Gɔwɔ tɔɔi 45
45
Ɉosɛfə ə gbɔwɔ lɛ niɛni diɛ
1Nąąlɔwai, Ɉosɛfə yee hvo kɛa pɛli niiɓa, nuą tii kɛ laa gwɛlɛ, ə mo diɛ, yɛ diɛ: «Ka kulɔ!» Ɉosɛfə da niɛni diɛ tɔ̨nɔ̨ di lɛɛ kɛa bɛlɛ́n, ə gbɔwɔ lɛ diɛ. 2Ɉosɛfə wɔlɔ pələi tii, Eziptə nuąi ŋɛ̨i kɛ bɛlɛ́ kwɛlɛ, di nwoo mɛ̨n, mɛ̨nįi tii bələ ə həli tɔɔmun ma. 3Ɉosɛfə yɛ niɛni diɛ: «Ɉosɛfə ɓaa a ɲą́ą́! Ną́n gaa nii a vulú?»
Niɛni kwəi pili pələi tii diɛ, di hvo kpɛli pɛli nwoo ŋąąpənəi. 4Ɉosɛfə ə tinɛ̨n yɛ diɛ: «Ka lɛɠɛ kpɔ mą́ą́!»
Yiliɠaai di di mąą lɛɠɛ mą. Ɉosɛfə ə pənə yɛ diɛ: «Ɲą́ą́, ka ləɠə Ɉosɛfə, ɲą́ą́ ka tii. Ɲą́ą́ ka tii wɔlɔ ka nɔ́wɔ tɔɔ, diɛ pa a ɲą́ą́ ɓɛ Eziptə lɔi hu. 5Ka kwəi hvo pili kaa, ɛlɛɛ, ka líí hvo holi ka kpɔwɔ pɔ́, nɔ́wɔ tɔɔ mɛ̨nį ɓa. Yálá ka tii hvaa mą, ŋį́ pa ɓɛ nɔi, ə gɛ,, ka nwun mąą ə ɓo. 6Bului ŋɛ̨i aa too, aa kɛ a kwɛlan veelɛ, aa lɛɛ nwɔ̨nɔ̨ pulu a kwɛlan nɔɔli, hihɛn da lɔpee hvo pai lɛlɛi, hɛn da hva ɓa a dənən. 7Yálá ə dɛ́ɛ́ ɓɛ nɔi, ə gɛ, ka hvúlú mąą ə lɛɛ yɛnɛ̨ɛ̨, ka nwun mąą ə ɓo. 8Kaa hvəi dɛ́ɛ́ ɓɛ nɔi, Yálá ɓə dɛ́ɛ́ ɓɛ. Ya ɓə ɲąąwooɓo laa tɛɛ bɔ, ə gɛ́ a tɔɔmun, ə ɉee dɔɔkwəlii da Eziptə lɔi kəlee nwun na.
9«Yii hu, ka pənə kpɔlɔɔ tii ɉa, ka li, kaa ną́n mai: ‹Ə́ lon Ɉosɛfə ɓə nwɛlɛɛ ŋɛ̨i tɔɔ, yɛ diɛ: Yálá aa gɛ́ a Eziptə lɔi ɲą́ą́ wóó ɓomun gɛ̨nɛ̨, yɛ́; ə́ ə́ mąą hvulɔ, ə́ pa ɉa. 10Ya pa, ə́ kaa pai heei Gosɛn ka ə́ lonnii kəlee, ka ə́ mąnįn, ə mą kɛ, ə́ wɔ ɓɛlaaɠaa, moluɠaa da niɲɛ̨ɠaa, bɛlɛɛ ə́ yəi hɛn gəlee ɓa. Pa ə́ hee gwɛ́lɛ. 11Ya, pa ŋą kɔ̨nɔ̨n dɛɛ ə́ pɔ, ka ə́ yəi bɛlɛ́n nuą, ə mą kɛ ə́ wɔ taatɛlɛɛɠaai kəlee. Mąąhɔlɔɓo, bulu kwɛlan ŋɛ̨i aa lɛɛ pulu a kwɛlan nɔɔli.›»
12Ɉosɛfə yɛ nwɔ̨nɔ̨ diɛ: «Kaa kpinįi kaa gáá a ka ɲɛ̨ikɔw, Bɛnɉamɛn yɛ́ kpinįi yaa gáá a ə́ ɲɛ̨ikɔw, ɲą́ą́ Ɉosɛfə ə́ liɛ, ɲą́ą́ ka tii mɛ̨nį ɓoi yɛ́. 13Ka li, pələi ŋɛ̨i gáá la ɓɛ a nu kɛnɛ̨, tɔɔi yii gaa ɲə́i ɓɛ Eziptə lɔi hu, da yiiɠaai kaa kpinįi kaa gaa, ka ɉukulɔ mą. Ka diɛni ka pənə ka pa ɉa.»
