Ɉaan 4
4
Jesus da Samari nɛ̨ɛ̨nu
1Jesus ə gbaɠala kaa yɛ: Farisiɛ̨ɠaa daa kɛ bələ mɛ̨n, diɛ kɛ mą: Jesus kaa kalan nɛa mąąwaai yɛ tɛɛ la Ɉaan ɓa. 2Yaan, Jesus kpinįi hvo kɛi nuą mąąwaa, nwɔ kalan nɛai ɓə kɛi mąąwaa kɛ. 3Ɓɛlɔwai Jesus ə nwooɠaa tii mɛ̨n na, ə həɠə Ɉude lɔi hu, yɛ li Galile lɔi hu. 4Hvo kɛ li kɛ ə tɛɛ Samari lɔi hu yɛ li.
5Ɉəliɛ Samari lɔi hu, ə li taa ta hu diɛ kɛ nąą laa ɓa: Sikarə, daai tii ə kɛ Ɉosɛfə yəi ɲɛa kwɛlɛ, ɓɛi nąn Ɉakɔbə ə nąą tɛɛ bɔ. 6Gɛɛnąąi tii Ɉakɔbə nwɔ ya lɔwa ə kɛ laa. Jesus ə həli laa a hvoló tɛɛ nwun ma lɔwai, viikpɛɛ kpɔ kɛa kɛ a mɔlɔɔ, ə hee ɲá lɔwai tii kwɛlɛ.
7Samari nɛ̨ɛ̨nu ta ə pa laa ya haɠai, Jesus yɛ mą: «Gɔ́ a ya ŋį́ gbələ!»
8Nąąlɔwai, nwɔ kalan nɛai daa kɛ tɛ taai laa mį́į́ hɛn ɲá mɛ̨nį ɓa. 9Samari nɛ̨ɛ̨nui tii yɛ Jesus ɓa: «Gɛ pələ kaa ləi yaan, yɛ́i ŋɛ̨i a Ɉuifə, yɛ kpələyá hvɛli Samari nɛ̨ɛ̨nu ɓa?» Yaan Ɉuifəɠaa da Samari nuą di hvo kɛ nɛ̨ɛ̨li.
10Jesus ə nwoo pulu pənə yɛ mą: «Akɛ kɛ ə́ Yálá nwɔ mɛ̨inɛ̨ɛ̨ kɔ́lɔn, ə lɛɛ, nui ŋɛ̨i kɛi yɛ́: ‹Gɔ́ a ya ŋį́ gbələ› yɛ́ ɓo a gɔlɔn ŋąąi, yáá mun mə kɛ, mąąnɛ̨ɛ̨ kɛ ə́ vɛli, ŋą ə́ kɔ́ kɛ a yɛnɛ̨ɛ̨ kpɛɛ hvo mą ya.»
11Nɛ̨ɛ̨nui tii yɛ Jesus ɓa: «Ną́n ɲá lɔwai ŋɛ̨i hu kwɛaai, ə lɛɛ, ya kulɔ hɛn da hvo ə́ yəi, ya yɛnɛ̨ɛ̨ kpɛɛ hvo mą yai tii haɠa mį? 12Ku kalaɓɔlɔ Ɉakɔbə ɓə ɲá lɔwai ŋɛ̨i tɛɛ ku pɔ. Yaa kpinįi ə da kpələ, nonni, ə mą kɛ ɲəi taatɛlɛɛɠaa diɛ kpɛli di da kpələ. Gaa ə́ kwəi ə́ hviɛlaɓoɔi ə́ tɛɛ Ɉakɔbəi tii ɓa?»
13Jesus ə nwoo pulu pənə yɛ mą: «Nui a ɲái ŋɛ̨i ta kpələ, kpələ wɛli a pənə ə Ɉon. 14Kɛlaa, nui ŋą gɔ́ a ya, a gbələ, kpələ wɛli hva kɛa ɉon. Kɛlaa yaamun, ɲái tii a kɛ mąą nu yəi a yɛnɛ̨ɛ̨ kpɛɛ hvo mą ya ton, yii hva kpala.»
