Gɔwɔ tɔɔi 44

Ɉosɛfə ə niɛni li mɛ̨nį mąątinɛ̨n

1Ɉosɛfə yəi bɛlɛ́n mɛ̨nį ŋɛ̨i kulɔ mun ɲɛ̨i kɛ laa, Ɉosɛfə ə mo yili ɓa yɛ mą: «Nuąi ŋɛ̨i di wɔ ɓíiɠaai laahvɛɛ a kɔ̨nɔ̨n, yii kpɔ a pɛli di tiɛ̨ ɓa. Ɛlɛɛ nwaliɠaai di paa la, ə nɔ di yəi diɲɛ̨ mɛ̨i. 2Ə́ nwɔ́ wali kpələkɔwɔi lɔ nokolo laamun nwɔ ɓíi hu, ə́ bɛlɛ nwɔ walii ɓa.»

Ɉulɔnui tii ə gɛ, yɛ pələi di mo la mą. 3Mąą yələ laaɓoɔ, Ɉakɔbə lonnii diɛ kɛa li, da di wɔ hoohvaalənŋąąi. 4Di kulaa daai, di hvo kpɛli li kwɛa la, Ɉosɛfə yɛ nwɔ nui tii ɓa: «Hvilɛn nuąi tii pulu, ya həli diɛ, ə́ di mąąnikɛ, yɛ diɛ: ‹Lə mɛ̨nį ɓa ka mɛ̨nį lɛlɛɛ kwələ kulɔ a mɛ̨nį ɲɔ̨nwɔ̨ɔ̨? 5Lə mɛ̨nį ɓa ka nwɔ́ mɛ̨nį nąmu nwɔ kpələkɔwɔi nwuɔ̨ yai a kɛ nwɔ Yálá mɛ̨nį kɛi ɉui? Mɛ̨nį tii kaa gɛ, ka hvə gɛ li a nɛlɛɛ.›»

6Ɉulɔnui tii ə həli Ɉosɛfə niɛni diɛ, pələi tii di mo la mą, ə mo tii diɛ. 7Yiliɠaai di nwoo ŋąąpənə, diɛ mą: «Lə mɛ̨nį ɓa ka pɛli ka mɛ̨nį taaləi tii nwulu lɛɛ ku nwuɔ̨? Ku hva pɛli ku hvo mɛ̨nį taaləi tii kɛ. 8Pai ku mo ɓɛ tɔlɔɔ, nwalii lɛɛ ku yəi míiɠaa hu, ku pənə ku pa a yiliɠaai kəlee. Akɛtii, kwa tɛɛ pələ kɛ ləi kuɔ wali kwɛli hɛn da a wala kɛ tii hɛni hɛn da nwuɔ̨ ə́ wɔ́ mɛ̨nį nąmu yəi bɛlɛ́n? 9Nui lɔpee ya gbələkɔwɔ tii kaa ɲəi diɲɛ̨ hui, mąą nu ə háá, ɛlɛɛ, kuɔ kpinįi ku kɛ a ka wɔ luwɔɠaa.»

10Ɉulɔnui tii yɛ diɛ: «Bələi ŋɛ̨i, ka mo la, gáá nąą pulu kwɛlii, nui ŋą gbələkɔwɔ kaa ɲəi, mąą nu yaa tɔ̨nɔ̨ ɓə a lɛɛ a nwɔ́ luwɔ, mɛlaɠaa tii da lɛɛ di kpɔwɔ ɓa.»

11Di kəlee di di tiɛ̨ yɛɛ kpɔ a mąą hvulaa, nu kəlee ə nwɛi laa hvólóon. 12Ɉulɔnui tii yɛ kɛa di tiɛ̨ hu pili, ə gɔwɔ tɔɔ nu pɔlɔ laa mun ma, yɛ li la nokolo laa mun bɔ. Bɛnɉamɛn yəi míi hu ɓə di gbələkɔwɔi tii kaa laa. 13Niɛni di di mąą həɠə hu ɓɛla a liiholi. Di kəlee di pənə di di tiɛ̨ yili ɉoohvaalənŋąą pulu, di pənə di tɛ taai.

Ɉuda ə Bɛnɉamɛn mąą nɛ̨ɛ̨mąą hvə

14Ɉuda da mɛlaani di pənə di pa Ɉosɛfə pɔ, yili heɛnii ɲəi bɛlɛ́n, di kəlee di pɛlɛ nɔi ɓa gɔwɔ mu. 15Ɉosɛfə yɛ diɛ: «Lə mɛ̨nį ɓa, ka gɛ tii a ɲą́ą́? Ka hvo gɔlɔn kaa diɛ gáá a nui a pɛli ə mɛ̨nįɠaa tii kpaɠala kaa?»

16Ɉuda ə mo Ɉosɛfə ɓa, yɛ mą: «Ną́n! Yɛ́i ŋɛ̨i ə́ kaa a nɔi nwun nąmu, lə mɛ̨nį kpɔ ɓə kwa pɛli ku mo yɛ́, ə gɛ, ə́ laa na, yɛ́ diɛ, ku hvo a hɔn mąą nuą mɛ̨nįi ŋɛ̨i hu? Yálá aa ku mąą kpoloon, aa ku hɔn gulɔ pɔ̨nɔ̨ŋą, kwaa kɛ a hɔn mąą nuą. Nui ŋɛ̨i di ə́ wɔ kpələ kɔ́wɔi kaa ɲəi míi hu, kwa diɛni kəlee kwaa kɛ a ə́ wɔ luwɔ.»

