Amɔs 5
5
Condii dɛnɛ palɛi: la mulin o Mɛlɛka lo
1«Òó niaa cuavaa Israɛlla,
la yaŋ nilan o sɔɛi he,
sɔɛi ya co hee dimio niaa coo-e.
Condii dɛnɛ palɛi sɔɛi ken i co ni!
2Israɛlla del, à cen ndɛnin te few!
A co ihini lɛŋ lɛngbɛn#5.2 lɛngbɛn: Ɲɔɔ pɛngɛlan pɛ lɛŋ mo tiw sɔ́ ndu co lɛngbɛn ni. Vanaa pum a dimi aa lɛ́ɛ́siɛn.,
vana-vana co nda cua isisi le.
3Kani nuaa Maalii, o co Mɛlɛka-o dimi ni aa:
‹Kobi vanaa cɔwva va nin vaa pilɛ-o,
n'van kɛmɛ daama a lonin lenin ni.
Ciee vanaa cɔwva va nin kɛmɛ-o,
n'van tɔ́ daama a lonin lenin
le cɛi Israɛlla mandaa ni.›»
La nuwviaa Mɛlɛka mì la tuei yoomoo yeela
4«La tuei-yɔ sɔɛi Mɛlɛka dimul cuavaa Israɛlla-e:
‹La nuwviaa ya mì la va yoomu!
5Kɛ la nuwviaa ya Betɛl te,
la kɔa ya nuwviaa Kilkal te,
la hiaw Bɛɛr-Seba le ya nuwviaa le.
Kani Kilkal biinunnin o cɛlen nin,
Betɛl tambunin few-few.
6Le hee, la mulin o Mɛlɛka lo
mì la va yoomoo,
yɔŋii o tol cuavaa-imamaa Yosɛf-a coo maa leyin
mì yinnde len le tɛɛmbuu nda.
Nduyɛ vana-vana venin Betɛl le len ɲumio le.
7A co lólòó vowvo o yaman kiolɔɔ nin,
a co dɛnɛ sandaa nɛwvo lɛŋ.
8Mɛlɛka cɔw mɔmtombolaa,
ninaa kundaa a nanga-nsiiyo ni#5.8 mɔmtombolaa, ninaa kundaa, nanga-nsiiyo: Loeon kundala yɛ́-yɛ́ɔn nɔ diola lan ni. Mɛɛ loeon diinun kundalan o halataala yɛ nda ke mun diolan ni. Tofa vɔ Yɔb 9.9, 38.31..
Ndu mingi ɲumndan ɲɛ-tengaa paale siaa ni,
ndu piimiaa paalen ni,
mò mingi len ɲumma bɛnduan.
Ndu cuungiaa mɛmma ihɛllan ni,
mò saŋ man o lɛŋnden coo.
Diola ndɔlan aa Mɛlɛka.
9Ndu tuisi dɛnɛ palaa vanaa kpaayaa coo ni,
ndu luei dɛnɛ tambɛiyo
o kobila kungan a kpakio lan nin ni.
10La co nɛyɔnndo tosaa a vana co sɔɛi
le dɛnɛ sandaa o kɔɔsɔɔ nin-ndo,
mì la va nɛyɔnndo a vana dimi toɲaa-o.
11A vɛlɛ, la co vana bala fondoo nɛwvo o lebol,
la co ndu malun ndɔn poondaa o ba a paa-kala.
Lelan, cɛila niaa tangul tan a powtan-ndan,
la luenin lenin te few.
Rɛsɛŋun kɛndɛ-kɛndɛn niaa tɔl mun-ndon,
la kolnin mɔima ndɔan te.
12Kani i sina maa yɔŋnda vɔɔnnda niaalan la co labɔɔ,
hakila niaalan la kui taw-taw.
La co vanaa sandaa mɔnɛi lueiyo,
La co luɛyɔɔninndo cɛlɔɔ,
mì la va dí vanaa bala fondoa tɛɛmbuuo
o fonda kialaa n'yamaa.
13Lelan telenndo ho,
vana nɔ taasio-o, meinɔnndo o meinun ni kpili.
Kani telen vɔɔndo telenndo ho co ni.
14Le hee, la kindin mì la tosa dɛnɛ kɛndɔɔ,
la tosa dɛnɛ vɔɔndo le,
haliko mi la lo yoomu.