15Nɛ̨ɛ̨nui tii yɛ Jesus ɓa: «Ną́n, gɔ́ a ɲá yili ta, ə gɛ, kpələ wɛli hvo pa Ɉón, və́ pənə və́ pa ɓɛ ɲá lɔwa la.»
16Jesus yɛ mą: «'Li ə́í hilɛ təli ka yaa ka pa ɓɛ.»
17Nɛ̨ɛ̨nui tii ə nwoo pulu pənə yɛ mą: «Hilɛ hvo mą́ą́.»
18Jesus yɛ mą: «Tɛ̨ą kpɔ ka tii ə́ mo; yɛ kɛ diɛ: Hilɛ hvo mą́ą́. Mąąhɔlɔɓo, yaa hee hinąą lɔɔli nwuɔ̨, ə lɛɛ, ɉulɔnui ŋɛ̨i háákələi ə́ kaa ɲei, hvo ɓaa a ə́ hilɛ. Yili ɓa, tɛ̨ą ka tii ə́ mo.»
19Nąąlɔwai, nɛ̨ɛ̨nui tii ə mo Jesus ɓa yɛ mą: «Ną́n, gáá gaai, ə́ kaa yɛ Yálá kwəi mɛ̨nį hukulɔ mun. 20Ɲee ŋɛ̨i ɓa ɓɛ, ku nąnni di kɛi kwɛli hvilɛn naa Yálá ɓa. Kɛlaa, kaa ŋɛ̨i a Ɉuifəɠaa, ka kɛ diɛ: Ɉerusalɛmə daai ɓə mąąnɛ̨ɛ̨ nuą di kwɛli hvilɛn naa Yálá ɓa.»
21Jesus ə nwoo pulu pənə yɛ mą: «Nɛ̨ɛ̨nu, laa ná, lɔwai ta kaa pai ɉəli, ka hvo pai kɛi kwɛli hvilɛn Ɉii Ną́n Yálá ɓa, ɲee ŋɛ̨i ɓa, a wala kɛ tii Ɉerusalɛmə daai. 22Hɛn ka kwɛli hvilɛn ma, ka hvo gɔlɔn. Ku wɛi, yii kwa kwɛli hvilɛn ma, ku gɔlɔn. Mąąhɔlɔɓo, nwun mąąɓo ə həɠə Ɉuifəɠaa pɔ pələ. 23Kɛlaa, lɔwai ta kaa pai ɉəli, mąą lɔwai aa gbɛa ɉəli, nąąlɔwai, kwɛli hvilɛn nuą kpɔ-kpɔɔɠaa, da kwɛli hvilɛn Ną́n ɓa a nwɔ Kili ɛlɛɛ da tɛ̨ą. Gwɛli hvilɛn nuą tii ɓə Ną́n Yálá kaa di pɔ. 24Yálá kaa a Kili. Ya ɓə gɛi, nuąi da kwɛli hvilɛn mą, da vilɛn mą a nwɔ Kilii da tɛ̨ą.»
25Nɛ̨ɛ̨nui tii yɛ Jesus ɓa: «Gílí kaa ɉu gɛ́ diɛ: Nwun mąąɓomun Yálá ə naakwɛlanmo, gaa pai pai; yii da kɛ mą: Kristə. Ɓɛlɔwai gaa pai pai la, gaa pai mɛ̨nį kəlee huponoi a kuɔ.»
26Jesus ə nwoo pulu pənə yɛ mą: «Ɲą́ą́ ŋɛ̨i mɛ̨nį ɓoi yɛ́, ŋą́ą́ ɓə.»
27Nąąlɔwai Jesus nwɔ kalan nɛai di həɠə taai pələ diɛ pa. Di pa, di Jesus kaa da nɛ̨ɛ̨nui tii diɛ lono kɛ; di kwəi ə pili diɛ. Kɛlaa, di tɔ̨nɔ̨ kpɛli hvo pɛli mąąni kɛi, diɛ kɛ mą: «Lə mɛ̨nį ɓa da nɛ̨ɛ̨nui tii di kaa lono kɛi.»
