Amɔs 3
3
Mɛlɛka cɔm vanaa ndɔa tɛɛmbuula ndalan
1«Niaa cuavaa Israɛlla,
la yaŋ nilan ɲɛkɛndɛi o sɔɛi he,
sɔɛi Mɛlɛka dimi hee niaa coo-e,
ì ó dimi hee yungula o soli Esipte lan kpede coo-e.
Nuaa o dimi ni aa:
2‹O yungula co o lɛŋnden coo lan kpow tɛɛn,
niaa pilɛ kpé ya hɛli ni.
Lelan, i co niaa hunɔɔ kɔɔsɔɔ ɲuna
le dɛnnda niaala vɔɔnndan kpow.
3Vɛ̀ɛ̀ vanaa ŋiɔn diam pá nɛiyo latulu
taa cɛlan fɔlɔn te?
4Vɛ̀ɛ̀ yàlàá nɔla pá mo pɛɛliaa o bundɔɔ nin
te o ci ɲɛ o co mɛngɛlaa-o le?
Vɛ̀ɛ̀ yàlà téndóó nɔla pá mo kuuliaa
o bɛ̀mɛ́lta ndɔlan nin te o bii ɲɛ le?
5Vɛ̀ɛ̀ yowvo nɔla pá mo lɔɔnun o kpɛ̀lɔ́ɔ̀#3.5 kpɛ̀lɔ́ɔ̀: yaŋɔɔle yowva kpɛ̀lɔ́ɔ̀ co ni. Le len toosiaa, vana kelu pɛ yɔm n'yɔɔ, a yii yoole vilɛi-vilɛilen ndon, a cucu ɲɛm dian yowva o yɔm kon hɔl-ndɔ. Te yowva tol niko pɛ le ɲɛm dian mun dioo, vana nan yoolen a kalan, o kon yɔm kon lɔɔ yovaa kan, a vi. Vanaa pum veelu yaŋɔɔle yowva a fukpulen.
te o ci ɲɛ o dia-o o kpɛ̀lɛ́ kon te?
Yaŋɔɔlen le nɔla pá mì le biondu a ba ndɔ,
te o co ɲɛ le pilan nden te?
6Vɛ̀ɛ̀ vana nɔla mì vana hɔŋ bulu cɔwvo o kobio nin,
mì vanaa co o kobi kon nin-nda kɛɛ ɲiiya?
Vɛ̀ɛ̀ dɛnɛ palaa nɔla mo tol o kobio coo
te o co Mɛlɛka le cɛl te?
7Lende koni i co ni, Maalii Hala tosa ɲɛ-ɲɛ
mò kɛɛ vanaa ndɔa baalaa,
vanaa-tɛɛngaa-diom Hala-a
bulun dɛnɛ kon cɔm te.
8Yàlàá co pɛɛliaa, nɛ̀ɛ́-nɛ̀ kɛɛ yɛnin siòònde yɔŋ?
Maalii Hala co sɔɛi,
nɛ̀ɛ́-nɛ̀ kɛɛ yɛnin sɔɛi Hala-e tɛɛnguu?›
Yamɛi Mɛlɛka kilul Samaria-e
9‹La heelu diomndan mì la yonda taw-taw
o cɛila lemasalan Asdɔd nin
a o cɛila lemasala co
o lɛŋnde Esipte len nin-ndan nin!
La yonda aa:
La cuungian o pembon Samari coo,
mì la ce dɛnɛ laasiɛiyo
a kɔlvesɛi co tosanndo Samaria tɛɛn-ndo.
10À sina mɛɛ vana tosa dɛnɔɔ o sandei nin yɛ le.
Ya Mɛlɛka soo nuaa ni.
A co ɲɛm nda sɔla a kɔlvesɛiyo-on,
a n nda sɔla o delɔɔcoo nin-ndon
cuungiaa kundala bɛndulan
o cɛila lemasala ndalan nin.
11Lelan, Maalii Hala dimi aa:
Yaamɔɔ hun balunin lɛŋnden,
mò tɛɛmbuu yoomuma niaan,
mò yunga cɛila niaala lemasalan!
12Nuaa Mɛlɛka soo ni aa:
Mɛɛ vana mandaa n'cɔloo
soli bɛngula tiɔnnda saa,
te kon te nile hɔlte saa yàlàá o sondo yɛ,
lende koni Israɛlaa vanin icali
o kpɛŋɛla sɔlɔbɔlɔɔlan nin,
te kon te o kpelelan coo
Damas o tàndá Samari-o nin-nda
hialunnin yaamɔɔ ndaa ni.
13La yaŋ nilan mì la tɛndal cuavaa Yakɔb-a
seilen a sɔɛi he o kɔɔ.
Kani ɲɛ Maalii Hala,
Hala nɔ Kpaayaa Kpow-vo dimi-o co hoo ni aa:
14Paale ya soaŋnin Israɛlla le hakila ndalan-nden,
i co ɲinkon mɔnɛ soli a máánndan Betɛl:
À co lan ɲinkon kpɛɔn yimi
mì n deli lɛŋ.
15I koombiaanin cɛila tangulun
le sialten tosaa lenin-ndan
a cɛila nda tangul le vɔɔlen tosaa lenin-ndan.
Cɛila toosiaa ciŋun kamaa lan bɛɛ la tambunin.
Cɛila vanaa bɛndua kpede la koombiaanin.›»
Lende Mɛlɛka dimi ni.
Currently Selected:
Amɔs 3: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
