Ɉaan 3
3
Jesus da Nikodɛmə
1Hulɔnu ta ə kɛ laa, diɛ kɛ naa ɓaa Nikodɛmə. Ə kɛ a Farisiɛ̨, yɛ ɓo nwɔ̨nɔ̨ a ɲɛ̨itɔwɔ mun da Ɉuifəɠaa lɔwai. 2Ə pa a kpinį Jesus pɔ, yɛ mą: «Mąąkwɛli kɛmun, ku gɔlɔn kuɔ Yálá ɓə ə́ kɛ a mąąkwɛli kɛmun, mąąhɔlɔɓo, mɛ̨nįɠaai ŋɛ̨i ə́ kaa gɛi, nu hva pɛli hvo gɛ, akɛ.»
3Jesus ə nwoo pulu pənə yɛ mą: «Gáá moi yɛ́ a tɛ̨ą, akɛ nu a wala kɛ a nu nįnɛ̨, hva pɛli lɔi Yálá-taa tɔɔlaa hu.»
4Nikodɛmə yɛ Jesus ɓa: «Nu a pɛli ə kɛ ləi nwɔ̨nɔ̨ a nįnɛ̨ a kɛ gaa a hulɔgolo? Yaan, nee hva pɛli nwɔ̨nɔ̨ mąą koo həɠəi hvo gaa a nįnɛ̨.»
5Jesus ə nwoo pulu pənə yɛ mą: «Gáá moi yɛ a tɛ̨ą, nu hva pɛli lɔi Yálá-taa tɔɔlaa hu, akɛ a wala hɔlɔɓo a yá da Kili. 6Lon nɛ̨ɛ̨nu a gaa, nu li; lon Kili a gaa, a kɛ tii Kili li. 7Kɛi ŋɛ̨i ŋį́ mo yɛ: ‹Hvo kɛli nu a hɔlɔɓo a nįnɛ̨, yili hvə ə kwəi pili yɛ.› 8Hvaŋą a kɛ tɛɛi ɓɛi gaa bɔ, yɛ́ din mɛ̨n, kɛlaa, ɓɛi ə həɠə laa, da ɓɛi gaa lii laa, hvə nąą kɔ́lɔn; pələ kpɔlɔ ɓə a kɛ la a Yálá nwɔ Kilii nwɔ nu hɔlɔɓo mɛ̨nį.»
9Nikodɛmə ə mo kɛa Jesus ɓa yɛ mą: «Yili a pɛli kɛi ləi?»
10Jesus ə nwoo pulu pənə yɛ mą: «Israɛlə lɔi hu ɓɛ, yɛ́ ɓə a mąąkwɛli kɛmun kɛnɛ̨, ya ɓə hvo yili kpaɠala kɔ́lɔn? 11Gáá moi ya a tɛ̨ą, yii ku gbaɠala kɔ́lɔn, ya ɓə kwa mąą mɛ̨nį ɓo, mɛ̨nį yii ku gaa, ya ɓə kwa mąą kɛla hvaa ɓo. Kɛlaa, mɛ̨nį kwa mo kaa, ka hva ka yee hee mu. 12Akɛ ŋą lɔi mɛ̨i mɛ̨nį ɓo kaa, ka wala laa na, ŋą yələi mɛ̨nį ɓo kaa, ka pɛli laa pələ kɛi ləi na? 13Mąąhɔlɔɓo, nu ta hvo ta tɛ li yələi, hvo kɛ li lɔ Nu Lon yii həɠə yələkɔlɔn ɉu. 14Pələi tii Moisə ə kaalə pɛli la a ɓala kwɛli, ə ɉɛlɛn wulu ɓa ɲɛa lɔi hui, hvo kɛ li lɔ di Nu Lon gɛ tii. 15Ya ɓə a gɛ, nui a laa na, mąą nu ə yɛnɛ̨ɛ̨ kpɛɛ hvo mą hɔlɔɓo. 16Mąąhɔlɔɓo, Yálá aa yɛnɛ̨ɛ̨ nuą wɛli la kɛ kpɔ kɛnɛ̨, hvo kɛli ə Non ɉulɔnu tɔ̨nɔ̨ gbən kwɛlɛ, ya ɓə ə gɛ, nui lɔpee a laa na, nwun na hva pili. Kɛlaa, a yɛnɛ̨ɛ̨ kpɛɛ hvo mą hɔlɔɓo Yálá yei. 17Yálá hvo kɛ non dɛɛ li yɛnɛ̨ɛ̨, ə gɛ, ə yɛnɛ̨ɛ̨ nuą mąą ɲąba lɔ, kɛlaa, ə dɛɛ, ə gɛ, yɛnɛ̨ɛ̨ nuą nwun mąą ə ɓo Ɉaalai. 18Nui a laa Yálá lon na, kiti hvo mąą nu ɓa, kɛlaa, nui a wala laa na, mąą nu kiti tɛɛi kɛa. Mąąhɔlɔɓo, hvo kɛ laa li Yálá Lon tɔ̨nɔ̨ gbən na. 19Kití tii nwun mąą: kɛɛ pono ə pa yɛnɛ̨ɛ̨ nuą pɔ, di lənə ma, di kpinį wɛli la kɛ; mąąhɔlɔɓo, di túwɔ́ pələɠaa ɲɔ̨nwɔ̨ɔ̨i. 20Yaan, nuąi da kɛ mɛ̨nį ɲɔ̨n gɛi, di liiɓa ɓaa a kpinį, di hva kulɔ pono ŋą, ə gɛ, di túwɔ́ pələɠaa mąą hvə pa pono. 21Kɛlaa, nui a mɛ̨nį kɛ a tɛ̨ą, a kulɔ la pono ŋą, ə gɛ, nu kəlee di gaa, diɛ mą: aa Yálá woo hon, mąą túwɔ́ pələɠaa ka.»