28Nɛ̨ɛ̨nui tii ə ɲá haɠa hɛn ɲąŋą lɛɛ heeni ɲá lɔwa la, yɛ tɛ taai nuą təli. 29Yɛ kɛ diɛ: «Ka pa oo! Hulɔnu ta kaa ɓɛ, mɛ̨nįɠaai kpɔ ŋą́ą́ gɛ, aa gəlee hukulɔ mą́ą́. Ka pa ka gaa! Gbəli hu, ya ɓə gaa a nwun mąąɓomun yii Yálá ə naakwɛlanmo.»
30Nu kpulu kɛnɛ̨ɛ̨ ə kulɔ daa lee hu diɛ pa Jesus pɔ.
31Nąąlɔwai tii hu, galan nɛa di Jesus mąąnɛ̨ɛ̨ diɛ mą: «Mąąkwɛli kɛmun, kɔ̨nɔ̨n mį́į́.»
32Kɛlaa, ə di woo pulu pənə yɛ mą: «Kɔ̨nɔ̨n yii mąąnɛ̨ɛ̨ ŋą mį́į́ ka hvo gɔlɔn.»
33Galan nɛa di mo kɛa di kee lɔwai diɛ kɛ mą: Nu ta a kiɛ kɔ̨nɔ̨n dɛɛ bɔ a mį́į́.
34Jesus ə mo diɛ yɛ diɛ: «Gɔ́nɔ́n mąą: Yálá ŋɛ̨i dɔ́ɔ́ ŋį́ niiɓa kɛ, ə lɛɛ, gólói ŋɛ̨i ə dɛɛ bɔ́, ŋą gɛ ŋį́ naa kulɔ. 35Ka hvo ka kiliŋąhiɛ kaa kɛ diɛ: ‹Aa lɛɛ a ŋą́lən nąąn mɔ̨nun dee lɔwai yɛ ɉəli.› Kɛlaa, gáá moi kaa, ka ka nwun muhəɠə, ka díiɠaa kaa, mɔ̨nun gəlee daa mɔn. 36Nui gaa mɔ̨nun deei, a gbɛa vɛla hɔlɔɓo, ə nwɔ mɔ̨nun ŋąąkpɔn gee ɓa, yɛnɛ̨ɛ̨ kpɛɛ hvo mą mąą mɛ̨nį ɓa. Yili ɓa, nui a kɛɛhín, da nui a mɔ̨nun dee, da di kwəinɛ̨ɛ̨ gee pɔ. 37A kɛ tii Ɉanwon ŋɛ̨i da Ɉɔɔ, gaa a tɛ̨ą yai da kɛ mą: ‹Nui ɓə a kɛɛhín, nu takpɛli yɛ mɔ̨nun dee.› 38Ŋą́ ka tɔɔ kaa li mɔ̨nun deei ɓɛi ka hvo kɛɛhín ni laa. Nu takpɛliɠaa kɛ kólo ɓə, ka dɔ̨nɔ̨ hɔlɔɓo.»
39Samari nɔi nuą tamąą di laa Jesus la, nɛ̨ɛ̨nui tii nwɔ kɛla hvaai ə mo mąą mɛ̨nį ɓa, yai ə kɛ mą: «Mɛ̨niɠaa ŋą́ą́ gɛ́, a gəlee hukulɔ mą́ą́.» 40Yili ɓə gɛ, ɓɛlɔwai Samari nɔi nuą di pa la Jesus pɔ, di nɛ̨ɛ̨mąą hvə mą, diɛ mąą: gu lɛɛ nii ɓɛ. Jesus ə hvaa mą ə hvoló hveelɛ kɛ laa. 41Nu tamąą di laa Jesus la, nwooɠaa ŋɛ̨i yaa kpinįi ə kɛi mo mąą mɛ̨nį ɓa. 42Nɔi nuą di mo nɛ̨ɛ̨nui tii ɓa, diɛ mą: «Kwaa laa na, yii ŋɛ̨i ə́ mo kuɔ mąą mɛ̨nį ɓa; ə lɛɛ, da yiiɠaai kuɔ kpinįi ku mɛ̨n mąą mɛ̨nį ɓa. Yili pulu, kwaa gɔlɔn gbɔ a tɛ̨ą kuɔ: ya ɓə gaa a yɛnɛ̨ɛ̨ ɓalo mun.»
