1Timote 4
4
Silalan le vanaa co pɛɛkula lacòòvalan yɔngoo-a
1Kɔl-Diandaa dimi vakpa maa vanaa pum malnin laalanndo o palɛi mɛɛlɛi, mà del ɲinaa vɔɔŋaa luei vana o pɔwlan nin-nda kɔɔli, mà del vɛlɛ pɛɛkula ndalan kɔɔli. 2A delnin vanaa muuluannda a vanaa lacòòvaa kɔɔli, mà laasian. Vanaa kan yɛ, yiyannda ndalan la co maa mɛɛ ciliŋii tuwve i tɛɛmbuu ɲɔɔ nuaa yɛ. 3Vanaa kan a co vannda pɛɛkoo maa o niŋ mì vana yil lanɔ, te kon te mì vana cal pɔnɔ o ba o nɔ̀u nin te, maa vana dia vɛlɛ ɲɔɔn pum te. Nduyɛ, Hala soli ɲɛm mun haliko mi vanaa laalannda piɛi ndu Hala, mà de mun, mà mel ndu balika, nda vanaa laalaŋaa sina toɲaa-a pɛɛn. 4Nduyɛ, ɲɛm Hala cɔw-von kpow n naŋ. O bɛnda mì n kɛɛ mun dio le, haliko sii n mel Hala balika o mun dioo, 5kani sɔɛi Hala-e a piɛilen le tosà ni mì ɲɔɔn kpow n dendu Hala o hɔl.
Vana baala kɛndɛ Yeesu Krista-o
6Taa yɔngu pɛ puapilɛa silalan ndan, mɛɛ a vanin vana baala kɛndɛ Yeesu Krista-o. A dɔawnunnin balo a sɔɔn laalanndon a á pɛɛku toɲaa, o n del kɔɔli ma lo lecoo-o. 7Kɛ mal talela fondolan, la vanlaandua yuuvɛiya dimi lan ndan, mà kindin ma vo Hala. 8Kani diallon kindio naŋ, kɛ kon nɔ tɔnɔ bɔɔ le. Siòòŋii Hala-e nɔu o dɛnndan kpow nin hiow naŋɔɔ polon, kani kon yɔngu naa tiindanndo sɔlaa le ceendo ho sunsun a le ceen hunnin-ndo ni. 9Sɔɛi toɲɛi co hee ni, i vannda kpow nɔ ma bii-e. 10Lelan, te n co pɛ baalaa mì n va sangaa taw, le tùú naa n tiindan Hala nɔ yoomoo o ba-o ni, o co vana ciindiaa le vannda kpow-vo, kɛ taama-taama vanaa laalannda.
11Ɲɛ n bɛnda le vannda pɛɛkoo a nda silaa-o co kon ni. 12Cɛ̀l mì vana-vana kelun nɔm yii le mɛɛ n co langbanɔ felengoo yɛ le, kɛ va tɔɔmaseloo le vanaa laalannda o sɔɛi sondoei nin, o dɛnndan nin, o kaolaa nin, o laalanndo nin a o dindinndo nin. 13Lɔ́ɔ́ pá ya hun, kindin mà va sɔɛi-Hala-e dimio vannda o hɔl, mà va nda silaa, mà va nda pɛɛkoo. 14Kialun ke Hala ke nɔm-ndo yii le, o n sɔla lɔ́ɔ́ vanaa-tɛɛngaa-diom Hala-a a vanaa bɛndua vanaa Hala-a a handu nɔm balan coo-o. 15Kindin mì nɔm pila yɔngun kpow o baala kon nin, o kon mì vannda kpede a ce mɛɛ n co hiovɔɔ laci yɛ. 16Nɔm pila mandan a pɛɛkula n co vannda yɔngoo lan. Lo lecoo, kani taa tosa pɛ lende, nɔm pila sɔlanin cindaa, mà ciindiaa vɛlɛ vanaa co nɔm nilan yaŋɔɔ-a.
Currently Selected:
1Timote 4: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