Jesus da Ɉaan
22Yili pulu, Jesus da nwɔ kalan nɛai də li Ɉude lɔi hu, di hvoló ta wolo kɛ laa da diɛni, yɛ nuą mąąwaa. 23Ɉaan yaa kpɛli yɛ nuą mąąwaa Ainɔn daai Salimə kwɛlɛ, mąąhɔlɔɓo, tɛɛ ya tamąąi kɛ laa. Nu kpulu tamąą di kɛi pa diɛ di mąąwaa. 24Yaan, nąąlɔwai, di hvo ni kɛ Ɉaan too li gaho ŋą.
25Ɉaan nwɔ kalan nɛa taɠaa da Ɉuifə tɔ̨nɔ̨ di kɛi hɛa too, yɛ hvilɛn na di waa pələ ɓa, yɛ pələi di wɔ tɔ́n mąą liɛwoo kaa la. 26Di lɛɠɛ Ɉaan ɓa, diɛ mą: «Mąąkwɛli kɛmun, nui ŋɛ̨i hiɛ ə́ mąą mɛ̨nį ɓo kuɔ Ɉurdɛn ya pulu, yáá gɔlɔn? Yaa kpɛli gaa kɛa nuą mąąwaai, ə lɛɛ, nu kpulu kɛnɛ̨ɛ̨ kaa kɛa lii pɔɔli pələ.»
27Ɉaan ə di woo pulu pənə yɛ diɛ: «Nu hva pɛli hɛn Ɉɔlɔɓoi, akɛ Yálá hvo dɛɛ li pɔ. 28Kaa kpinįi ka káá a nwɔ́ kɛlaɠaa, ŋą kɛ kaa: ‹Və́ ɓaa a Nwun mąąɓomun Yálá ə naakwɛlanmo, kɛlaa yaamun, di dɔ́ɔ́ yaa tii dɔwɔ.› 29Nɛ̨ą nąmu pɔɔ ɓaa nɛ̨ą, kɛlaa, nɛ̨ą nąmu mɛlan a tɔɔ mɛlan gwɛlɛ yɛ nwoo mɛ̨n, a kɛi nɛ̨ą nąmui tii woo mɛ̨n, gwəi yɛ nɛɛ kpɔ kɛnɛ̨. Pələ ɓə nwɔ kwəinɛ̨ɛ̨ kaa la, ə lɛɛ, nwɔ kwəinɛ̨ɛ̨ laa aa hvɛɛ. 30Hvo kɛli Jesus tii laa ə tɛ, nwɛ́i mą́ą́ ə yɛɛ.»
Nui həɠə yələkɔlɔn ɉu
31Nui həɠə yələkɔlɔn ɉu ə pa, ya ɓə gaa hɛn gəlee nwun mɛ̨i. Nui gaa lɔi mɛ̨i, lɔi mɛ̨i mun ni lɔi mɛ̨i mɛ̨nį ɓə, a mo. Nui həɠə yələkɔlɔn ɉu, ya ɓə gaa hɛn gəlee nwun mɛ̨i. 32Yii ə gaa da yii ə mɛ̨n ya ɓə a mo, kɛlaa, nuą di hva di yee hee nwɔ kɛla hvaa mu. 33Nui a ɲee hee nwɔ kɛla hvaa mu, ya ɓə a kɛ diɛ: Yálá a tɛ̨ą ɓo. 34Yaan, nui ɲɛ̨i Yálá ə dɔɔ, a Yálá mąą mɛ̨nį ɓo, mąąhɔlɔɓo, Yálá a Kili kəlee tɛɛ bɔ. 35Lon wɛli kaa Nąn ma, a mɛ̨nįɠaa kəlee mąą huwalawala lɛɛ ɲei. 36Nui a laa Non na, a yɛnɛ̨ɛ̨ hva kpɛɛ hɔlɔɓo; nui a wala laa Non na, hva yɛnɛ̨ɛ̨ hva kpɛɛ hɔlɔɓo, kɛlaa, Yálá nwɔ liiɲąnwąną a kɛ bulu.
Currently Selected:
Ɉaan 3: BKPDCG
Highlight
Share
Copy
Want to have your highlights saved across all your devices? Sign up or sign in