Jesus ə nwun nąmu kɛnɛ̨ ta lon gɔlɔi pono
43Yii kɛa Jesus ə hvoló hveelɛ kɛ laa, ə həɠə la yɛ li Galile lɔi hu. 44Mąąhɔlɔɓo, yaa kpinįi ə mo yɛ diɛ: «Kəla ta lɔpee mąą hvo nɛ̨ɛ̨li bɔ taai.» 45Kɛlaa, ɓɛlɔwai ə li la Galile lɔi hu, nuą di di yee hee mu a nɛlɛɛ. Galile nuą diɛ kpɛli, lii di mo Ɉerusalɛmə daai Ɉɛli pu mɛ̨nį ɓa, mɛ̨nįi Jesus ə gɛ laa di naa kaa. 46Jesus ə pənə ə li Kana daai Galile lɔi hu; ɓɛi ə ɲá mąą pənə laa a lɔɔ. Nɔi Nwun nąmu kɛnɛ̨ ta ə kɛ laa, yii non gɔlɔi hvo kɛ pono li, yɛ ɓo Kafarnaumə daai. 47Ɓɛlɔwai ɉulɔnui tii ə mɛ̨n na diɛ kɛ mą Jesus a həɠə Ɉude lɔi hu a paa Galile lɔi hu, ə li ə nɛ̨ɛ̨mąą hvə Jesus ɓa, ə gɛ, da yaa də li Kafarnaumə daa, ə non gɔlɔi pono. 48Jesus yɛ mą: «Ka hva pɛli laa na laa kɛi a kɛ ka hvo kpalo mɛ̨nįɠaa kaa li.»
49Nɔi Nwun nąmu kɛnɛ̨i tii ə Jesus woo pulu pənə yɛ mą: «Nwɔ́ mɛ̨nį nąmu, pa gwəli Ɉa-Ɉa, ə gɛ, nón və pa haa.»
50Jesus yɛ mą: «Li ə́ pɔ taai, ə́ kaa li ə́ lon gaai gɔlɔi aa pono.»
Ɉulɔnui tii ə laa Jesus woo la, ə tɛɛ yɛ li. 51Gɛɛ bələ ɓa yɛ li ɲei bɛlɛ́ laaləi, nwɔ tínuąi di pa naakwiɛn Ɉii diɛ mą: «Ə lon gɔlɔi aa pono.»
52Ə di mąąni kɛ yɛ diɛ: «Mįnɛ̨ lɔwai ɓə wɛi ɲɔ̨n gɔlɔ ə haa la ma?»
Di nwoo pulu pənə diɛ mą: «Ə kɛ wɛi a hvoló paa nwun ma. Nąąlɔwai ɓə gɔlɔi ə pono la.»
53Nokoloi tii nąn ə gɔlɔn yɛ diɛ nąąlɔwai kpɔ lɔ ɓə wɛi Jesus ə kɛ la ma: «Ə lon gɔlɔi a pono.» Ɉulɔnui tii da ɲei bɛlɛ́n nuą kəlee di laa Jesus la. 54Yili ɓə kɛ a Jesus nwɔ kpalo mɛ̨nį kɛɛ veelɛnąą ɉəɠɛɛ Ɉude lɔi hu yɛ pa Galile lɔi hu.
Currently Selected:
Ɉaan 4: BKPDCG
Highlight
Share
Copy
Want to have your highlights saved across all your devices? Sign up or sign in