14Ɉosɛfə ə pənə ə nəɠə Bɛnɉamɛn nɛ̨nɛ̨ɓo, di wolo di kee ɓa, diɛ wɔlɔ. 15Ɉosɛfə da niɛni di kɛi di kee yee tuwɔ ɓo, diɛ wɔlɔ. Nąąlɔwai ɓə kɛa niɛni di kɛi pɛli hvaai la bɔ.
Eziptə tɔɔmun ə Ɉakɔbə təli ə ɉee gwɛlɛ
16Ɉosɛfə niɛni pa mɛ̨nį Eziptə lɔi hu, tɔɔmun da ɲəi dɔɔ-kwəlii nuą di bələ mɛ̨n. Mɛn tii tɔɔmun ə mo, gwəi ə nɛ̨ɛ̨ kpɔ kɛnɛ̨, ə mą kɛ da nwɔ ɲɛ̨i tɔwɔ nuąi. 17Tɔɔmun ə mo Ɉosɛfə ɓa, yɛ mą: «Mo ə́ liɛni diɛ, di di wɔ hoohvaalənŋąąi hąą yili, di pənə di li Kanaan lɔi hu, 18di tɔɔ ka nąn dɔwɔ, da ɲəi bɛlɛ́n nuą kəlee, di pa. Eziptə lɔi ɓɛi hihɛn a lɛlɛ laa, nąą ɓə ŋą di hee laa.
19«Ɉosɛfə! Mo ə́ liɛni diɛ, di wotoloɠaa həɠə, di li, di ə́ nąn da ɲəi bɛlɛ́n nuą kəlee kpəŋə, di pa a diɛ. 20A pa, hvo pai hvɛɠɛi a hɛn nɔpee ta. Mąąhɔlɔɓo, Eziptə lɔi nɛlɛi kɛɛnąą ɓə gaa pai heei laa.»
21Pələi tii di mo la diɛ, Israɛlə lonnii di gɛ tii. Ɉosɛfə ə wotoloɠaa tɛɛ di pɔ yɛ pələi tɔɔmun ə mo la, ə bɛlɛ bələ pɔ kɔ̨nɔ̨n ma, di lii da di pai. 22Ə həɠə kɛnɛ̨ tɛitɛi tɛɛ gəlee pɔ, kɛlaa, ə Bɛnɉamɛn nwɛi kɛ a həɠə kpɛa kpɛa lɔɔli, ə bɛlɛ wali kwələ nwun ɉaaɓa ɓa. 23Yii ɓaa di nąn nwɛi, hoohvaalən bow ɓə ə dɛɛ, ə kɔ̨nɔ̨n nɛlɛɛ hee gəlee pulu, diɛ li la, da hoohvaalən ɉaa pow, ə mɔ̨nun ɉee gəlee pulu, da kɔ̨nɔ̨n dakpɛliɠaa. 24Ə mo niɛni diɛ, yɛ diɛ: «'Ka hvo hvaa kɛ bələi.» Ə tee diɛ, di li.
25Di həɠə Eziptə, di li Kanaan, di nąn Ɉakɔbə pɔ, 26di di woo hukulɔ mą, diɛ mą: «Ɉosɛfə kaa ni yɛnɛ̨ɛ̨, ya ɓə hɔlɔmun gaa Eziptə lɔi hu a nu kɛ̨nɛ̨.» Yili hvo Ɉakɔbə lii kulɔ mą, mąąhɔlɔɓo, hvo kɛ laa li di la. 27Ɉɛnŋąąi Ɉosɛfə ə dɛɛ, bɛlɛɛ nwoo hukulɔ ɓa, di gəlee kɛ Ɉakɔbə ɓa. Yili ɓə tɛɠa Ɉakɔbə lii muhəɠə. 28Israɛlə yɛ kɛa diɛ: «Ɉosɛfə kɛ mɛ̨nį a vulú, gaa a kwəi pili mąą; nón Ɉosɛfə kaa kpɔ ni yɛnɛ̨ɛ̨, akɛtii tɛ̨ą li! Gáá lii ŋį́ ɲɛ̨́i tɔɔ mą, gɛ́ tɛɠa haa.»
Currently Selected:
Gɔwɔ tɔɔi 45: BKPDCG
Highlight
Share
Compare
Copy
Want to have your highlights saved across all your devices? Sign up or sign in
