Gɔwɔ tɔɔi 35
35
Ɉakɔbə ə həɠə Sisɛmə yɛ li Mamre
1Yələ ta Yálá yɛ Ɉakɔbə ɓa: «Ə́ muhəɠə, ə́ li Betɛlə ə́ hee laa, ə́ haláá kulɔi pɛli laa Yálá ɓa, yai gbɔwɔ lɛ yɛ́, ɓɛlɔwai ə́ kɛi pu la ə́ liɛ Esau ɓa.»
2Ɉakɔbə ə mo ɲəi bɛlɛ́n nuą diɛ da bɔ nuą, yɛ diɛ: «Ɉaliɠaai ka yəi, ka ka yee kulɔ gəlee hu, ka ka mąąhəɠə, ka ka mąą həɠəɠaa mąąhvalin. 3Ka ka muhəɠə ka gwə li Betɛlə, Yálái a gúlɔi gánąn mɛ̨nįɠaa hu, ŋį́ haláá kulɔi bɛli laa mą. Ya ɓə gaa bɔ́ nwɔ́ hiɛɠaa kəlee hu.»
4Nu kəlee di di yee kulɔ di wɔ haliɠaai hu, di dɛɛ Ɉakɔbə pɔ, da di wəlii kwɛliɠaai kəlee. Ɉakɔbə ə ɉɛnŋąąi tii kəlee loo wulu kɛnɛ̨ ta mu Sisɛmə daa kpala. 5Ɓɛlɔwai Ɉakɔbə da nwɔ nuąi di di tiɛ̨ həɠə la, diɛ li, Yálá ə ɲɔw kɛnɛ̨ too nɔi tii hu nuą hu, nu tɔ̨nɔ̨ kpɛli hvo hvilɛn di pulu.
6Ɉakɔbə da bɔ nuąi kəlee di həli Luzə yai a Betɛlə Kanaan lɔi hu. 7Ɉakɔbə ə haláá kulɔi pɛli laa, ə naa hee a: Ɛlə-Betɛlə, mąąhɔlɔɓo, nąą ɓə Yálá ə gbɔwɔ lɛ laa mą, ɓɛlɔwai ə kɛi pu la niɛ tɔwɔ. 8Debora ŋɛ̨i Rebeka kulɔ ɉu, haai ə mo, nąą ɓə di noo laa mɛlɛ́ mu Betɛlə daa kpala, ə mɛlɛ́i tii laa hee a wɔ́lɔ́ wulu.
9Ɉakɔbə həɠɛɛ Aramə Yálá ə gbɔwɔ lɛ nwɔ̨nɔ̨ mą, ə lúwɔ́ too mą. 10Yɛ mą:
Ə́ laa ɓaa a Ɉakɔbə,
di hvo kɛa pai kɛi yɛ́ Ɉakɔbə,
ə́ laa ɓaa kɛa Israɛlə.
Bələ ɓə Yálá ə Ɉakɔbə laa hee la a Israɛlə. 11Yálá yɛ nwɔ̨nɔ̨ Ɉakɔbə ɓa: «Ɲą́ą́ ɓə a Huwalawala Kəlee Nąmu Yálá, gáá ə́ kwəi nwun ɉii, ə́ huwu ə ɓɛlɛ, ə́ kaa pai kɛi a hį́i tamąą di nąn, tɔɔɓɛlaa da kulɔ ə́ huwuhu. 12Nɔi ŋɛ̨i ŋį́ dɛɛ Abrahamə pɔ, ŋį́ dɛɛ Isaakə pɔ, gáá dɛɛ ə́ pɔ. A tinąą kɛ a ə́ huwu nwɔɔ.»
13Mɛ̨nįi tii ɓoɔ pulu, Yálá da Ɉakɔbə di di ɓɛlaɓo. 14Ɉakɔbə ə kwɛni laa gɛɛnąąi tii, ə wulɔ pu mą da lɔɔ, ə gɛ, a haláá. 15Ə nąą laa hee a Betɛlə, ɓɛi Yálá ə mɛ̨nį ɓo laa mą.
Rasɛlə haa mɛ̨nį
16Ɉakɔbə da ɲəi bɛlɛ́n nuą, di həɠə Betɛlə di mąą hvo kɛ kwɛa li Ɛfrata ɓa, Rasɛlə ə naayɛɛ la, kɛlaa, ə gwəinwąną kɛ kpɔ a mɔlɔ. 17Yii kɛa gwəinwąną ə kpɔlu, vɛlɛlee kɛ nɛ̨ą, yɛ Rasɛlə ɓa: «Ə́ liikpələ, ə́ lon gaa a hulɔnu nwɔ̨nɔ̨.»
18Ɓɛlɔwai Rasɛlə ə kɛi pa haai la, ə nokoloi tii laa hee a: Bɛn-Oni, mukulaa ɓaa: «Nwɔ́ mɔ̨nɔ̨ hu lon.» Kɛlaa, nokolo nąn ə naa hee, a: «Bɛnɉamɛn, mukulaa ɓaa: Ɲéé lɛlɛɛ hu lon.» 19Rasɛlə ə haa, Ɛfrata bələ pɔ, di noo. Ɛfrata laa ta ɓaa a: Bɛtleɛmə. 20Ɉakɔbə ə kwɛni laa nɛ̨ą kámą la, háá ɓaa háá, gwɛni tii kaa laa, diɛ kɛ mą: Rasɛlə kámą la kwɛni.
21Ɉakɔbə ŋɛ̨i naa ɓaa a Israɛlə, ə həɠə ə li ə hee Migdalə-Edɛrə pulu. 22Ɓɛlɔwai di kɛ la laa, Rubɛn ə laa a nąn nɛ̨ą Bilha. Israɛlə kili ə pu ɉu.
Israɛlə lonnii di kɛ a nu pow kɔ́w hveelɛ. 23Lea nwɔ lonnii laa ka: Rubɛn ɓə kɛ a Ɉakɔbə lonnii dɔlɔɔ, yili pulu Simeɔn, Levi, Ɉuda, Isakarə da Zabulɔn. 24Rasɛlə nwɔ lonnii di kɛ hveelɛ, diɛ ɓaa: Ɉosɛfə da Bɛnɉamɛn. 25Bilha Rasɛlə nwɔ tímun, da Ɉakɔbə di lonnii di kɛ hveelɛ, diɛ ɓaa: Dan da Nɛftali. 26Zilpa Lea nwɔ tímun, da Ɉakɔbə di lonnii di kɛ hveelɛ, diɛ ɓaa: Gadə da Asɛrə. Lonŋaai Ɉakɔbə ə ɉɔlɔɓo Aramə, diɛ li.
27Ɉakɔbə ə li nąn Isaakə pɔ Mamre yai kɛ Kiryat-Arba. Kiriatə-Arba laa ɓaa a Hebrɔn; nąą ɓə wɔlɔ Abrahamə da Isaakə di kɛ laa heeni. 28Isaakə kaa kwɛlan ə kɛ a kwɛlan nwundɔ̨nɔ̨, kwɛlan bow mɛ̨ihaaɓa. 29Isaakə ə pɔlɔ, yɛ tɛɠa lɛɛ laai nąnni kwɛlɛ. Esau da Ɉakɔbə di di nąn now.
Currently Selected:
Gɔwɔ tɔɔi 35: BKPDCG
Highlight
Copy
Compare
Share
Want to have your highlights saved across all your devices? Sign up or sign in