O kon, mì Mɛlɛka, Hala-Nɔ-Kpaayaa-Kpow-vo va niaa ikɛi,
maa mɛɛ niaa pila co dimio yɛ.
15Dɛnɛ vɔɔndo nɛinún niaa, mì dɛnɛ kɛndɔɔ hɛnan niaa!
La tosa dɛnɛ sandaa nɛɛ niaa kialu yaman
o dio kpaki kobio nin-nda.
Bɔɔle mì Mɛlɛka, Hala-Nɔ-Kpaayaa-Kpow-vo
tuinun vanaa tɔ̀a lo yoomu
o polale Yosɛf len coo-a iɲíí.
16Lelan, nuaa Mɛlɛka, Hala-Nɔ-Kpaayaa-Kpow-vo,
ó co Maalii-o dimi ni aa:
‹Vannda somisominnin o fondalan kpede,
o nɛila bɛndulan kpow coo,
vannda vanin koŋullo aa:
Kpòkóó mɔnɛi! Má cè dɛnɛ palaa dɛ!
A veelunin vanaa vàá o dɛnɛ biisio,
mà veelu vanaa caa caŋndo-a
le kɔlan condun biision solio o caŋndo nin.
17Lɔ́ɔ́ ya keinin niaa tɛɛn-ndo,
vannda cɛɛŋunnin o nakɔla n'rɛsɛnndan kpow nin.
Ya Mɛlɛka dimi lende ni.›»
Paale maɲumnden
18«Dɛnɛ palaa co nda cum,
vanaa yeema le paale Mɛlɛka len cɔu-va!
Le kɔlɔ yɛɛ niaa co yɛ len yeemaa?
Yɛɛ niaa sɔ̀là yɛnin o paale Mɛlɛka len coo nɛ?
Nduyɛ, paale maɲumnden paale len le vanin ni,
le venin paale ɲɛ-tengaa le.
19La vanin paale len mɛɛ vanndo ɲaanun yàlàá,
mò kɔ bɔŋan vɛlɛ a kɔ́lɔ́vúloo nuaa yɛ,
te kon te, o ɲaanun pɛ
mò kɔ luɛi o ndu lo cɛinin,
mò handu baa o cìì cɛiyo, kɛwvo lɔva ndu.
20Vɛ̀ɛ̀ paale ɲɛ-tengaalen pá
paale Mɛlɛkalen le co ni?
Vɛ̀ɛ̀ o co paale maɲumnden te le co le?
A toɲa, paale yimyimnden le co ni,
le co paale pangele le.»
Kaanden nɛinún Mɛlɛka len
21«I hini lɛ kɔl a kafola niaalan te,
la fula ya iyeema po-po!
I yeema lɛ bɛɛ mì tuei
cuungiannda niaalan tɔ́ɔ́ le few.
22La solul-la nin bɛɛ sálàla loamaalan,
la cuunin ya bɛɛ sálàla kpeyanndan,
i cɛl-lɛnin ndan te,
i yeema lɛ mì ce cɔlua celulaa
niaa co kan diyɔɔ le ya
sálàla kɔlɲululan solullo-a le.
23Lelan, la faŋan ya ikɛi
a vɔkɔ-vɔkɔ n'condu niaa ho.
I yeema lɛ mì tuei bangala niaalan diom te.
24Kɛ i yeema mì dɛnɛ sandaa va tosanndo
mɛɛ mɛnndan ma hiaw nuaa yɛ,
mì sɔɔn va tosanndo sakpo
mɛɛ mɛmma pee pɔmbɔan
ma hiaw a yoomuan nuaa yɛ.
25Niaa cuavaa Israɛlla sei!
Mò va maa sálàla n'cɔlulan
a sálàla kpeyanndan niaa va ya solullo
o vɔsila belehiɔɔlula niaa cii nɛi-tɛɛn
o lɛŋnde veselɛilen nin-ndan bɛngu ni?
26Kɛ mí la cua Sikut va masa niaa-o le kelaa a ndu,
mí la cua vɛlɛ Kiyun piɔm niaa,
a loei halaa kan, a niaa pila cownun-nda.
27Lelan ya bɛɛ cuanin niaa ni
mì yɛɛ niaa o biyɔɔ nin Damas lekɔɔli.
Lende Mɛlɛka dimi ni.
Diola ndɔlan aa Hala-Kpaayaa-Kpow-vo.»
Currently Selected:
Amɔs 5: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
