Amɔs 4
4
Sɔɛi dimulun vanlaandua bolofaa Samari-e
1«La yaŋ nilan ɲɛkɛndɛi o sɔɛi he,
niaa navaa laandua#4.1 niaa navaa laandua: Vanlaandua kɔlvesɛiya Basan Amɔs veelu nanu ni aa «navaa laandua». Basan,
niaa co icali o pembon Samari coo,
mì la va vanaa bala fondoa saangiaa
a vanaa ikɔɔa mɔnɛi lueiyo-a.
La co piaandaa niaa dimullo-a aa:
‹La hun a man mì n kolnun man!›
2Maalii Hala mɛnan o diondɔɔ ndɔɔ nin aa:
‹La tofa vɔ! Palɛi pum co hunɔɔ kei niaa coo,
a sɛɛsuunin niaa a bawla n'cilinndan,
mà cua vanaa hunnin niaa kɔɔli-a o dolinndon#4.2 dolinndon: ciliŋii pɔmbɔɛi vana baa yoolen le suwva biyɔɔ-e. A pum veelu aa: donndon, donnde (ndii pilɛ)..
3La fulanin o tɛɛngun co o kpakio-on,
mà viow vana-vana ndu laci sakpo
a kpengii Hɛrmɔn-nde.›
Lende Mɛlɛka dimi ni.»
Kaannde lacòòvalen
4«La kɔ Betɛl mì la kɔ tosa hakilan!
La kɔ vɛlɛ Kilkal mì la kɔ cɔɔlu hakilan tosa.
La soli sálàlan idii oo idii,
la yɔngu o-tɔ́ndɔ niaa o vɔsi yàándɔɔ coo.
5La lom buloo a lɛvɛnndo
mì la kɔ soli sálàla niaala malaa balikalan ndon!
La yonda mì la heelu diomndo
le sálàla niaa kelu a yeemɛi niɛi lan solio.
Kani ken niaa yeema ni,
niaa cuavaa Israɛlla.
Ya Maalii, ya co Mɛlɛka-o soo nuaa ni.
6Ya Mɛlɛka yɛ, mí tuŋ niaa ɲɛdiaa,
mí la lo sondola fondo o kobila niaalan nin,
mí tuisi niaa yima fofolan coo o calta niaalan kpede.
Kɛ a kon kpow, la mùùngú ya o ibuŋ te.
Ya Mɛlɛka soo nuaa ni.
7Ndóò lo vɔ paangon mún yáá le telen koavaa tiiyaa,
mí tuŋ niaa piɔɔ.
Mí tuisi piɔɔ o kobio o pilɛ coo,
mí kɛɛ le ndu tuisio o kobio pilɔɔ coo.
Mó sia o ciɛi pilɛ coo,
kɛ o se o ciɛi pílɛi coo le,
mí ɲɛm ndáà váá o ciɛi ken nin-ndon vesan a valoo.
8Le hee, mí vannda va cɔnɔnndo
o kobilan tan tiɔn te kon te tan yáá nin
le kɔlan mɛnndan kolɔɔ o kobio ndu pilɛ nin,
kɛ kolɔɔ iyeemaa cuu nda le.
A kon kpow, la mùùngú ya o ibuŋ te.
Ya Mɛlɛka soo nuaa ni.
9Mí tuisi nààla latɔlɔɔlan
o tɔlɔɔla niaalan coo, mí la foofi.
Mí kambalaa sóónɔa dia nakɔla niaalan kpow,
má dia nakɔla niaala n'rɛsɛnndan,
nakɔla niaala n'voosulan
a nakɔla niaala olivieelan.
Kɛ a kon kpow, la mùùngú ya o ibuŋ te.
Ya Mɛlɛka soo nuaa ni.
10Mí tuisi niaa nàà halimaa coo
mɛɛ yáà tuisi ndu Esiptea coo lɔ́ɔ̀ kon yɛ,
mí diw felengia niaa o mɔɛi cɔwve bɛngu,
mí mal yaamɔɔa má bii soa niaa,
mí tosa mí la tuɛi vanvílɛ́yaa siowva cun
o dɔ́ɔ́ngɔ́ niaa nin.
Kɛ a kon kpow, la mùùngú ya o ibuŋ te.
Ya Mɛlɛka soo nuaa ni.
11Mí hiiluu niaa vooku-vooku
mɛɛ ya hiiluu kobio Sodɔm a kobio Komɔr
mí tɛɛmbuu lan yɛ.
Niaa, mí la yɔŋnun vɔngɔɲɔn
maa kili nda soli o yin-ndo.
Kɛ a kon kpow, la mùùngú ya o ibuŋ te.
Ya Mɛlɛka soo nuaa ni.
12Lelan, lende ya co niaa hunɔɔ tosal ni,
niaa cuavaa Israɛlla.
Le tùú ya co niaa hunɔɔ tosal lende-o,
la bɛɛndian le Hala niaa bɔŋaa,
niaa cuavaa Israɛlla.
13Kani la tofa vɔ!
Vana cɔw pembon a hoeiye-o,
vana cɔm vanacieo yiyannda ndɔlan-ndo,
vana mangala ɲɛ-tengaa paale siaa ɲumndan-ndo,
ó co kelaa o pembun co o lɛŋnden coo-on coo-o,
diola ndɔlan aa Mɛlɛka,
Hala-Nɔ-Kpaayaa-Kpow-vo.»
Currently Selected:
Amɔs 4: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
