Gɔwɔ tɔɔi 34
34
Simeɔn da Levi di di mąąhala nwąną kulɔ
1Yələ ta, Ɉakɔbə da Lea di lon nɛ̨ɛ̨nu Dina, ə li nwoo pilii nɔi tii hu nɛ̨ɛ̨lɛa diɛ. 2Hivi mun Hamɔrə yai a nɔi nąmu, non Sisɛmə ə Dina kaa, ə wolo mą, ə gɛ, a nɛ̨ą. 3Kɛlaa, Ɉakɔbə lon Dina wɛli ə too kpɔ mą kɛnɛ̨, ə kɛ bɔ ə ɉəɠə kɛa a nɛ̨ą. 4Sisɛmə ə li yɛ nąn Hamɔrə ɓa: «Gɛ́ ə́ Nɛ̨ɛ̨non ŋɛ̨i mąą mɛ̨nį ŋɛ̨i kulɔ ə kɛ a nɛ̨́ą.»
5Ɉakɔbə ə bələ mɛ̨n, diɛ mą Sisɛmə aa wolo ə́ lon Dina ɓa, aa gɛ a nɛ̨ą. Kɛlaa, Ɉakɔbə hvo mɛ̨nį lɔpee ta ɓo ɉu, mąąhɔlɔɓo, nonnii di kɛ daatɛlɛɛɠaa pulu nɔwɔi, ə nąą pilɛ mą, ə lɛɛ ɉu di pənə di pa. 6Sisɛmə nąn Hamɔrə ə li Ɉakɔbə pɔ, ə non nwɔ wɛli mɛ̨nįi laa həli mą. 7Ɉakɔbə lonnii di həɠə nɔwɔi di pa, mɛ̨nį tii kɛ, di mo diɛ. Yili ə nwąną diɛ, ə di liikələn di kwəi, mąąhɔlɔɓo, Sisɛmə aa ɓɛlɛkpɛɛmąą, túwɔ́ ɓo a Israɛlə, a laa ŋɛ̨i ə mo a Ɉakɔbə lon Dina. Yili mąą hvo nɛ̨ɛ̨li kɛ Israɛlə nuą lɔwai.
8Kɛlaa, Hamɔrə ə mo diɛ, yɛ diɛ: «Nɛ̨ɛ̨non ŋɛ̨i wɛli aa too nón Sisɛmə ɓa, ka dɛɛ bɔ́ ŋį́ dɛɛ nón bɔ a nɛ̨ą. 9Ka gu mįnɛ̨ həɠə, ka guɔ nɛ̨ą həɠə gu kee ɓa. 10Gwa kaani gu kɛ kanąlaa ɓa, nɔi ŋɛ̨i nąą kəlee ə kɛ a ka wɔɔ, ɓɛi ka kɛ bɔ, ka hee laa, ka hee laa.»
11Sisɛmə kpinįi yɛ nɛ̨ɛ̨nu nąn da mąąhinąą diɛ: «Ka ɲɛ̨́imąąwɛli kaa, ka hvaa nwóó ɓa; yii lɔpee ka mo, ka lon mąą mɛ̨nį hu, ŋį́ gɛ. 12Ka mą hɛn mɛ̨nį kɛnɛ̨ pili mą́ą́, ŋį́ gbɛɛ, yii lɔ gáá vɛlii káá, ya ɓaa, ka hvaa lɔ mą, ka ka lon dɛɛ bɔ́ a nɛ̨́ą.»
13Ɉakɔbə lonnii di Sisɛmə da nąn Hamɔrə di woo ŋąąpənə a gbąnąlaa, mąąhɔlɔɓo, Sisɛmə hɔn ə kɛ di kwəi, di mąąhala Dina mąą mɛ̨nį ɓa. 14Di mo kɛa Sisɛmə da nąn diɛ, diɛ diɛ: «Mɛ̨nįi ŋɛ̨i ka mo, ku hvo hvaa li mą, ku hva ku mąąhala tɛɛi kɛ́nɛ̨ kpoloa pɔ; kwa yili kɛ ti, akɛ a ɓɛlɛkpɛɛmąąlaa kuɔ. 15Kwa pɛli ku hvaa mą, akɛ, ɉinąą kpɔ di kaa ka pɔ taai da gəlee hee kɛ́nɛ̨ ɓa. 16Ka gɛ tii, ka hvaa mą, kwa pɛli gu nɛ̨ą hee gu keeni ɓa. Gwa kaani gwa kɛ kɛa a heeyɔwɔɠaa, gu kɛ a nu huwu tɔ̨nɔ̨. 17Ka wala hvaa mą di hvo ka hee kɛ́nɛ̨ ɓa, ku kaa ku lon ɉəɠəi ku pənə kwə li.»