17Ɉosɛfə yɛ diɛ: «Kpaa-oo! Mąą hvo nɛ̨ɛ̨li və́ gɛ tii a kaa. Nui ŋɛ̨i di nwɔ́ kpələkɔwɔi kaa ɲəi míi hu, yaa lɔ ɓə lɛɛi ɓɛ a nwɔ́ luwɔ, kaa yiiɠaa tii, ka pənə ka li ka nąn bɔ.»

18Ɉuda ə lɛɠɛ Ɉosɛfə ɓa, yɛ mą: «Nwɔ́ mɛ̨nį nąmu, ka nɔi ŋɛ̨i hutɔɔmun ka pɛliɛi, gɛ́ ə́ hvaa mą, ŋį́ hvaa ə́ pɔ, ə́ lii hvo holi bɔ́. 19Ku paa ɓɛ, ə́ ku mąąnikɛ tɔlɔɔ, yɛ́ kuɔ: ‹Ka nąn gaa laa?› Ɛlɛɛ, ‹Ka ləɠə kaa laa?› 20Ku kɛ yɛ́: ‹Ku nąn ɉulɔgolo kaa laa, da ku ləɠə logolo ta, yii ku nąn ə ɉɔlɔɓo bɔlɔɔ kɔ́lɔ hu; nokoloi tii nwɛli kaa ku nąn ma kpɔ kɛnɛ̨, mąąhɔlɔɓo, nee lon gbəlii lɔ lɛɛ ya li. Yili nwɔɔ liɛ ə wɔlɔ háá.› 21Ə́ kɛ nwɔ̨nɔ̨ kuɔ: ‹Ka li, ka pa a ka ləɠəi tii, gáá bɔ ŋį́ ɲɛ̨́i tɔɔ mą.› 22Ku mo yɛ́, kuɔ yɛ: ‹Nokoloi tii, hva pɛli həɠə nąn gwɛlɛ, akɛ a həɠə gwɛlɛ, nąn a háá.› 23Kɛlaa, ə́ mo kuɔ, yɛ́ kuɔ nwɔ̨nɔ̨: ‹Akɛ ka ləɠə a wala lɛɛ ka pɔ, ka diɛni ka hvo pa, ka hvo kɛa pa ɓɛ nɔi.› 24Pənəi ku mo kwəli, ə́ wɔ luwɔ ku nąn ɉulɔgoloi tii pɔ, ku ə́ woo tii laa həli mą. 25Ɓɛlɔwai ku nąn ə kɛ la kuɔ: ‹Ka pənə ka li, ka kɔ̨nɔ̨n ɲa›, 26ku mo mą, kuɔ mą: ‹Ku hva pɛli lii, akɛ ku ləɠə hvo lɛɛ li ku pɔ, akɛ yili hvo mą, nɔi nąmui tii laa, hva ɲee hee ku mu.› 27Ku nąn ə ku woo ŋąąpənə, yɛ kuɔ: ‹Ka kili kaa ɉu, kaa diɛ, lon veelɛ ɓə kwa nɛ̨́ą Rasɛlə ku ɉɔlɔɓo, 28dɔ̨nɔ̨ aa wɔlɔ pili ɲə́i! Nwɔ́ɔ́ kwəi, lɔwɔ huwɔɠaa ɓə ɉon, di mį́i, mąąhɔlɔɓo, və́ ta kɛa gaa li. 29Ya ɓə ka káá nwɔ̨nɔ̨ bɔ ka gbəli woloi ŋɛ̨i həɠə ɲə́i! Akɛ mɛ̨nį ta a kɛ lai, bɔ́lɔɔ mɔ̨ɔ̨ ŋɛ̨i, ŋą haa a liikələn gwəi, nwúlu a lɛɛ ka nwuɔ̨.›

30«Yii hu kɛa ŋɛ̨i, ną́n, nwɔ́ mɛ̨nį nąmu, ŋą pɛli búlu pənəi ləi, gɛ́ li ną́n bɔ, akɛ, nokoloi ŋɛ̨i a wala lɛɛ ku pɔ kwa diɛni ku hvə li? Ną́n ɲii hvóló kəlee laai lɔ nokoloi ŋɛ̨i mɛ̨i. 31Ku nąn a wala gaa ku pɔ, gaa pai haai. A kɛ tii, gaa pai haai a liikələn gwəi, nwulu ə lɛɛ ku nwuɔ̨. 32Ɛlɛɛ, ɲą́ą́ ɓə kɛ ku nąn ma: ‹Ə́ lon və, kwa yaa kwə li; gaa ɲéé kɔ́n ma.› Ŋą́ kɛ ku nąn ma: ‹Ŋą́ wala pənə və́ pa a ə́ lon ə́ pɔ, ɲą́ą́ ɓə ə háá wulu a lɛɛ nwúɔ̨.› 33Ną́n! Bɛlɛɛ ka ə́ kɔ́wɔ mu, hvaa mą, ŋį́ lɛɛ ɓɛ, ŋį́ nuwɔlaa kɛ ə́ yəi. Nokoloi ŋɛ̨i, da niɛni di pənə də li ku nąn bɔ. 34Vá pɛli búlu pənəi, və́ li ku nąn bɔ, akɛ kwa nokoloi ŋɛ̨i ku hvo li li. Níí hva pɛli kpələi, ɲɛ̨́i heɛ ku nąn ma, mɛ̨nį nwąnąą yɛ laa mą.»

Currently Selected:

Gɔwɔ tɔɔi 44: BKPDCG

Highlight

Compare

Copy