Fulaa 16
16
Mɛlɛka dɔw Israɛlla balo a siasoa a á ɲɛdiaa nda veelu aa manne-o
1Mí Israɛlla kpow faŋan Elim, cɔnɔn ndaa Esipte, ndáà tosa nin paangei pilɛ a palɛi tɔ́ a iŋuɛɛnu, má tiiya o lɛŋnde veselɛilen Sin nin, le co Elim a Sinai tɛɛn-nden. 2Mí nda kpow soaa sɔɔn pɔmbɔn a Moise nda Aarɔn o lɛŋnde veselɛile len nin. 3Má dimul nda aa: «Àá! Ndóò naŋ mì Mɛlɛka ndóò diw naa o lɛŋnde Esipte len nin, telen naa n vannun icali o kpɛɛnɛn naan va n'piaa a vision-ndon ikɛi-yo, telen kon ɲɛdiaa vannun naa o ba taw. Kɛ mí la kɔ faŋa naa lon le hunɔɔ a naa o lɛŋnde veselɛilen nden nin, haliko mi n hun cuu vu kpow a yiaan.»
4O kon mí Mɛlɛka dimul Moise aa: «Tofa vɔ, i co niaa ɲɛdiaa tuisi coo fulaa o halataala. Vannda vanin fulaa lepalaa-lepala, mà va ndu cɔwviaa mɛɛ o tiw le paale len yɛ. I co vɔ nda tɔɔndan lende, haliko mi sina taa biinin silala nilan, te kon te taa biinin ndan te. 5Paale ŋɔmpumndɔlen, taa bɛɛndiaa pɛ o nda cɔwviaanin ɲinkon-ndo, o vanin le o nda cɔwviaa lepalaa-lepala-o bɛmbɛ lediin.» 6Mí Moise nda Aarɔn a dimul Israɛlla kpow aa: «Dɔ́ɔ́ cɔɛllɛn, la sinanin maa Mɛlɛka soli niaa o lɛŋnde Esipte len nin ni. 7Nduyɛ siɔdii, la canin biilu Mɛlɛka-o vakpa. Kani ndu pila tuei niaa sɔɔn pɔmbɔn dimio a ndu. Bau yɛɛ naa naa n co yɛ mì la soo sɔɔn pɔmbɔn a naa?» 8Mí Moise dimi aa: «La canin biilu ndɔɔ telen ndu Mɛlɛka yɔngunin niaa cɔɛllɛn vision le dioo-o, telen o yɔngunin vɛlɛ niaa ɲɛdiaa taw-taw siɔdii-o. Kani Mɛlɛka tuei sɔɔn pɔmbɔn niaa soo a ndu-on. Naa naa, yɛɛ naa n co yɛ? O co a naa le niaa soo sɔɔn pɔmbɔn te, kɛ a Mɛlɛka pila.»
9O kon kɔɔli, mí Moise dimul Aarɔn aa: «Dimul Israɛlla kpow mà sɔɔnguu Mɛlɛka o hɔl, kani o tuei sɔɔn pɔmbɔn nda co sɔɛi a ndu-on.» 10Tuma Aarɔn va sɔɛi o Israɛlla kpow lo-o, mí Israɛlaa kan muli hɔlla ba lɛŋnde veselɛilen, mí biilu Mɛlɛka-o cɔmnun nda o kumnde nin. 11Mí Mɛlɛka soaa o Moise lo, mó dimul ndu aa: 12«I tuei sɔɔn pɔmbɔn Israɛlla soo-on. Lelan, soo o nda lo mà dimul nda aa: ‹Cɔɛllɛn, la co vision dio, mì la de vɛlɛ ɲɛdiaa siɔdii. O kon la sinanin maa ya co Mɛlɛka ni, Hala niaa pɛɛn.›»
13Icɔl kon, mí siasoa fula, má coŋ nda coo o dɔ́ɔ́ngɔ́ɔ̀ nin taw. Idiiyo, mí mɔ́mndo kɛsi kɛmndan kpungban o dɔ́ɔ́ngɔ́ nda kon balɔɔ pindo. 14Mɛɛ kɛmma man ma vesa, mí ɲɔɔ pum lo lɛŋ o fonda kon maa n'bulubulu, vanáà ce ndu pɛ aa mɛnndan ma liimian kpungban pɔmbɔn ni. 15Mɛɛ Israɛlla ce ɲɛ kon, má va ɲuunianndo vellaa-velle aa: «Yɛɛ nɛ co yɛ hoo?#16.15 Yɛɛ nɛ co yɛ hoo?: O hebrei nin, ɲunaa ho velan a diola ɲɛdiaa ho. Kani nuaa Israɛlla ɲuna ni aa «Mann hu?» Kon co dimio ni aa «Yɛɛ nɛ co yɛ hoo?». Lelan ɲɛdiaa kon sɔla diolan ni aa «manne».» Kani ndáà sina ɲɛ va kon-ndo le. Mí Moise dimul nda aa: «Ɲɛdiaa Mɛlɛka yɔngu niaa le dioo-o co hoo ni. 16Lelan, ɲɛ ndu Mɛlɛka pila dimul niaa le tosaa-o co hoo ni: vana-vana cɔwviaa mɛɛ o nɔla mò pim yɛ. Vana-vana nɔla mò kɔndu le litilio lehiɔɔlu le ndu pilɛ, o kon mì la kɔndu mɛɛ vannda co o cɛi-kola-toandaa pilɔɔ nin yɛ.»
