Amɔs 8
8
Vundule hiɔɔlundɔlen: Kambɛi yɔmii koamaa
1Mí Maalii, o co Mɛlɛka-o cɔm ya vɛlɛ vundulen nden:
Mí ca kambɛiyo o piaa cá a yɔmii koamɛi diuvɛi.
2Mí Mɛlɛka ɲuna ya aa:
«Amɔs, yɛɛ nɛ n co yɛ cɔu?»
Mí muli aa kambɛiyo ya co cɔu
a yɔmii koamɛi diuvɛi lenin ni.»
Mí Mɛlɛka dimul-la aa:
«Mɛɛlulan la tiiya le vanaa nia,
cuavaa Israɛlla pɛɛn,
i hiw lɛnin laci a nda hakio malɔɔ le.
3Paale len, caŋndan la vanin
condon o cɛi lemasaa nin ni.
Lende ya Maalii, ya co Mɛlɛka-o dimi ni.
A vanin vanvílɛ́iya taw-taw viovɔɔ nɛɛ-nɛɛ ka
o mei bɛndoo nin kpili-kpili.»
Yulaa nɔ hɔlte ɲɛ-sɔlaa-a mal kpundɔɔ
4La yaŋ nilan o sɔɛi he,
niaa co vanaa ikɔɔa bɛpɛlaa,
mì la va yeemaa le nda ciiyo tɛɛmbuuo o lɛŋnden coo-a!
5La co dimio aa:
«Lɔ́ɔ́ kuɛɛ kafo paangii sɛnɛiyo co yɛ cuvɔɔ,
haliko mi n kɔ muungu malun naan pisio?
Lɔ́ɔ́ kuɛɛ nɛ kafo paale pɛngiaa ho co yɛ nin cuvɔɔ,
haliko mi n kɔ kumbi kondala naalan
le malun naan muungoo pisio?
N co panilan bɔɔfiàà mì la dɔɔnan,
mì n cɔɔlu vɛlɛ maalon báà heelu,
n co ɲɛla tuvaala n'ɲɛlan mangaliaa le vannda palaa.
6O kon kɔɔli, n piandunin vanaa ikɔɔa a volion,
mì n pendu vana bala fondoo o pilɛ o samtalan bɛngu.
Hali kefun n'mallon, n pisinin mun.»
7Lelan, Mɛlɛka mɛnan a lɛŋnde
yungu Yakɔb-o tiindan-nden aa:
«Le fɛɛn a fɛɛn, i pɔɛɛnunnin dɛnnda ndalan o pilɛ le.»
8Le hee, lɛŋnden le hiilunnin,
mì dɛnɛ palaa tol vanaa co icali lenin-nda coo.
Lɛŋnden le dɔawnunnin yɛɛvɛ,
mì le hel fúkɛ̀-fùkɛ̀ mɛɛ pee bɛndoo Nil hun nuaa,
mì mɛnndan ma fula fasaka-fasaka yɛ.
Le biiŋun pɛ lende, le toalnin vɛlɛ
maa mɛnndan o peo bɛndu kon Esipte.
Paale dɛnɛ palaalen
9Diom Maalii, o co Mɛlɛka-o dimi-o co hoo ni aa:
«Paale len, paalen le delnin a telen paale kalaa,
mì tuisi ɲumndan o lɛŋnden coo ipalaa déŋ.
10I mangalanin kafola niaalan dɛnnda palaalan,
mì mangala condun niaan caŋndan.
I tosanin mì vannda kpow
a yiwnun volɔɔla biisilan o caŋ,
mì vannda kpow a sendin tembeltan.
I tuisin lɛŋnden dɛnɛ palaa coo
mì ɲɔɔ siŋnun maa biisi pole pilɛ.
Kon kpow mɛɛlunnin maa paale sanga bɛndu.
11Maalii, o co Mɛlɛka-o dimi aa:
«Tofa vɔ, palɛi pum co hunɔɔ tiiya,
i tuisinin yima fofolan o lɛŋnden nden coo.
Yima man yɛ, o venin pɛŋnde ɲɛdiaa le,
o venin pɛŋnde mamɛn te.
Kɛ yiaan a bolola vesɛilan
le sɔɔn Mɛlɛka-on tueyɔɔ.
12O kon, vannda vanin heeloo
a tuusoo o mɛmma ihɛllan,
a cɛn pɛ o man a kɔɛ o mapilɛan,
a vanin cɔnɔnndo a ba luaŋ-ndo,
mà va kɔlan a ba paalen le can-ndo,
a vanin kɔlan ba-ba fee
le sɔɛi Mɛlɛka-e nuwviaa,
kɛ a seelunnin ndi le few.
13O palɛi ken nin, cuaambɔa laandua kɛndɛ-kɛndɛa,
a poambɔa piaandua ɲawnin
a bolola vesɛilan le mɛmma lepɛŋndan.
14A co kan mɛnanndo a hakio Samari,
má va dimio-a aa:
«Le hala nɔm yoomaa, Dan…!
Le nɛi diandaa yaa vana Bɛɛr-Seba-o…!»
Nda kpede, a co delɔɔ,
à cen ndɛnin isisi le.
Currently Selected:
Amɔs 8: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
