Gɔwɔ tɔɔi 47
47
1Ɉosɛfə ə li, ə nwoo hukulɔ tɔɔmun ma, yɛ mą: «Ną́n da níɛni kəlee daa həɠə Kanaan lɔi hu daa pa, a di yəi hɛnŋąą kəlee; di wɔ ɓɛlaaɠaai, di wɔ ɓoluɠaai da di wɔ nįŋɛ̨ɠaai; di kaa Gosɛn.»
2Yili pulu, Ɉosɛfə ə niɛni nɔɔli həɠə, ə li ə di lɛ tɔɔmun ma. 3Yili yɛ diɛ: «Kóló ləi ɓə ka gɛ?»
Diɛ mą: «Ə́ wɔ tínuą kaa a taatɛlɛɛ tɔɔ nuą, yɛ bələi wɔlɔ ku kalaɓɔlɔni di kɛ la. 4Bulu kpɔlu pələi ŋɛ̨i Kanaan lɔi hu, kala ta lɔpee hvo kɛa laa taatɛlɛɛɠaa mąą mɛ̨nį ɓa. Ku pa ɓɛ ku mąą kilɛi; Ną́n! Hvaa mą, ku hee Gosɛn?»
5Tɔɔmun yɛ Ɉosɛfə ɓa: «Yɛ́ ɓə ə́ nąn da ə́ liɛni di pa ə́ pɔ. 6Eziptə lɔi kəlee kaa ə́ yəi, ɓɛi kpɔ a nɛ̨ɛ̨ yɛ́, di hee laa. Da pɛli mą di hee Gosɛn. Ə́ wɔ nuąi tii lɔwai, nu ta a kɛ laa yii nwəlɛɛ taatɛlɛɛ tɔɔi, ə́ ɉee nwɔ́ taatɛlɛɛɠaai nwun na.»
7Ɉosɛfə ə nąn di li tɔɔmun bɔ ə nąn nɛ mą. Ɉakɔbə ə lúwɔ́ too tɔɔmun ma. 8Tɔɔmun yɛ Ɉakɔbə ɓa: «Ə́ kaa kwɛlan gaa yɛli?»
9Ɉakɔbə yɛ mą: «Gwɛlan ŋą́ą́ gɛ too nwuma laa hu, gaa a kwɛlan nwundɔ̨nɔ̨ ɲee haaɓa. Da tɛɛ lɔ a ɉu kpua, ɛlɛɛ, gwɛlan ŋą́ą́ gɛ yɛnɛ̨ɛ̨, ŋą́ą́ mɔlɔmún gɛ mɔ̨nɔ̨ hu. Ŋį́ kwɛlan damą pələ hvo kpɛli pai həlii nąnni di wɛi pɔ, bələi mąn ɲɛnɛ̨ɛ̨ kɛ pələ kaa la tanɔ̨n kwa diɛni ku yəi.» 10Ɉakɔbə ə pənə nwɔ̨nɔ̨ ə lúwɔ́ too tɔɔmun ma, ə yələwala kɛ mą.
11Ɉosɛfə ə li, ə nąn da niɛni hee Eziptə lɔi nɛlɛɛmun ɉu, Ramsɛsə pələ, yɛ bələi tɔɔmun ə mo la. Ɉosɛfə ə lɔi ta tee mą, ə dɛɛ di pɔ a di wɔɔ. 12Ɉosɛfə ə kɔ̨nɔ̨n dɛɛ nąn da niɛni di pɔ, yɛ bələi di kɛ la bɔ.