17Mí Israɛlla tosa lende, mí a pum kɔandu hiovɔɔ mɛɛ Mɛlɛka dimi yɛ, a pum a tiiya kɔndɔɔ lende le. 18Kɛ mɛɛ nda tuu o nda kɔndu-o, mí nda kpow a sɔla kpen-kpen. Vanaa kɔndu taw-va, ɲɛ hiw lecoo le. Vanaa suili kɔndɔɔ lende le-a, mí o ndaa sul lende kpafii. Mí vana-vana sɔla mɛɛ o nɔla mò pim yɛ.
Tɔŋndan a ɲɛdiaa manne-o o kɔɔ
19Mí Moise dimul nda aa: «Vana-vana manda ɲɛ-ɲɛ le siɔdii le.» 20Kɛ a pum bii sɔɛi ndɔɛi le, má manda le diimandɔɔ. Mí càá luɛi o ɲɛ nda manda kon-ndo nin háá mó fula cun vɔɔndo kuí-kuí. O kon, mí Moise tambu kɔl a vanaa kan. 21Idii oo idii, a va ɲɛdiaa kon cɔwviaa, vana-vana va cɔwviaa mɛɛ ndóò nɔla pumndo yɛ. Te paalen léè kendu pɛ, ndóò pɔya, ndóò tenga.
22Paale ŋɔmpumndɔlen, má kɔandu mɛɛ nda dema kɔndɔɔ yɛ bɛmbɛ lediin. Mí vana-vana kɔandu le litilio leŋɔmaa. Mí vanaa lebolla nda tɛɛn a hun downun Moise kona. 23Mí Moise dimul nda aa: «Ɲɛ Mɛlɛka dimul naa kpéŋ-kpéŋ le tosaa-o co hoo ni: siɔdii, paale pɛngiaalen le co ni. Paale pɛngiaale dindin mí le kɛsin teengen le Mɛlɛka len le co len ni. Lelan, ɲɛdiaa niaa bɛnda le toosiaa o cɛi loamaa buloo nin-ndo, la toosiaa ndu hau, ɲɛdiaa niaa bɛnda le yawvo-o, la yaw ndu hau. O niaa nɔ vɛlɛ o kon kɔɔli-o bɛɛ, la manda ndu ɲɛkɛndɛi le siɔdii.»
24O kon, má manda ɲɛ tɔ̀u ɲɛkɛndɛi háá diimandɔɔ idiiyo maa mɛɛ Moise dimul nda yɛ. O nda manda kon-ndo, o fula cun te, càá luei vɛlɛ lenin te. 25O kon, mí Moise dimul nda aa: «La dio hau ɲɛ niaa manda-o, kani paale pɛngiaalen le co hau le Mɛlɛka ni. Lelan, la kɔ bɛɛ hau, la seelunnin ɲɛdiaa kalaa le. 26Kani o palɛi ndii ŋɔmpum bɛngu, la tiwba mì la cɔwviaa ndu, mì la de. Kɛ paale ŋɔmmɛwndɔlen, paale pɛngiaalen le co len ni, lelan la cinin ndu le.»
27Kɛ o nda tɛɛn, mí vannda pum a fula o paale ŋɔmmɛwndɔlen coo le kɔlan ɲɛdiaa kon cɔwviaa, kɛ a seelun ɲɛ-ɲɛ le. 28O kon mí Mɛlɛka ɲuna Moise aa: «Lɔ́ɔ́ kuɛɛ kpeekpei niaa bii yɛnin silala nilan a tɔŋnda nilan? 29La sina maa ya Mɛlɛka, i yɔngu niaa paalen le pɛngio, lelan ya yɔngu niaa ɲɛdiaa le palɛi ndii ŋiin o paale ŋɔmpumndɔlen coo ni. Le hee, o paale ŋɔmmɛwndɔlen coo, vana-vana bɛnda mò lo o cɛi-kola-toandaa ndɔɔ nin, vana-vana bɛnda mò fula o ndu lo le.» 30O kon mí nda kpow a pɛngi o paale ŋɔmmɛwndɔlen coo.
31Mí Israɛlla ke ɲɛdiaa kon diolan aa manne (kon co dimio ni aa «Yɛɛ nɛ co yɛ hoo?»). Ndóò velan taw a kulun tɔlɔɔ koriandre, ɲɛdiaa kalaa yeelaa maa dɛɛ nda toaŋ a lɛan-ndo.
32Mí Moise dimul nda aa: «Ɲɛ Mɛlɛka dimul niaa le tosaa-o co hoo ni: la kɔndu ɲɛdiaa ho litilio lehiɔɔlu, mì la manda ndu ɲɛkɛndɛi le cuavaa niaa imamaa fɛɛn-fɛɛn, haliko ma hun sina ɲɛdiaa ya yɔngu niaa le dioo telen ya soli niaa o lɛŋnde Esipte len nin-ndo-o.» 33Mí Moise dimul vɛlɛ Aarɔn aa: «Cua bonyei ma vow manne lenin letilio lehiɔɔlu, mà kɛsi ndu Mɛlɛka o hɔl, haliko mo va o mandaa kpáŋ le cuavaa niaa imamaa.» 34Maa mɛɛ Mɛlɛka pila dimul Moise ndi yɛ, mí Aarɔn kɛsi ndu o mandaa kɔ́dɔ́ o kesu kpemaa hɔl-ndɔ.
35O vɔsilan belehiɔɔlu bɛngu Israɛlla de manne ni. A lo ndu dioo háá má tiiya o pɛɛngulan a lɛŋnde Kanaan-nden. 36Fɔ mì vanáà tuu ɲɛ tuvaa ndáà tuu le sɔlaa litilio lehiɔɔlu-o tɔ́ malan ndóò pia ɲɛ tuvaa nda dema tuu-o ca.
Currently Selected:
Fulaa 16: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
