Fulaa 15

Israɛlla lisa Mɛlɛka o condei nin le baŋa o baŋa nda-o

1O kon, mí Moise nda Israɛlla soli condei he le Mɛlɛka lisaa aa:

«I solinin condei le Mɛlɛka lisaa,

kani o cɔm biilu ndɔɔ ceen vakpa.

O miisuu soa a vanaa ɲaanun o soa coo-a

o mɛmma ihɛlma makpɛ̀ndɛ̀an nin.

2Mɛlɛka co yoomuma nian a vana ya lisà-o ni.

Ndu yɔŋnun vana ciindiaa nuu ni.

Ndu co Hala nuu ni, i lisanin ndu.

Ndu co Hala fuɲa nuu ni, i sangalanin ndu.

3Kuubanɔ cɔw bɛndoo pila Mɛlɛka co ni,

diolan ndɔla kpeekpeilan aa: ‹Mɛlɛka›.

4O miisuu ɲɛla ɲaanannda Faraɔnnɔɔ, la soa nan-ndan

a vanaa ndɔa cɔwva o mɛmma ihɛlma makpɛ̀ndɛ̀an nin.

Vanaa ndɔa caa cɔwvo taw-taw-va

lo o mɛmma ihɛlma makpɛ̀ndɛ̀an nin,

5má toal o limndon nin di,

mí mɛnndan má kumbu nda.

A kɔ cal lɛŋ o peo kɔllo maa pow.

6Mɛlɛka, ba nɔm kɛndɔɔ cɔm kpaaya nɔmndo.

Mɛlɛka, ba nɔm kɛndɔɔ kposoŋa yaamɔaa nɔmnda.

7A bɔɔbɔɔyɛi nɔmnde, má yɔliyɔli yaamɔaa nɔmnda,

mí kɔl nɔm tuwvo loam nda,

má ŋɔa mɛɛ foeende ŋɔa nuaa yɛ.

8Mɛɛ n yoomu fúù, mí mɛnndan má diwnun kundalan,

mí ma kiolu, mí tindian ma sim maa lakpaki.

Mí mɛmma biiŋuanndan ma sim kpɛ́ o pee kɔllo.

9Yaamɔaa naa ndáà cii nin dimi aa:

‹N kɔnnun nda kɔɔli, mì n kɔ biinun nda.

N kɔ puunun nda ɲɔɔn o laba a paa-kala,

mì n dennun mun háá mì n pimnun kukúú.

N solin mɔɔn cɔwvon mì n kɔ diwnun nda.›

10Kɛ nɔm Mɛlɛka, mɛɛ n hɔŋ hoeyii nɔmnde,

mì mɛnndan ma kumbu nda kpow,

má mɔɔva o mɛmma ihɛlma yingilan nin maa ciliŋii dingɛn.

11Mɛlɛka, hala kuɛɛ co yɛ maa nɔm o halaa tɔ̀a tɛɛn?

Nɛ̀ɛ́ co yɛ o diandaa maa nɔm?

Kpúlúnkùma tosa sɔɔn tɔ́ɔ́ bɛndon-ndo n co ni.

Nɛ̀ɛ́ tosà yɛ kaamaalan maa nɔm?

12Mɛɛ n siɛndi baa,

mí lɛŋnden le mial yaamɔaa naa.

13Le tùú n lò o lediom coo-o,

má sim yungu n baŋa hoo-o laci.

Má yaa nda o calta nɔmnda diandaalan

a kpaaya nɔm bɛndoo.

14Vanaa-mangalaa-isɔɔa tuei dɛnɔɔ ho,

má ɲiiya a siòònde.

Misìmisí bɛndu-bɛndoo bii vanaa co icali Filistii-a.

15Simlacia Edɔm bɛɛ a yɔŋnun yulan-yulan a siòònde.

Kɔltan la hiilun cuavaa lemasaa Moab nin voku-voku.

Vanaa co icali Kanaan-nda bɛɛ fula mayoomu.

16Siòònde a kɔl pulan-pulanndo tol nda kpow coo.