Ɉosɛfə da Eziptə nuą
13Bulu kpɔlu pələ, kɔ̨nɔ̨n və kɛa kɛ Eziptə lɔi hu, ə mą kɛ, Kanaan lɔi hu. Eziptə nuą da Kanaan nuą di kɛi kpala a pulu. 14Gɔ̨nɔ̨n tii Ɉosɛfə ə kɛi nɔwɔtɔɔ, ə wali hɔlɔɓo, yɛ həɠə Kanaan lɔi hu, ə mą kɛ Eziptə lɔi hu. Nwali kɛnɛ̨i tii ɓə Ɉosɛfə ə li la tɔɔmun bɔ. 15Yii kɛa wali hvo kɛ nu ta yəi yɛ pɛli kɔ̨nɔ̨n ɲai la, Eziptə lɔi hu ə mą kɛ Kanaan lɔi hu, Eziptə nuą di pa, diɛ Ɉosɛfə ɓa: «Yii kɛa wali hvo ku yəi ku hvo kɔ̨nɔ̨n ɲa lai, ə́ kaa pai ku lɛɛi laa ku haa a pulu ə́ ɲɛ̨i ɓa? 'Kɔ̨nɔ̨n dɛɛ ku pɔ ku mįi.»
16Ɉosɛfə yɛ diɛ: «Akɛ wali hvo kɛa ka yəi, ka pa a ka wɔ taatɛlɛɛɠaai, gu mąąhvalin a kɔ̨nɔ̨n.»
17Di pa a di wɔ taatɛlɛɛɠaai Ɉosɛfə pɔ, yili ə kɔ̨nɔ̨n dɛɛ di pɔ, a ɉooɠaa, daatɛlɛɛ pɛlɛɛ da gbɛa-kpɛa, da hoohvaalənŋąą mąąhvalin, ə gwɛlan tii yee mu kɔ̨nɔ̨n dɛɛ di pɔ, a ɉɔ̨nwɔ̨. 18Gwɛlan tii tɛɛ, bulú ɓa kwɛlan, di pənə nwɔ̨nɔ̨ di pa diɛ Ɉosɛfə ɓa: «Ku hva pɛli ku kwəi looi ku wɔ mɛ̨nį nąmu ɓa; wali aa kpɛɛ ku yəi, ku wɔ taatɛlɛɛɠaai kəlee kaa nwɔ̨nɔ̨ a ku wɔ mɛ̨nį nąmu nwɔɔ. Hɛn lɔ kɛa ku yəi, yaa lɔ ɓaa a ku kpinį da ku wɔ lɔiɠaai. 19Akɛtii ə́ kaa pai ku lɛɛi laa ku haa a pulu ə́ ɲɛ̨i ɓa, ku wɔ lɔiɠaai di lɛɛ a lɔi pun? 'Ku pɛlɛ ku wɔ lɔiɠaai diɛ, ə́ ku ya a kɔ̨nɔ̨n; kuɔ kwa ku wɔ lɔiɠaai, ku lɛɛ a tɔɔmun nwɔ kóló kɛ hɛn. Mɔ̨nun ɉuwu tɛɛ ku pɔ ku ɉin, ku nɔ̨ɔ̨ ə lɛɛ ku hu, ku wɔ lɔiɠaai di hvo pa kɛ a lɔi kpoloon.»
20Ɉosɛfə ə Eziptə lɔi kəlee ya, a tɔɔmun nwɔɔ, mąąhɔlɔɓo, Eziptə nuą kəlee di di wɔ lɔiɠaai lɔwɔ́tɔɔ, bulu kpɔlu pələ ɓa di la. Eziptə lɔi nąą kəlee ə lɛɛ a tɔɔmun nwɔɔ. 21Ɉosɛfə ə Eziptə nuą kəlee kɛ a luwɔɠaa. 22Lɔi yiiɠaai lɔ Ɉosɛfə hvo ɲa diɛ ɓaa: Ɉaláá laa həli nuą di wɔ lɔi, mąąhɔlɔɓo, tɔɔmun ə tɔ́n dɔɔ yiliɠaai diɛ. Ɉaláá laa həli nuąi tii, di kɔ̨nɔ̨n ə kɛi həɠə tɔɔmun ɲəi, di hvo di wɔ lɔiɠaai lɔwɔ́tɔɔ.