18Di woo tii ə Hamɔrə da non Sisɛmə di lii hon. 19Ɉulɔnon tii hvo kpɛli kuu hee gɛ́nɛ̨ kɛ mɛ̨nį ɓa, mąąhɔlɔɓo, Ɉakɔbə lon nwɛli ə kɛ mą kpɔ kɛnɛ̨. Sisɛmə woo mąąwia kɛ nąn ɲəi bɛlɛ́n, nąn nonnii lɔwai. 20Hamɔrə da non Sisɛmə di daa nuą ɲąąkpɔn ɉįi la, diɛ diɛ: 21«Kanąlaa kaa pai kɛi gwa Ɉakɔbə nwɔ pɛ́lɛ́i gu lɔwai. Kuɔ di hee ɓɛ gu pɔɔli, nɔi ə kɛ a gwa diɛni kəlee gu wɔɔ. Guɔ nɛ̨ą həɠə gu kee ɓa. 22Yá gaa di hvaa mą, di hee ɓɛ nɔi, gwa diɛni gu kɛ a nu huwu tɔ̨nɔ̨, hvo kɛli da ɓɛ daai hinąą kəlee hee kɛ́nɛ̨ ɓa, yɛ bələi diɛi tii di kaa la. 23Akɛ gwa hvaa di woo ɓa, da pa di hee gu kwɛlɛ; di yəi hɛn gɔw da di yəi taatɛlɛɛɠaa di kɛ a gu wɔɔ.» 24Nuąi kpɔ kɛ ɉįi la, gəlee di hvaa Hamɔrə da non Sisɛmə di woo ɓa. Di ɉinąą kəlee hee kɛ́nɛ̨ ɓa.
25Voló haaɓa yələ, gɛ́nɛ̨ pala ə ɓo ni diɛ, Ɉakɔbə lon ɉinąą hveelɛ Simeɔn da Levi, diɛi a Dina mąąhinąą, di ɓɔwa kwɛaa həɠə, di lɔ daai nuą tɛɠii, di ɉinąą kəlee paa. 26Di Hamɔrə da non Sisɛmə di hu hɛɠɛ a ɓɔwa kwɛaa. Di di mąąhala Dina həɠə di li la.
27Ɉakɔbə lon ɉinąą yiiɠaai tii, di li di too nu lɛɠɛɠaa mɛ̨i, di di mąą kpoloon, di daai hɛnŋąą kəlee həɠə. Mąąhɔlɔɓo, daa kɛ wolo di mąąhala ɓa daa gɛ a di nɛ̨ą. 28Di mɛlaaɠaa, moluɠaa, nįŋɛ̨ɠaa da ɉoohvaalənŋąą kəlee həɠə, da hɛn kpɔ kɛ laa daai, da ɲɛɛ kɔ́wɔ hu. 29Ɉakɔbə lonnii di daai tii hu hɛn gɔwɠaa kəlee həɠə, di bɛlɛ nɛapɛlɛɛɠaa da nɛ̨ąą diɛ, di hvo hɛn da lɛɛ pɛlɛ ta mu.
30Ɉakɔbə yɛ Simeɔn da Levi diɛ: «Kaa mɛ̨nį laa mą́ą́, kaa gɛ́ a hɛn ɲɔ̨n nɔi ŋɛ̨i hu nuą ɲɛ̨i ɓa. Diɛ ɓaa: Kanaan nuą da Perizi nuą. Di kaa pai kpɔn ɉii di kee ɓa, di kɔ́ pɛlɛ mą́ą́, ɲą́ą́ ka nu kpulu hvo ɲə́i, di yee kaa pai tɛɛi mą́ą́, di ku huwu pu kwa ɲə́i bɛlɛ́n nuą.»
31Diɛ mą: «Ɉulɔnui tii hvo túwɔ́ li a ku mąąhala a dənən, mąą hvo nɛ̨ɛ̨li hvo ku mąąhala hon yɛ wɛlikɛnɛ̨ɛ̨nu.»
Currently Selected:
Gɔwɔ tɔɔi 34: BKPDCG
Highlight
Copy
Compare
Share
Want to have your highlights saved across all your devices? Sign up or sign in
