Ɉaan 2
2
Húlu lɔ hɛli yii kɛ Kana daai
1Hvóló hveelɛ tɛɛ pulu, húlu lɔ kwəinɛ̨ɛ̨ ə kɛ Kana daai, Galile lɔi hu Jesus nee ə kɛ laa. 2Di Jesus da nwɔ kalan nɛai diɛ kpɛli di təli. 3Yii kɛa nɔɔ ə kɛi pa kpɛɛi, Jesus nee yɛ mą: «Nɔɔ kaa kpɛɛi di yei yo!»
4Kɛlaa Jesus ə nwoo pulu pənə yɛ mą: «Néé, yii mąąnɛ̨ɛ̨ ŋį́ gɛ, yɛ hvəə ya mo mą́ą́! Ŋɔ́ lɔwai hvə nii həli li.»
5Jesus nee yɛ tii diɛ: «Yii a ka tii la, ka yili kɛ.»
6Muluun mɛ̨ida ə kɛ laa, diɛ ɓo a kwɛni yii Ɉuifəɠaa di kɛi di mąą waa ya pu ɉu yɛ pələi di wɔ tɔ́n mąą liɛwoo kaa la. Muluunŋąą tii dɔ̨nɔ̨ da pɛli di tuku nąąn a wala kɛ tii tuku mɛ̨ida pu ɉu. 7Jesus ə mo góló kɛ nuą tii diɛ yɛ diɛ: «Ka muluunŋąą ŋɛ̨i kəlee laahvɛɛ a yá.»
Di gəlee laahvɛɛ kpɔ ə həli naaləi. 8Jesus ə mo kɛa diɛ yɛ diɛ: «Ka ɲái tii ta haɠa kɛa ɉu ka li la nu kpulu nwun nąmu pɔ.»
Di Ɉaɠa ɉu də li la bɔ. 9Nu kpulu nwun nąmu ə ɲái tii kɔ́ɔn nɔ, mąą pənɛɛ a lɔɔ. Ɓɛi kpɔ nɔɔ tii ə həɠə laa hvo kɛ naa kɔ́lɔn, (kɛlaa góló kɛ nuą tii ɲá haɠa, di kɛ nɔɔ həɠəi kɔ́lɔn.) Nu kpulu nwun nąmu ə nɛ̨ɛ̨gbɛla ɉilɛ təli, 10yɛ mą: «Nu ya nuą təli kwəinɛ̨ɛ̨ mɛ̨nį ɓa, lɔɔ nɛɛ ɓə ya gbɛa dɛɛ tɔwɔ, nuą da gbələ kɛa kɛnɛ̨, yii hvo nɛ̨ɛ̨li kɛnɛ̨ ə yili lɛɛ kɛa pulu. Kɛlaa ə́ wɛi, yii hvo nɛ̨ɛ̨li ya ɓə yaa dɛɛ tɔwɔ, yaa nɛɛ lɛɛ pulu.»
11Pələi Jesus ə kpalo mɛ̨nį dɔlɔɔ kɛ la Kana daai Galile lɔi hu bələ li. Ə nwɔ mąąwiɛ kulɔ laa pono ŋą, nwɔ kalan nɛai di laa na.
12Yili pulu ə li Kafarnaumə daai, yaa, nee, gaayɔwɔɠaa da nwɔ kalan nɛai. Di hvə hvóló tamąą kɛ laa daai.
Jesus ə lɔ Yálá hee pɛlɛ́ mu
(Matie 21.12-13; Markə 11.15-17; Lukə 19.45-46)
13Ɉuifəɠaa di wɔ hɛli ŋɛ̨i da kɛ mą pakə, mąą kpua kɛa kɛ, Jesus ə li Ɉerusalɛmə daai. 14Ə lɔ Yálá hee pɛlɛ́ mu, ə niŋɛ̨ lɔwɔ́tɔɔ nuą, ɓɛlaa lɔwɔ́tɔɔ nuą da tonwələn lɔwɔ́tɔɔ nuą kaa laa; ə mą kɛ wali mąąhvalin nuą, di heɛ la. 15Nąąlɔwai ə yɛli ta həɠə, ə bɛli a hvaɠa, ə nuą tii kəlee kpɛ la Yálá hee pɛlɛ́ mu da di wɔ taatɛlɛɛɠaa Yɛ nwali mąąhvalin nuą di wɔ taɓaliɠaa laa pɛlɛ. 16Ə mo tonwələn nɔwɔtɔɔ nuą diɛ yɛ diɛ: «Ka ɉɛnŋąą ŋɛ̨i kəlee kulɔ ɓɛ, ka hvo na nwɔ pɛlɛ́i kɛ a yɔw kɛ pɛlɛ.»
17Jesus nwɔ kalan nɛai di di kiliŋąhiɛ Yálá laawoo ɓa, yai kɛ mą: «Wɛlikɛmąą yii gaa ɉu ə́ wɔ pɛlɛ́i mąą mɛ̨nį ɓa, a gələn yɛ nwɔ̨n.»
18Ɉuifə nwun nąmįną di mąąni kɛ diɛ mą: «Kpalo mɛ̨nį lə kɛɛ ɓə ya pɛli gɛi, ə gɛ, ə́ nɛ kuɔ, yɛ diɛ: mɛ̨nį ŋɛ̨i ə́ kaa gɛi mąą laa tɛɛi ə́ pɔ?»
19Jesus ə di woo pulu pənə yɛ diɛ: «Ka Yálá hee pɛlɛ́i ŋɛ̨i pu, hvóló hveelɛ Ɉaaɓa yələ, ŋą pɛli ŋį́ ɉaŋą ŋį́ dɔɔ.»
20Nuą tii di mo mą diɛ mą: «Kwɛlan bu-nąąn-kɔw-mɛ̨ida ɓə di gɛ diɛ bɛlɛ́i ŋɛ̨i tɔɔ, ya ɓə yɛ́ diɛ ya pɛli ə́ dɔɔ a hvóló haaɓa yee mu?»
21Kɛlaa, Yálá hee pɛlɛ́i Jesus ə kɛi mąą mɛ̨nį ɓo, ya ɓaa kɛ a gbinį. 22Ɓɛlɔwai Jesus ə muhəɠə la ə kulɔ haaɓɛlaa lɔwai, nąąlɔwai ɓə nwɔ kalan nɛai di di kili lɛɛ la nwoo tii hu, di laa Yálá laawoo hɛɓɛ́ da Jesus hvaa woo la.
Jesus ə nu kwəi mɛ̨nį kɔ́lɔn
23Ɓɛlɔwai Jesus ə kɛ la Ɉerusalɛmə daai a pakə hɛli hvóló, gbalo mɛ̨nįɠaai tii ə kɛi gɛ diɛ gaa, nu tamąą di laa na. 24Kɛlaa, hvo kɛ Jesus ɲɛ̨i ɓa a tɛ̨ą, mąąhɔlɔɓo, ə kɛ di kwəi mɛ̨nį kɔ́lɔn. 25Nu ta hva pɛli kɛ nuą mąą mɛ̨nį hukulɔi ma, mąąhɔlɔɓo, ə nuą kwəi mɛ̨nį kɔ́lɔn.
Currently Selected:
Ɉaan 2: BKPDCG
Highlight
Share
Copy
Want to have your highlights saved across all your devices? Sign up or sign in