Gɔwɔ tɔɔi 46
46
Ɉakɔbə ə ɲɛ̨i tɔɔ Ɉosɛfə ɓa
1Hɛn kpɔ kɛ Israɛlə yəi, ə gəlee həɠə, ə hvilɛn na bələ ɓa. Həli ə mo Beɛrə-Seva ə haláá kulɔ laa nąn Isaakə nwɔ Yálái ɓa. 2Mąą kpinįi tii hu, Yálá ə Israɛlə təli a naa, hįį pələ, ə pələ ɓo mą, yɛ mą: «Ɉakɔbə! Ɉakɔbə!»
Ɉakɔbə ə hvaa, yɛ mą: «Nwə́li tɔɔi!»
3Yɛ mą: «Ɲą́ą́ ɓə gáá a Yálá, gáá a ə́ nąn nwɔ Yálá. Hvo ɲɔw lii Eziptə. Mąąhɔlɔɓo, gáá pai ə́ huwu ɓɛlɛi, di kɛ a lɔi tɔ̨nɔ̨. 4Gáá lɛɛi ə́ pɔ, ŋį́ li a yɛ́, ŋį́ pənə ŋį́ pa a yɛ́. Ɉosɛfə yee ŋą ɓə ə́ kaa pai pɔlɔi laa.»
5Ɉakɔbə ə həɠə kɛa Beɛrə-Seva, yaa da nonnii, non nɛ̨ąni, da mąnįnni kəlee, nwotoloɠaa ŋɛ̨i Eziptə tɔɔmun ə dɛɛ di kpəŋə mɛ̨nį ɓa, di tɛ ɉu diɛ li. 6Hɛn kpɔ di ɉɔlɔɓo Kanaan lɔi hu, ə mą kɛ, daatɛlɛɛɠaa kəlee, di gəlee həɠə di li la Eziptə. 7Bələ ɓə Ɉakɔbə da ŋį nu huwui kəlee di li la, di hee Eziptə, yaa, nonnii, ə mą kɛ mąnįn kəlee.
Ɉakɔbə huwu laa ka
8Ɉakɔbə yai naa mɛ̨i həɛ a Israɛlə, nonnii lɛɛ bulu da diɛni diɛ li Eziptə di laa ka:
Rubɛn, yai a non dɔlɔɔ, 9nwɔ lonnii laa ka: Hanɔkə, Palu, Hɛsrɔn da Karmi.
10Simeɔn nwɔ lonnii laa ka: Yemuɛlə, Yamin, Ohadə, Yakin, Soharə, da Saulə, yai da Kanaan nɛ̨ɛ̨nui di ɉɔlɔɓo.
11Levi nwɔ lonnii laa ka: Gɛrsɔn, Kehatə, da Merari.
12Ɉuda nwɔ lonnii laa ka: Ɛrə, Onan, Seva, Pɛrɛsə, da Zera. Ɛrə da Onan di haa Kanaan. Pɛrɛsə lonnii laa ka: Hɛsrɔn da Hamulə.
13Isakarə nwɔ lonnii laa ka: Tola, Pua, Yovə, da Simrɔn.
14Zabulɔn nwɔ lonnii laa ka: Sɛrɛdə, Elɔn, da Yahleɛlə.
15Lon ɉinąąi Ɉakɔbə da Lea di ɉɔlɔɓo Aramə, diɛ ka tii, da di mąąhala Dina. Ɉakɔbə da nɛ̨ą Lea di lonnii pɛlɛɛ geeɓa, ɉinąąmąn, nɛ̨ąmąn, di kɛ a: nu pow haaɓa kɔ́w haaɓa.
16Gadə nwɔ lonnii laa ka: Sifiɔn, Hagi, Suni, Ɛsbɔn, Eri, Arodi, da Areli.
17Asɛrə nwɔ lonnii laa ka: Yimna, Yiswa, Yiswi, Beria, da di mąąhala Sɛra. Beria lonnii laa ka: Hebɛrə da Malkiɛlə.
18Ɉakɔbə da Zilpa di lonnii ka tii a nu pow kɔ́w mɛ̨ida. Ɉilpai tii ɓə Laban ə dɛɛ non nɛ̨ɛ̨nu Lea pɔ, a bulúpɛlɛ.
19Ɉakɔbə da nɛ̨ą Rasɛlə di lonnii ka: Ɉosɛfə, da Bɛnɉamɛn.
