1Timote 5
5
Mɛɛ vana tosa a vanaa laalannda yɛ
1Sɔaa bɛndu yuuvɛiyo a paa-kala le, kɛ soo ndu o lani mɛɛ n sɔaa fuɲa nɔm o lani yɛ. Cɔ langbanɔ felengoo maa puapilɛ nɔmndo, 2mà ce vanlaandua kaasonnda maa kala nɔm, mà ce vanlaandua felengia maa yeemaa nɔmnda, mà dendu nda o hɔl o nɛilan kpow coo.
3Ke vanlaandua piaandaa ndaa vi-a bɛɛlen, a co nda pilɛ lekɛ́ndɛi-ya. 4Kɛ te vanalanɔ pɔnɔ ndɔ vi-o nɔ pɛ cuawva, te kon te mò nɔ cuavaa-imamaa, cuavaa kan bɛnda mà tosa dɛnndan mɛɛ laalan ndaa co yɛ. O kon, a mingi ɲɛ fuɲaa ndaa mamaa tosal nda-o. Kani kon hɛnan Mɛlɛka ni. 5Vanalanɔ pɔnɔ ndɔ vi mò va ndu pilɛ-o, o tiindan Hala-o, paalen a ɲumndan, o co Hala biuvɔnndo piɛiyo le malaa sɔlaa. 6Kɛ vanalanɔ pɔnɔ ndɔ vi mò va yeemɛi ndɔɛi ndu pila-e tosaa-o, maa vana vílɛ́i koni ndu co nin ni, hali o va bɛɛ yoomu. 7Silala n nɔ le nda yɔngoo lan la co lan ni, yɔŋii vannda yaala nda. 8Te vanndo mulul vanaa ndɔa hɔlla le, kɛ taama-taama yungu ndɔɔ, mɛɛ o mal laalanndo, vana vaa lende hiow levɔw a vana laalan too.
9Le diola vanalanɔ pɔnɔ ndɔ vi-o sɛvaa o diola vanlaandua piaandaa vi-a coo, mɛɛ mò nɔ vɔsilan kandɔɔ belaŋɔmpum. Handɔɔ o kon coo, mò va vana kei vanapɔnɔɔ ndu pilɛ o ba o nɔu-vo, 10mò nɔ tɔ́ɔ́ kɛndɔɔ le dɛnnda kɛndɛla ndɔlan, mò va vana caa cuavaa ndɔa biyɔɔ-o, mò va vana caa mialla biyɔɔ-o, mò va vanaa diandaa pelon pulɔɔ, mò va vanaa sangaa co coo-a malaa, mò kindin le dɛnnda kɛndɛlan kpow tosaa.
11Kɛ cɛ̀l le vanlaandua felengia piaandaa ndaa vi-a diolan sɛvaa le, kani taa yiyan pɛ le calle piaandua celen o ba o nɔu, a mulul Krista kɔɔ. 12O kon yɛ, yaalaa nda sɔlanin ni, le tùú nda tɛɛmbuu kpema tase nda yii-o o. 13Handɔɔ o kon coo, a luɛi siɛlɛiyo, a cɛn keiyo balɔɔ cɛilan nin. Handɔɔ vɛlɛ o siɛlɛi kon coo, a siŋnun vanaa tombolaa a vanaa vow sondolan o sɔɔn pilan nin-nda, a muungu sɔɔn nda bɛnda le dimi loon dimio. 14Lelan, i yeema mì cuavaa laandua felengia piaandaa ndaa vi-a cal o nɔla celen, mà sɔla cuawva, mà bii yungule ndalen, yɔŋii yaamɔɔa sɔla nɛiyo le sɔɔn vɔɔnndon dimio a naa o kɔɔ. 15Kani a pum a cii nin nɛi toɲaa malɔɔ, má del Setana kɔɔli. 16Kɛ te vanalanɔ laalanndo nɔ pɛ vanlaandua piaandaa ndaa vi-a o vanayan ndɔn nin, o bɛnda mò mala nda. O handu vanaa Krista-aa sɔɛi ken coo le, haliko mi vanaa Krista-a kan mala vanaa piaandaa ndaa vi mà lo nda pilɛ-a.
17 Kaasoŋaa kɔlkalua co sɔɔn vanaa laalannda simndan laci ɲɛkɛndɛi-ya a nɔ bɛɛlen sala tiɔn, kɛ taama-taama a co diom Hala-o dimio mà va ndu vannda pɛɛkoo-a. 18Kani sɛbɛ Hala-o dimi aa: «O bɛnda mì la yii naw co maalon nɛiyo-o sondoo le.» O co vɛlɛ o sɛvaa aa: «Vana vallo bɛnda mò sɔla sala ndɔɔ.» 19Cɛ̀l mì vannda yaala bɛndu kɔlkaloo o sɔɔn nin te, te o co mì vanaa ŋiɔn te kon te vanaa yaa tɛnda seile len te. 20Soo vanaa co dɛnnda lahakilan tosaa-a vannda kpow o hɔl, o kon mì vanaa tɔ̀a yɔŋ siòònde.
21I co nɔm ɲuna Hala o hɔl, Yeesu Krista a mɛlɛkaa sɔla hɛlio-a kpow o hɔl, mà bii silalan ndan, hiyan vana-vana le, tosa ɲɛ-ɲɛ a lakafa le. 22Keleŋa baa handɔɔ vanndo coo le, luei balan o yɔŋ vɔɔn caanda nin te. Nɔm pila mandan mà va o diandaa.
23Kol lɛ mɛnndan daama le, kɛ kol mɔiyan ɲɛ-pɔmbɔ le dembe co nɔm nɛiyo-o a le nààla co nɔm palaa lɔ́ɔ́-lɔ́ɔ̀ lan.
24Vanaa pum a co, lɔ́ɔ́ pá mì hakila ndalan la kelun iyama, la cɔmnun vakpa. A pum yɛ, a cii nin fɔlɔn ndan iyama kiolɔɔ, malan la koma cɔmnun. 25Lende koni, dɛnnda kɛndɛlan bɛɛ, cɔmnɔmndo la cɔmnun ni vakpa, la co yɛ la kɛndɛ le, lan bɛɛ la lo la vianaa le.
Currently Selected:
1Timote 5: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