23Ɉosɛfə yɛ nɔi nuą diɛ: «Háá kələi, ŋą́ą́ ka ya, kaa da ka wɔ lɔiɠaai, ŋą́ą́ ka tɛɛ tɔɔmun bɔ. Ka káá pai mɔ̨nun ɉuwu hɔlɔɓoi, kaa ɉin ɲɛaɠaa. 24Ka pa mɔ̨nun deei, ka ɉeei kɛ lɔɔli, dɔ̨nɔ̨ ɓə gaa a tɔɔmun nwɔɔ, nąąn ə ɓo a díi kɛmun nwɛi. Yili ɓə díi huwu a kulɔ ɉu, ka yəi bɛlɛ́n nuą kəlee kɔ̨nɔ̨n ə kulɔ ɉu.»
25Diɛ Ɉosɛfə ɓa: «Ku wɔ mɛ̨nį nąmu, yɛ́mun, yáá ku ɓalo, mąąhɔlɔɓo, yáá ə́ ɲɛ̨i lɛlɛɛ hee kuɔ, ku yee kaa mu, kwaa lɛɛ a tɔɔmun ŋą luwɔɠaa.» 26Ɉosɛfə ə yili hee Eziptə lɔi hu a tɔ́n, haa ɓa haa, Dɔ́n tii kaa ni mą; nu a tíi kɛ Eziptə lɔi hu, a ŋąąkwɛlɛ ɉu lɔɔli, ɉeei dɔ̨nɔ̨ kaa a tɔɔmun nwɔɔ, nąąn ə lɛɛ a díi kɛmun nwɔɔ. Ɉaláá laa həli nuą lɔ ɓə di wɔ lɔi kaa a di wɔɔ, hvo ɓaa tɔɔmun nwɔɔ.
Ɉakɔbə nwɔ kwɛlan gbəli
27Israɛlə pai ə mo Eziptə da ɲəi bɛlɛ́n nuą, Gosɛn ɓə di hee laa. Di hɛn ɉɔlɔɓo, di lonŋąą kaa, di huwu hu ə kɛnɛ̨. 28Kwɛlan bow kɔ́w mɛ̨ihveelɛ ɓə Ɉakɔbə ə gɛ Eziptə. Ɉakɔbə kaa kwɛlan ə kɛ a kwɛlan nwundɔ̨nɔ̨ kwɛlan bow nąąn kɔ́w mɛ̨ihveelɛ.
29Israɛlə kɛɛ kɛa pai laai nąnni kwɛlɛ, ə non Ɉosɛfə təli, yɛ mą: «Akɛ nwɛ́li kaa yɛ́, ə́ wɔ wɛlikɛmąą da ə́ wɔ kulɔ nwoo ɓa laa lɛ mą́ą́; və́ bɔ gámą́ hvo kɛ ɓɛ Eziptə lɔi hu. Akɛ ə́ yee kaa nwóó tii mu, ə́ yee lɔ nwɛ́lɛ mu! 30Ŋą́ pa laai ną́nni kwɛlɛ, 'kulɔ a ɲą́ą́ Eziptə, 'ə́ li a ɲą́ą́ ną́n nwɔ lɔi hu.»
Ɉosɛfə yɛ nąn ma: «Ną́n, bələi tii ə́ mo la, bələ ɓə gáá pai gɛi la.»
31Ɉakɔbə ə tinɛ̨n yɛ non ma: «Ə́ kwɛla!»
Ɉosɛfə ə gwɛla. Ə kɛ lɔ tii, Israɛlə ə lɛɛ ɲəi gbin ŋą ə kwɛli hvilɛn Yálá ɓa.
Currently Selected:
Gɔwɔ tɔɔi 47: BKPDCG
Highlight
Share
Compare
Copy
Want to have your highlights saved across all your devices? Sign up or sign in
