1Timote 3
3
Silalan le simlacia vanaa laalannda
1Sɔɛi toɲɛi co hee ni: te vana pum yeema pɛ le simlacilen sɔlaa vanaa laalannda tɛɛn, mɛɛ baala sɔvɛɔ o yeema lende ni. 2Simlacinɔ vanaa laalannda bɛnda mò va vana yaalan too, o bɛnda mò nɔ lanɔɔ ndu pilɛ kpé, mo va vana tosa sɔɔn tùúlen-ndo, vana taasio, vana bii kɔl ndɔɔ-o, mo va vana caa mialla biyɔɔ-o, mo tiwba pɛɛkoo, 3o yɔngún mɔiyan te, o va vana lacɔlɔba le, kɛ mò va vana cii sɔngɔlan-ndo a vana kɔlɲuloo. O va vana nɔ hɔlte ɲɛ-sɔlaa-o le. 4O bɛnda mò va vana caa yungule ndɔlen biyɔɔ-o, vana cuavaa ndɔa tuei diom mà bii sɔɛi ndɔɛi-yo. 5Kani te vanndo cee yungule ndɔlen biyɔɔ le, vɛ̀ɛ̀ o tiw yɛnin ba mo caa vanaa Hala-a biyɔɔ? 6O va vana laalan sɛnɛi-yo le, yɔŋii yongaa piɔ ndu nin, mò sɔla yaalaa maa mɛɛ ɲina vɔɔndo sɔla yaalaa yɛ. 7Mɛɛ mì vanaa ceenda tɛnda seile ndɔle kɛndɛlen, yɔŋii o tambu tɔ́ɔ́ mo haw o yaŋɔɔle ɲina vɔɔndo.
Le vanaa baalaa Hala-a co simlacia malaa o vallo nin vanaa laalannda tɛɛn-nda
8Lende vɛlɛ koni, vanaa baalaa co vannda malaa o kunda vanaa laalannda tɛɛn-nda bɛnda mà va vanaa kennùn bɛɛlen-nda, ma va vanaa toɲaa. A yɔngun mɔiyan te, a va vanaa nuwviaa tɔnɔ lakafa-a le, 9mà va vanaa bii sɔɛi toɲa kpeekpeiye a laalanndo a á yiyan kɛndɔɔ-a. 10Mɛɛ mì vana tɔɔndan nda fɔlɔn, te vana seelun ɲɛ-ɲɛ o kon kɔɔli le, a tosa niko vallo le vanaa laalannda malaa.
11Laandaa ndaa bɛɛ bɛnda mà va vanaa lebɛɛa, a va vanaa balu a caanda o lasondo-a le, mà va vanaa tosa dɛnndan tùúlen-nda, á lo o lediom coo o dɛnndan kpow nin-nda. 12Vana co vanaa laalannda malaa-o bɛnda mò nɔ lanɔɔ ndu pilɛ kpé, mo va vana caa cuavaa ndɔa a yungule ndɔlen biyɔɔ-o. 13Kani bɛɛlen pila vanaa co baalaa tosaa ɲɛkɛndɛi-ya a sɔla caaŋaa ndaa vanaa laalannda tɛɛn ni, ma soo vɛlɛ vakpa a tiindanndo le laalan naa n nɔ o Yeesu Krista nin-ndo.
Sɔɛi viannaŋii bɛndu-bɛnduei
14I co nɔm sɔɔn mun sɛvallo, kani i va yiyanndo maa i co lakɔ niaa yilɔɔ lediinndoo, 15kɛ te i yala lakɔ le, sɛbɔɔ ho malanin nɔm pɔɔ le sinaa mɛɛ vannda bɛnda mà va kelaa o Cɛi-Hala-o nin yɛ, vanaa laalaŋaa Hala nɔ yoomoo o ba-o-a pɛɛn, nduyɛ nda co sungbulen a tiindan toɲaa ni. 16A toɲa, sɔɛi viannannde he i co i bɔɔ le laalan naa:
Yeesu cɔmnun maa vanaciee,
mí Hala Kɔl-Diandaa ke ndu di,
mó cɔmnun mɛlɛkaa,
mí vannda kɔ dimi sɔɛi ndɔɛi vanaa-mangalaa-isɔɔa tɛɛn,
mí vannda laalan ndu o ceendo coo,
mó helnun o halataala o biiloo nin.
Currently Selected:
1Timote 3: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
