1Timote 2
2
Pɛɛkoo a piɛilen o kɔɔ
1Sɔɛi tasei co hee ni, i co niaa dimul, la ɲuna Hala, mì la piɛi ndu, mì la tɛɛlun ndu, mì la mel ndu balika le vannda kpow. 2La piɛi Hala le masaa a le vanaa masalen le co o ba-a kpow, haliko mi n va nila ɲulu, mì n va vɛlɛ o kɔlɲuloo nin, mì n ke Hala bɛɛlen, mì n yiinun a ndu ɲɛkɛndɛi. 3Ɲɛ naŋ mo hɛnan Hala vana ciindiaa naa-o co kon ni, 4o yeema mì vannda kpow a sɔla cindaa, mà bii toɲaa bila. 5Kani Hala ndu pilɛ kpé co ni, vana toosiaa isɔɔ ndu pilɛ kpé co vɛlɛ Hala a vanndacieea tɛɛn ni, Yeesu Krista pɛɛn. 6Ndu yɔngun ndu pila le vannda kpow baŋaa ni. Mí seile len le fula o telen bɛnda-o. 7Lelan o siinguu ya vana dimia diom Mɛlɛka-o a kiilaa ni, mì pɛɛku vanaa co N'Yuifi le-a laalanndo a toɲaa. O co lacòò le ya co dimio ho nuaa le, toɲaa ni.
8Lelan, i yeema mì vanpiaandua heelu balan ladiandaa nɛɛ-nɛɛ ka, mà piɛi Hala, o va a kɔltuw le, o va vɛlɛ a lasɛɛngian te.
9Lende vɛlɛ koni, i yeema mì vanlaandua cuɛinun cuɛyɔn lebɛɛo. A cuɛinun mɛɛ o bɛnda yɛ, mà cuɛinun tùúlen. A law lavɔɔ báà kala le, a vownun kelan n'siani le, te kon te yɔɔvala báà kalaa, te kon te vɛlɛ volɔɔla báà kalalan te, 10kɛ a tosa dɛnnda kɛndɛlan mɛɛ o bɛnda le vanlaandua tuisìn tootoo-a yɛ. 11O bɛnda mì vanlaandua mei, mà sɔla pɛɛkoo o tuisin bɛndu-bɛndoo nin. 12I cɛl mì vanalanɔɔ pɛɛku vanapɔnɔɔ le, te kon te mo va ndu bollen te. O bɛnda mò mei. 13Kani Adam fɔlɔn cɔwnun ni, o kon kɔɔli Hava. 14O co vɛlɛ Adam te nda hiŋ hɔlla le, vanalanɔɔ nda hiŋ hɔlla ni, mó tɛɛmbuu tɔŋ Hala-o. 15Kɛ nduyɛ vanalanɔɔ nɔla mò sɔla cindaa, te o sɔla pɛ cuawva, mò lo o laalanndo a o kaolaa coo, mò va vɛlɛ o diandaa Mɛlɛka o hɔl o tuisinndo nin.
Currently Selected:
1Timote 2: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