20Ɉosɛfə ə nɛ̨ą həɠə Eziptə. Nɛ̨ą ə kɛ a Ɔnə haláá laa həli mun Potifera lon Asenatə, da Ɉosɛfə di lonnii laa ka: Manase, da Ɛfraimə.
21Bɛnɉamɛn nwɔ lonnii laa ka: Bɛla, Bɛkɛrə, Asbɛlə, Gera, Naaman, Ehi, Rɔsə, Mupimə, Hupimə, da Ardə.
22Nu huwui hɔlɔɓo Ɉakɔbə da Rasɛlə di lɔwai, diɛ ka tii a nu pow kɔ́w nąąn.
23Dan nwɔ lon naa ka: Husimə.
24Nɛftali nwɔ lonnii laa ka: Yaseɛlə, Guni, Yesɛrə, da Silɛmə.
25Lon Ɉakɔbə da Bilha di ɉɔlɔɓo, di kɛ a nu mɛ̨ihveelɛ. Bilha ɓə Laban ə dɛɛ non Rasɛlə pɔ a bulúpɛlɛ.
26Ɉakɔbə yəi bɛlɛ́n nuą pɛlɛɛ ɉuwuhu nuą diɛ, diɛi li Eziptə lɔi hu, di kɛ a nu pow mɛ̨ida kɔ́w mɛ̨ida, bɛlɛɛ kɛa non nɛ̨ąni diɛ, 27ə pɛlɛ Ɉosɛfə lon ɉinąą hveelɛi ə ɉɔlɔɓo Eziptə lɔi hu diɛ. Ɉakɔbə huwu kəlee pɛlɛɛ gee ɓa, di kɛ a: nu pow mɛ̨ihveelɛ. Diɛ ɓə kɛ Eziptə lɔi hu.
Ɉakɔbə ə hee Eziptə lɔi hu
28Ɉakɔbə ə Ɉuda tɔɔ Ɉosɛfə pɔɔli ə gɛ, Ɉosɛfə ə pa Gosɛn. Ɉakɔbə da nwɔ nuą di pa Gosɛn. 29Ɉosɛfə ə nwɔ hooi kpulɔn nwotolo ɓa yɛ li nąn nąąkwiɛn ɉii. Yii kɛa ə nąn gaa, ə nɛ̨nɛ̨ɓo, di wolo di kee ɓa, di wɔlɔ kpɔ a ɉu kwɛa. 30Israɛlə yɛ Ɉosɛfə ɓa: «Yiihu, ŋį́ mą kɛa haa kɔ́hɔ hva lɛɛ ɉú. Mąąhɔlɔɓo, ə́ kaa a ə́ hvulú, ɛlɛɛ, ŋą́ą́ pənə ŋą́ą́ ə́ kaa.»
31Ɉosɛfə yɛ niɛni da nąn ɲəi bɛlɛ́n nuą diɛ: «Gáá li ŋį́ mo Eziptə tɔɔmun ma, gɛ́ mą: ‹Níɛni da ną́n ɲəi bɛlɛ́n nuą kəlee, diɛi kɛ Kanaan lɔi hu, daa pa ɓɛ bɔ́. 32Gáá li kɛi mą: Ka káá a taatɛlɛɛ tɔɔ nuą, taatɛlɛɛ kóló ɓə ka gɔlɔn. Ɛlɛɛ, gɛ́ mą: Ka pa a ka wɔ ɓɛlaaɠaai, ka wɔ ɓoluɠaai da ka wɔ nįŋɛ̨ɠaai, bɛlɛɛ ka yəi hɛnŋąą kəlee ɓa.› 33Tɔɔmun a pa ka təlii, a kɛ kaa: ‹Kóló ləi ɓə ka gɛ?› 34'Ka kɛ mą: ‹Taatɛlɛɛ kóló ɓə ku yee kaa mą, ə həɠə ku lokolo yələ ɓa, ə həli la yiihu ɓa; yɛ pələi wɔlɔ ku kalaɓɔlɔni di kɛi gɛ la. Ka yili ɓo tii, gaa pai hvaai mą ka hee Gosɛn lɔi hu. Mąąhɔlɔɓo, taatɛlɛɛ tɔɔ nuą wɛli hvo Eziptə nuą diɛ.›»
Currently Selected:
Gɔwɔ tɔɔi 46: BKPDCG
Highlight
Share
Compare
Copy
Want to have your highlights saved across all your devices? Sign up or sign in
