Amɔs 2
2
Sáálé dimulun Moabua-o
(Esai 15.1, 25.10, Yeremi 48.1, Esekiɛl 25.8, Sofoni 2.8)
1Nuaa Mɛlɛka soo ni aa:
«Le yɔŋnda vɔɔnnda yàála vannda Moab a tosa lan,
le yɔŋnda vɔɔnnda nda tosa háá tan hiɔɔlu lan,
ɲɛ ya kelu le nda tuisio coo-o, i faŋannin lecoo le!
Kani a lom paala masa Edɔmnda kpúlúká#2.1 kpúlúká: ɲɔɔ lomɔɔ háá mo muungu pultan. A pum dimi aa: ŋɔu sukɛi te kon te selemenden.,
mí la siŋnun pultan.
2Lelan, i co lɛŋnde Moab len lomɔɔ
mì yinnden le lom cɛila lemasalan Keriɔt.
Moab tambunin o vóólun-vóólunndo nin,
o vɔkɔ-vɔkɔ cɔwvo nin
a o diom buloo nin.
3I diwnin vana kialaa n'yamaa ndaa,
mì diw simlacia a ndu latulu.»
Lende Mɛlɛka dimi ni.
Sáálé dimulun Yudaa-o
4Nuaa Mɛlɛka soo ni aa:
«Le yɔŋnda vɔɔnnda yàála vannda Yuda tosa lan,
le yɔŋnda vɔɔnnda nda tosa háá tan hiɔɔlu lan,
ɲɛ ya kelu le nda tuisio coo-o, i faŋannin lecoo le!
Kani a pɛɛsa tɔŋ Mɛlɛka-o,
má kɛɛ le silala ndɔlan biyɔɔ.
À laasian o piɔmaa lacòòvaa sooloo nin,
piɔmaa fuɲaa ndaa bɛɛ a sooluu sindɛ-a pɛɛn.
5Lelan, i co yinnden malɔɔ mì le lom tàndá Yuda-o,
mì le lom vɛlɛ cɛila lemasalan Yerusalɛm.»
Sáálé dimulun Israɛlla-o
6Nuaa Mɛlɛka soo ni aa:
«Le yɔŋnda vɔɔnnda yàála Israɛlla tosa lan,
le yɔŋnda vɔɔnnda nda tosa háá tan hiɔɔlu lan,
ɲɛ ya kelu le nda tuisio coo-o, i faŋannin lecoo le!
Kani a co vanaa sandaa pisio le volion,
ma va vanaa bala fondoa pisio o samtalan bɛngu.
7A nɔ yeemɛi taw le cundu co lɛŋ-ndo
cɔu vanaa ikɔɔa o lebol.
A co dí vanaa co o sangaa nin-nda tɛɛmbuuo,
Poo nda fuɲaa co kɔlan suundaa a vanalanɔ pilɔɔ.
Lende nda co diola nila diandaalan
bɛɛlan tɛɛmbuuo ni.
8A co keiyo hinilan o máánndan ikɛi
o volɔɔla nda bii o landei nin-ndan coo.
A co mɔima vanaa nda luei bɔnɔɔ-an kolɔɔ
o cɛila biilaala hala ndaa nin.
9Nduyɛ, nda o hɔl ya diw Amoriia ni,
Amoriaa kan ndáà bandu maa yɔmii sɛɛdre,
ndáà nɔ yoomuan maa iyálán.
Kɛ mí tɛɛmbuu kɔmnde ndalen coocoo a puundun ndan lɛŋ.
10Nduyɛ, ya Mɛlɛka,
ya soli niaa Esipte ni, mí heelu a niaa,
mí sim niaa laci o lɛŋnde veselɛilen nin,
o vɔsilan belehiɔɔlu bɛngu,
haliko mi la hun hiɔlu lɛŋnde Amoriia.
11I hɛli poaa niaa a pum
le siŋnɔnndo vanaa-tɛɛngaa-diom Hala-a,
mí hɛli poaa langbaa niaa a pum
le nda pila sálàá solinndo le vali nuu tosaa.
Niaa Israɛlla, vɛ̀ɛ̀ o co lende le i yɔŋnun te?
Ya Mɛlɛka co niaa ɲunaa nuaa ni.
12Kɛ mí la koesi vanaa solin
kan nda pila sálà-a mɔiyan,
mí la kuuna vanaa-tɛɛngaa-diom Hala-a kan
le diom Hala-o tɛɛnguuo.
13Lelan, i co niaa ciimiaa o foofo,
mɛɛ ɲɛ ɲaanan soa nan-ndo
va o piaa a tumbulan nuaa,
mó ciimiaa ɲɔɔ yɛ.
14Hali vana nɔla kiltan taw-vo bɛɛ
sɔlanin nɛɛ viannannda le.
Hali vana nɔ yoomuan-ndo tiwnin ba
le ɲɛ-ɲɛ tosaa a yoomuma ndɔan te.
Hali kuubanɔ cɔwvo nɔlanin yoomu ndɔɔ baŋaa le.
15Vana caa kpaasiaa hiŋndo-o bɛɛ
nɔlanin simullo le.
Hali vana hiow keleŋaa-o
nɔlanin hiɔlɔnndo le.
Hali vana hiow caa sow ɲaanɔnndo-o nɔlanin yoomu ndɔɔ baŋaa le.
16Paale len, hali kuubanɔ hiow cɔwvo caa-o
ɲaanunnin tum fondo fúú!»
Lende Mɛlɛka dimi ni.
Currently Selected:
Amɔs 2: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
