vannda palaa le», mí a pum a hivi aa «La pial diola Mɛlɛka Hala niaa mɛ̀ɛ́-mɛ̀ɛ́ ka le». le, kani vana pɛl pɛ diola ndɔlan o fondo fúúo coo, Mɛlɛka tuisi vana kon dɛnɛ palaa coo#20.7 Mɛlɛka tuisi vana kon dɛnɛ palaa coo: Sɛbɛlan lapum la hivi fondaa ho aa: «Mɛlɛka bii vana kon maa vana tɛɛmbua tɔŋ», te kon te aa: «Mɛlɛka mɛi vana kon lende mò kɛɛ ndu saangiaa le»..

8La loonun a paale pɛngiaalen mì la ce len maa lediandaalen le co ni. 9La bɛnda mì la tosa baalaa o palɛi ndii ŋɔmpum bɛngu, mì la toosiaa kpekula niaalan kpow. 10Kɛ paale ŋɔmmɛwndɔlen, paale pɛngiaale diandaale co le Mɛlɛka Hala niaa len le co len ni. La tosa baala oo baala o paale len coo le, kandɔɔ a niaa pila, poaa niaa, cuavaa niaa laandua, cɛa niaa piaandua a à laandua, cɔlua niaa, kɔ bii a mialaa co niaa o bɛngu coo-a. 11Kani o palɛi ndii ŋɔmpum bɛngu, mí Mɛlɛka cɔaw halataalaa, lɛŋnden, mɛmma ihɛllan a ɲɛm co lenin-ndon kpow, kɛ o paale ŋɔmmɛwndɔlen coo, mó pɛngi. Lelan ndu Mɛlɛka dɔw paale pɛngiaale len duaa ni mó dindi len.

12La ke fuɲaa niaa a kalaa niaa bɛɛlen, haliko mi la viow yoomu o lɛŋnde Mɛlɛka Hala niaa co niaa yɔngu len coo.

13La dii vanacieo le.

14La suunda le.

15La yɔŋ levui le.

16La tímbul caanda seile lacòòvalen te. 17La fúla cɛi pilaa lehɔl te. La fúla lanɔ pilaa lehɔl te, la fúla cɛ piaandu pilaa, cɛ laandu pilaa, naw pilaa, sofɛlɛ pilaa lehɔl te. La fúla ɲɛ-ɲɛ co ɲɛ pilaa lehɔl te.»

18Vannda kpow a va diom mataŋndo a diom bulu bɛndoo tueyɔɔ, a va piɔɔ cɔu volio iŋuanndi-ŋuanndiei a kumii bɛndu-bɛndui kumbu pembii ken mɔku-mɔku-e. Mɛɛ nda ce lende, má ɲiiya a siòònde, má sim kɔɔli-kɔɔli. 19O kon má dimul Moise aa: «Nɔm pila soo nin o naa lo, mì n bii sɔɛi nɔmnde. Kɛ Hala soaa lɛ o naa lo sakpo le, yɔŋii naa n sɔla piɔ́mndo.» 20Mí Moise mulul nda aa: «La yɔŋ isiòòn te. Le niaa tɔɔndanndo Hala hin ni, haliko mi la nɔ bɛɛle ndɔlen, yɔŋii niaa tosa hakio.» 21Mí vannda sim kɔɔli-kɔɔli, Moise ndu pilɛ kpé sɔɔnguu nɛɛ Hala va o tindile ikumnden nin-nda ni.

Tɔŋndo a fonda-loamaa-lasálà Mɛlɛka-o o kɔɔ

22Mí Mɛlɛka dimul Moise sɔɔn mun le Israɛlla mun tɛɛngullo aa: «La ce mɛɛ ya lo o halataala mí soaa o niaa lo yɛ. 23La cɔaw piɔmnda a volin humbon a á sianion o ya kɔɔli, mì la kpɔnda nda biiloo a ya le. 24La ców ya fonda-loamaa-lasálàá a puuloo, mì la soli sálàla loamaala niaalan a sálàla kɔlɲulula niaalan lecoo, mì la soli vɛlɛ cɔlua niaa pɔmbɔa a navaa niaa sálàá lecoo. Fonda oo fonda ya cɔmnun niaa pɛ, i hin o niaa lo, i dɔw niaa duaa. 25Te la va pɛ ya fonda-loamaa-lasálàá cowvo a powtan, la cɔaw ndu a powta sialaalan te. Kani te la sɛl pɛ powtan a tuɛ̀ndɔɔ#20.25 tuɛ̀ndɔɔ: Ciliŋii valle pum tuɛ̀ndɔɔ co ni. A ndu sumnda kialu ciliŋun kálà-kálàn ni, a ndu koni vanaa sial piɔmaa lapowva-a sial piɔmaa kan ni., mɛɛ powta lan la bɛnda lɛ le vali Mɛlɛka-o le. 26La cow ya fonda-loamaa-lasálà vana hel coo maa kpengba-o#20.26 kpengbaa: Yɔm vana toosiaa le helɔɔ o kaa-o kpengbaa co ni. A pum veelu ndu aa yɔm kondaa. Kɛ o co yɔm vaa lende kpeekpei le ndáà tosa le helɔɔ o fonda-loamaa-lasálàá coo le. Le helɔɔ o fonda-loamaa-lasálàá coo ndu, fondalan ndáà kɔa a toosiaa ni maa póla vana toaw o kpengba nuaa lan le kɔlan a nɛiyo lecoo. le, yɔŋii vanaa vanin helɔɔ lecoo-a lo helɔɔ lon mì vannda ce tum fondo ndaa.»

Currently Selected:

Fulaa 20: BKG

Highlight

Copy

Compare