Fulaa 19

KPEMA MƐLƐKA YIILU ISRAƐLLA O PEMBEI SINAI-O

(19—24)

Israɛlla tiiya o lɛŋnde veselɛilen Sinai nin

1Mɛɛ Israɛlla fula o lɛŋnde Esipte len nin, o paale taselen coo o paangii yàándɔɛi nin o cɔnɔn ndaa Esipte kɔɔli, má tiiya o lɛŋnde veselɛilen Sinai nin. 2Mɛɛ nda faŋan Refidim, má tiiya o lɛŋnde veselɛile len nin, má kila dɔ́ɔ́ngɔ́ ndaa o pembei Sinai hɔl-ndɔ.

3Mí Moise hel o pembii ken coo le bɔŋanndo nda Hala. Mí Mɛlɛka veelu ndu lon o pembei coo, mó dimul ndu aa: «Sɔɛi n bɛnda ma tɛɛngul pulun Yakɔb-on-nde co hee ni, Israɛlla pɛɛn: 4‹Niaa pila ce mɛɛ ya tosa a Esiptea yɛ a mɛɛ ya cua niaa o kumbannda kovɛa coo mí hun a niaa o ya lo yɛ. 5Lelan sisa, te la bii pɛ sɔɛi nii, mì la manda kpema nuu, la vanin yungu kɛsin teengen le ya-o o vanaa súúla celennda tɛɛn, kani ya nɔ lɛŋnden kpow ni. 6Lelan, la vanin vanaa-solia-lasálàá lemasaa a yungu diandaa kɛsin teengen le ya Mɛlɛka-o.› Sɔɔn mun n bɛnda le Israɛlla tɛɛngullo ni.»

7Mí Moise muungu o dɔ́ɔ́ngɔ́ɔ̀ nin, mó cuungiaa kaasoŋaa kɔlkalua o Israɛlla tɛɛn, mó tɛɛngul nda sɔɔn Mɛlɛka sɔɔ ndu o sondo-on kpow. 8O kon mí nda kpede a yonda diom pilɛ kpé aa: «Ɲɛ-ɲɛ Mɛlɛka dimul naa le tosaa, n co ndu tosa.» Mí Moise muungu, mó kɔ cɔm Mɛlɛka muli yungu kon muli-o. 9Mí Mɛlɛka dimul ndu aa: «Tofa vɔ, i co kɔlan o nɔm ndo o kumii bɛndu-bɛnduei nin, haliko lɔ́ɔ́ ya vanin sɔɛi o nɔm ndo-o, mì Israɛlla tuei ya diom, mà laalan nɔm le lɔ́ɔ́-lɔ́ɔ̀.» O kon mí Moise cɔm Mɛlɛka sɔɔn Israɛlla soo-on.

Mɛlɛka tol o pembei Sinai coo

10Mí Mɛlɛka dimul Moise aa: «Kɔ ma kɔ dimul Israɛlla aa a bɛnda mà dindin kandɔɔ hau háá siɔdii, mà tɔ́ɔ́ vɛlɛ volɔɔla ndala cuɛinanndan. 11A va a bɛɛndiannda le diɛŋ, kani i toalnin ɲinkon o pembei Sinai coo nda kpow o hɔl. 12Kɛ a bɛnda ma kilu nda kpélénndan#19.12 kpélénndan: Pɛɛngula vana bɛnda le hiovɔɔ le lan la co kpélénndan ni. Kpélenndo, tindile vana kialu le vanndo kuunaa hiovɔɔ lekɔɔli len o co ni. Te vana hiow pɛ kpélénndo, a komal dɛnɛ palaa lekɔɔli. o pembei balɔɔ pindo, ma dimul nda aa: ‹La mandan, la hel o pembei he coo le, la sɔɔnguu bɛɛ ikɛi le, kani vana-vana sɔɔnguu pɛ ndi ikɛi, ndu sɔlanin piɔ́mndo. 13Vana-vana tɛɛmbuu pɛ tɔŋndo ho, vana pilannin ndu a ba le, kɛ a lonin ndu viiyo a powtan, te kon te a kɔɔn háá mò vi. O va vanaciee o va cɔlu, vana-vana tɛɛmbuu tɔŋ kon pɛ, o lonin yoomu le. Fɔ mà hɔŋ fɔlɔn lee saa kóndóó malan a pum a hel o pembei coo.›»

14Mí Moise toal pembei, mó muungu o Israɛlla lo, mó dindi nda Mɛlɛka o hɔl. Má tɔaa vɛlɛ volɔɔla ndala cuɛinanndan. 15O kon kɔɔli, mó dimul nda aa: «La va a bɛɛndiannda le diɛŋ. Háá ɲinkon, la bɛnda mì la tosa kpelemɔɔsaa niaa laandaa niaa le.»

16Mɛɛ paale yàándɔle len le tiiya, idiiyo púŋ, mí taŋndan ma kandu deŋio, mí piɔɔ kandu volio iŋuanndi-ŋuanndiei, mí kumii tiŋii bɛndu-bɛnduei kumbu pembii ken mɔku-mɔku. Mí diom bulu bɛndoo soaa, mí siòònde bii vanaa va o dɔ́ɔ́ngɔ́ɔ̀ nin-nda kpow, háá má ɲiiya. 17O kon, mí Moise soli vanaa va o dɔ́ɔ́ngɔ́ɔ̀ nin-nda kpede le kɔlan Hala bɔŋaa. Mí nda kpow a kɔ sim o pembii ken bɛngu. 18Mí kumnde mial pembei Sinai, kani Mɛlɛka ndóò tol lon o yinnde bɛndulen nin. Mí kumnde va helɔɔ mɛɛ i fula o tóndó bɛndu leyinndo nin nuaa yɛ. Mí pembei kpow i hiilun voku-voku. 19Diom buloo va hiovɔɔ laci a deŋio tuŋ-tuŋ. Moise va sɔɛi, mí Hala va ndu mulullo a diomndo maa diom letaŋ.

20Mɛlɛka ndóò tol o pembei Sinai bollen di-di, lon o veelu Moise ni, mí Moise hel. 21Mí Mɛlɛka dimul ndu aa: «Tol mà kɔ kanalan vannda ha, yɔŋii nda hiow pɛɛngulan a kiltan le hunɔɔ nɛɛ ya Mɛlɛka co-a le ya cɔu, yɔŋii vannda taw a sɔla piɔ́mndo. 22Hali vanaa-solia-lasálàá co ya sɔɔnguuo ikɛi-ya, a bɛnda fɔlɔn mà dindin malan nda hun, yɔŋii ya tɛɛmbuu nda.» 23Mí Moise mulul Mɛlɛka aa: «Vanaa kan a helnin o pembei he coo le, kani nɔm pila dimul naa ni aa naa n kilu nda kpélénndan o pembei balɔɔ pindo, mì n dimul nda maa o diandaa fonda kon co nɔm o hɔl ni.» 24Mí Mɛlɛka dimul vɛlɛ ndu Moise aa: «Tol. Kɔ mà kɔ hun a Aarɔn. Kɛ vanaa-solia-lasálàá a vanaa tɔ̀a nda keleŋa vɔ helɔɔ a kiltan nɛɛ ya co-a le, yɔŋii ya tɛɛmbuu nda.» 25Mí Moise toal, mó kɔ tɛɛngul vannda sɔɔn Mɛlɛka sɔɔ ndu o sondo le nda-on.

Currently Selected:

Fulaa 19: BKG

Highlight

Copy

Compare