Amɔs 7
7
VUNDUMA AMƆS CE-AN
Vundule taselen: sóónɔa
1Ɲɛ Maalii, o co Mɛlɛka-o cɔm ya
o vundulen nin-ndo yɔŋnun hoo ni:
O va sóónɔa taw-taw bɛɛndiaa
telen billo kandu muungoo vulɔɔ-o,
telen nda kelu bil tasoo le masaa-o hiovɔɔ
bil kon koma kandu vulɔɔ ni.
2Mɛɛ sóónɔa kan cii bil va
o lɛŋnden coo-o dio, mí dimi aa:
«Éé Maalii, Mɛlɛka, mal naa haki yandi!
Te kon te, vɛ̀ɛ̀ cuavaa Yakɔb-a
nɔla yɛnin mà lo yoomu,
nda co haa sɛ́lɛ́ le-a?»
3O kon mí ɲííye bii Mɛlɛka,
mó mangala yiyanndo,
mó dimi aa: «Ken tosannin te!»
Vundule diinndɔlen: Yinnden
4O kon kɔɔli, ɲɛ Maalii, o co Mɛlɛka-o cɔm ya
o vundulen nin-ndo yɔŋnun hoo ni:
Mí Maalii, o co Mɛlɛka-o va yamɛi kiolɔɔ a yinnden.
Mí yinnde len le va soon bɛndu-bɛndu
co o lɛŋnden bɛngu-o lomɔɔ.
5O kon, mí dimi aa: «Éé Maalii, Mɛlɛka!
Pɛngi hee tosaa, yandi.
Te kon te, vɛ̀ɛ̀ cuavaa Yakɔb-a
nɔla yɛnin mà lo yoomu,
nda co haa sɛ́lɛ́ le-a?»
6Le hee, mí ɲííye bii Maalii, Mɛlɛka pɛɛn,
mó mangala yiyanndo,
mó dimi aa: «Hee bɛɛ tosannin te.»
Vundule yàándɔlen: Yoole tuvaa cɛilen
7O kon kɔɔli, mó cɔm vɛlɛ ya vundulen nden:
Tofa vɔ, Maalii va isisi
o cìì cɛi cɔwnun a yoole tuvaa cɛilen-ndo coo,
yoole tuvaa cɛilen le va ndu o ba.
8Mí ndu Mɛlɛka ɲuna ya aa:
«Amɔs, yɛɛ nɛ n co yɛ cɔu?»
Mí mulul ndu aa:
«Yoole tuvaa cɛilen ya co cɔu ni.»
Mí Maalii dimul-la aa:
«I co yoole tuvaa cɛilen malɔɔ vanaa nia tɛɛn,
cuavaa Israɛlla pɛɛn.
I hiw lɛnin laci a nda hakio malɔɔ le few!
9Sooluula cuavaa-imamaa Isaak-a la co itambu,
mì cɛila biilaala cuavaa Israɛlla la puusian.
I cannin mì kuel polale Yeroboam-nden a mɔɛi cɔwve.»
Vana-solia-lasálàá Betɛl tosal Amɔs yalalen
10O kon mí Amasia, ó va vana-solia-lasálàá Betɛl-lo yaa congɔnndo o Yeroboam va masa Israɛlla-o lo, le ndu dimullo aa: «Amɔs yii nɔm dúmbú cuavaa Israɛlla tɛɛn. Lɛŋnden le cɛl lɛnin le nilan yaŋɔɔ o sɔɔn o co dimio-on te. 11Kani nuaa o co dimio ni aa: ‹Mɔɛi cɔwve co Yeroboam diyɔɔ ni. A biinin Israɛlla mà kɔɛ a nda o cɛlen nin lɛŋnde ndalen levil polon.›» 12O kon kɔɔli, mí Amasia kon dimul Amɔs aa: «Nɔm vana caa mavundoo ho sei! Faŋan nanu few-few mà kɔɛ. Ɲaanun mà muungu o tàndá Yuda-o nin. A nɔla mà kɔ va ɲɛdiaa nɔmndo sɔlaa lon o sɔɔn Hala-on tɛɛnguuo nin. 13Kɛ tɛɛnguu lɛ sɔɔn Hala-on on Betɛl nanu le dɛ! Kani cɛi biilaa a cɛi lemasaa co nanu ni.» 14Mí Amɔs mulul Amasia aa: «I co vana-tɛɛngaa-diom Hala le, i co vɛlɛ po vana-tɛɛngaa-diom Hala le. Vana mandaa n'cɔloo a vana buulua n'buumbuuo#7.14 vana buulua n'buumbuuo: O lɛŋnde Israɛl-ten nin, tɔlɔɔ nda tɔal buumbuuon ni. Buumbun yondoninndon va vɛlɛ. Te buumbuuo ndóò kom pɛ, ndáà buuluu kɔmnde len, haliko mi ɲaa huulua pum ndaa luɛi lenin le mun yalaa divio. Cɔlua ndáà dɔaw balo a mun ni. Baala kon Amɔs ndóò tosa ni. ya co ni.
15Kɛ o cɔlua kan mandaa nin Mɛlɛka cua ya ni, mó dimul-la aa: «Kɔ ma tɛɛngul vanaa nia, a co Israɛlla-a sɔɔn nun.» 16Lelan, yaŋ niko nilan o sɔɛi Mɛlɛka dimi-e, nɔm co ya hoo kuunaa aa ya tɛɛnguu sɔɔn Mɛlɛka-on a Israɛlla o kɔɔ loo. Nɔm, a kuuna ya aa ya tombola a cuavaa-imamaa Isaak-a o sondo le.
17Lelan, tuei-yɔ sɔɛi Mɛlɛka dimi-e:
‹Laa nɔm luɛinin o suundaa o kobio ho nin.
Poaa nɔmnda a cuavaa nɔmaa laandua
cɛɛlunnin a vílɛ́iya o mɔɛi cɔwve bɛngu.
Yondola nɔmndan la piɔwnunnin a yoolen.
Nɔm pila vunin o lɛŋnde nɔɔlɛilen coo.
Vannda biinin cuavaa Israɛlla mà kɔɛ a nda
o cɛlen nin lɛŋnde ndalen levil pɔ́-pɔ́!›»
Currently Selected:
Amɔs 7: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