Mɛlɛka, a kpaaya nɔm bɛndoo,

ma mingi nda maa pow

háá mí yungu nɔmndo cuu hiovɔɔ,

yungu n sɔla-o pɛɛn.

17A co lakɔ a nda,

ma kɔ tɔl nda o pembii nɔmii kɛ́i coo,

o fonda n bɛɛndiaa mò va calta nɔmndan-ndo pɛɛn.

Òó Mɛlɛka! A co nda yɔɔ

háá o cɛi-kola-toandaa diandaa n tangul-lo nin.

18Mɛlɛka co masaa le fɛɛn a fɛɛn ni.»

19Mí soa Faraɔnnɔɔ, ɲɛla ɲaanannda ndɔla soa nan-ndan a vanaa ɲaanun soa-a kpow a lo o mɛmma ihɛllan nin. Mí Mɛlɛka ɲindu nda mɛnndan coo, kɛ mí Israɛlla nda taŋnun a pelon n'vesɛi sɛ́ɛ́n. 20Mí Miriam#15.20 Miriam: Yemaa Aarɔn nda Moise Miriam va ni (Fulaa 2.4-8, 15.20-21)., yemaa Aarɔn, ó va vanalanɔ-tɛɛngaa-diom Hala-o-o cua dundoo, mí vanlaandua tɔ̀a kpow a fula ndu kɔɔli a dundulan lɔɔ a á yolan. 21Mí Miriam cua condei aa:

«La lisa Mɛlɛka o condei nin,

kani o cɔm biilu ndɔɔ ceen vakpa.

O miisuu soa a vanaa ɲaanun o soa coo-a

o mɛmma ihɛlma makpɛ̀ndɛ̀an nin.»

CƆNƆNNDO O MƐMMA IHƐLMA MAKPƐ̀NDƐ̀AN LE KƆLAN O PEMBEI SINAI

(15—18)

Israɛlla kol mɛnndan Mara

22Mí Moise faŋan a Israɛlla o mɛmma makpɛ̀ndɛ̀ma man ikɛi, má kɔa a ba lɛŋnde veselɛilen Sur. Má kɔa o lɛŋnde veselɛile len nin háá palɛi ndii yáá, a ci mamɛn te. 23Má tiiya Mara, má komal mɛnndan ndon, kɛ a nɔla man kolɔɔ le, kani maa lol bɔɔ. Lelan nda ke fonda kon diolan ni aa Mara (kon co dimio ni aa «Ɲɛ loloo»). 24O kon, má soaa sɔɔn pɔmbɔn a Moise, má ɲuna aa: «Yɛɛ naa n co yɛ niko kolɔɔ?» 25Mí Moise piɛi Mɛlɛka, mí Mɛlɛka cɔm ndu yɔmndo súúo pum. Mí Moise mal yɔm kon o mɛmma man nin, mí ma muungu makɛndɛ le kolɔɔ. Lon Mɛlɛka yɔngu nda silalan ni, mó cɔm nda ɲɛ nda bɛnda le tosaa-o. Lon koni o tɔɔndan nda vɛlɛ ni. 26Mí Mɛlɛka dimul nda aa: «Te la bii pɛ diom nuu, ya Mɛlɛka, ya co Hala niaa-o, te la kela pɛ kela sandaa ya o hɔl, te la yaŋ pɛ nilan o silala nilan mì la bii lan kpow, i tuisinin niaa nààla ya tuisi Esiptea coo lan coo le, hali naa vaa lende o pilɛ o tulnin niaa coo le. Kani ya co Mɛlɛka ni, ya nɔ siongɔɔ niaa o ba ni.»

27O kon mí Israɛlla tiiya o lɛŋnde Elim-nden nin, má komal peela leboltan tɔ́ a latiɔn a vawvan belaŋɔmmɛw lon. Má kila dɔ́ɔ́ngɔ́ɔ̀ lon o mɛnndan ikɛi.

Currently Selected:

Fulaa 15: BKG

Highlight

Copy

Compare