Amɔs 1
1
Kɔɔsɔɔ co le tiiyaa
1Sɔɔn Amɔs soo-on yɔŋnun mun ni, vana mandaa n'cɔloo pilɛ Amɔs va o vanaa mandaa n'cɔlua Tekoa tɛɛn ni. Sɔɔn o soo mun-ndon cɔmnun ndu a dɛnɛ Israɛlla o kɔɔ tuma Osias masaa Yuda a Yeroboam masaa Israɛl, po Yoas-o a va o masalen coo-o. Vɔsilan tan tiɔn o kon kɔɔli, mí lɛŋnden le ɲiiya.
2Mi Amɔs dimi aa:
«Mɛlɛka co kuuliaa Siɔn.
O co yoondiaa Yerusalɛm a labɛɛla kpeekpei!
Bil puiyaa vanaa mandaa n'cɔlua vesan,
yondo puiyaa vesan o pembei Karmɛl tullo!»
Sáálé dimulun kobio Damas-o
(Esai 17.1, Yeremi 49.23, Sakari 9.1)
3Nuaa Mɛlɛka soo ni aa:
«Le yɔŋnda vɔɔnnda yàála vannda Damas tosa lan,
le yɔŋnda vɔɔnnda nda tosa háá tan hiɔɔlu lan,
ɲɛ ya kelu le nda tuisio coo-o, i faŋannin lecoo le!
Kani a pimbulu vannda Kalaad
o ciliŋun siɛɛmbian#1.3 siɛɛmbian: a pum dimi aa ciliŋun siendi-siendion. coo, má pesipesi nda.
4Lelan, i co hunɔɔ yinnden malɔɔ
o cɛi lemasa Hasaɛl-lo coo,
mì le lom cɛi lemasa Bɛn-Hadad-o!
5I co sɔkɔma nda kinda dio kpakio Damas-an yimiyimi.
I toawnin vanaa co icali Bikat-Avɛn-nda,
mì tow vana co masalen tosaa Bɛt-Edɛn-ndo.
A kɔanin a Aramiia o cɛlen nin háá Kir.»
Lende Mɛlɛka dimi ni.
Sáálé dimulun Filistia-o
(Esai 14.29, Yeremi 47.1, Esekiɛl 25.15, Yɔɛl 3.4, Sofoni 2.4, Sakari 9.5)
6Nuaa Mɛlɛka soo ni aa:
«Le yɔŋnda vɔɔnnda yàála vannda Kaasa tosa lan,
le yɔŋnda vɔɔnnda nda tosa háá tan hiɔɔlu lan,
ɲɛ ya kelu le nda tuisio coo-o,
i faŋannin lecoo le!
Kani a bii vannda sɛ́lɛ́ bɛndoo taw-taw
le nda vɔngullo Edɔmnda o ba.
7Lelan, i co yinnden malɔɔ o kpakila kobio Kaasa,
mi le lom cɛila lemasalan ndon.
8I toawnin vanaa co icali Asdɔd-a
mì tow vana co masalen tosaa Askelɔn-ndo.
I kuelnin vannda Ekrɔn mì diw nda.
Lende Filistia tɔ̀a kpow a cuunin vu ni.
Lende Maalii, o co Mɛlɛka-o dimi ni.»
Lende Maalii Hala dimi ni.
Sáálé dimulun kobio Tir a Fenisia-o
(Esai 23.1, Esekiɛl 26.1, Yɔɛl 3.4, Sakari 9.1, Matie 11.21, Luke 10.13)
9Nuaa Mɛlɛka soo ni aa:
«Le yɔŋnda vɔɔnnda yàála vannda Tir tosa lan,
le yɔŋnda vɔɔnnda nda tosa háá tan hiɔɔlu lan,
ɲɛ ya kelu le nda tuisio coo-o, i faŋannin lecoo le!
Kani a bii vannda taw-taw,
má kɔ vɔngul nda Edɔmnda o ba.
À yiyan le kpema ivanaya co nda tɛɛn
nda puapilɛa ndaa kan-ndo le.
10Lelan, i co yinnden malɔɔ
o kpakila kobio Tir,
mì le lom cɛila kɛndɛ-kɛndɛla co lon-ndan.»
Sáálé dimulun Edɔmnda-o
(Esai 34.5, 63.1, Yeremi 49.7, Esekiɛl 25.12, 35.1, Abdia 1.1, Malasi 1.2)
11Nuaa Mɛlɛka soo ni aa:
«Le yɔŋnda vɔɔnnda yàála Edɔmnda tosa lan,
le yɔŋnda vɔɔnnda nda tosa háá tan hiɔɔlu lan,
ɲɛ ya kelu le nda tuisio coo-o, i faŋannin lecoo le!
Kani a tow puapilɛa ndaa,
má ɲaanun nda kɔɔli a mɔɔn cɔwvon,
má kɛɛ le nda ɲííye tuinɔnndo,
má tuisi nda kɔltuw ndaa coo.
A co kɔl nda fulaa mandanndo nin le lɔ́ɔ́-lɔ́ɔ̀.
12Lelan, i co yinnden malɔɔ
mì le lom kobio Teman,
mì le lom vɛlɛ cɛila lemasalan Bɔsra.»
Sáálé dimulun Amɔnnda-o
(Yeremi 49.1, Esekiɛl 21.28, 25.1, Sofoni 2.8)
13Nuaa Mɛlɛka soo ni aa:
«Le yɔŋnda vɔɔnnda yàála Amɔnnda tosa lan,
le yɔŋnda vɔɔnnda nda tosa háá tan hiɔɔlu lan,
ɲɛ ya kelu le nda tuisio coo-o, i faŋannin lecoo le!
Kani a tɛɛndiaa vanlaandua lafolia Kalaad dembelan
le lɛŋnde ndalen cɔɔloo.
14Lelan, i co yinnden malɔɔ o kpakila kobio Raba,
mì le lom cɛila lemasala co lon-ndan
o vóólun-vóólunn cɔwvo bɛngu,
o paale cɔwlen len pilɛ nin.
La cuunin ŋɔ o felenfelen leyinndo nin
o paale hoeyii fùkù-fùkùlen nin.
15A biinin masa ndaa pila a simlacia ndaa,
ma kɔɛ a nda o cɛlen nin.»
Lende Mɛlɛka dimi ni.
Currently Selected:
Amɔs 1: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
