Gɔwɔ tɔɔi 33
33
Ɉakɔbə da niɛ di di lɔwai pɔnaa kulɔ
1Ɉakɔbə ə Esau kaa yɛ pa nąąkwiɛn ɉi, da hinąą nwun nąąn. Ɉakɔbə ə nonnii ŋąąkwɛlɛ Lea da Rasɛlə di lɔwai, ə mą kɛ, nwɔ tínɛ̨ą hveelɛi. 2Ə nwɔ tínɛ̨ąi tɔɔ tɔwɔ da di lonnii, Lea da nwɛiɠaai di lɛɛ nąą pulu, Rasɛlə da Ɉosɛfə di lɛɛ a gbəli. 3Yaa kpinį ə hvilɛn nuą kəlee ɲɛ̨i tɔwɔ. Ɓɛlɔwai ə kɛi pa həlii la niɛ ɓa, ə pɛlɛ nɔi ɓa gee mɛ̨i mɛ̨ihveelɛ, ə lɛɛ ɉu yɛ həli niɛ ɓa. 4Esau ə kpuluun yɛ li nəɠə laakwiɛn ɉi. Ə li, ə nəɠə nɛ̨nɛ̨ɓo, di wolo di kee ɓa, diɛ wɔlɔ. 5Yili pulu, Esau yɛ Ɉakɔbə ɓa: «Gbɛɛ nuą ɓə ə́ pului?»
Ɉakɔbə yɛ mą: «Nu kan mɛ̨inɛ̨ɛ̨i Yálá ə gɛ, ə́ wɔ tímun ma, diɛ ka.»
6Ɉakɔbə nwɔ tínɛ̨ąą di pa tɔwɔ, da di lonnii, di kwɛli hvilɛn Esau ɓa. 7Yili pulu, Lea da nonnii di pa di kwɛli hviɛlɛn, nąą pulu Ɉosɛfə da nee Rasɛlə diɛ kpɛli di lɛɠɛ laa. 8Esau yɛ Ɉakɔbə ɓa: «Lə kpɔ ɓə yɛ́ ə́ pa gɛ a daatɛlɛɛ kpulu kɛnɛ̨i ŋɛ̨i kwa diɛni ku kɛi kwiɛn?»
Ɉakɔbə yɛ mą: «Yili ɓə ŋį́ kɛ bɔ ŋį́ ɲɛ̨́i lɛlɛ la nwɔ́ mɛ̨nį nąmu yəi.»
9Esau yɛ Ɉakɔbə ɓa: «Nə́ɠə, yii ɲə́i bɛliɛi mą́ą́, ə́ yee kɛ ə́ wɛi tii ɓa.»
10Ɉakɔbə yɛ Esau ɓa: «Ną́n, hvó gɛ tii! Akɛ yaa ɲɛ̨́imąąwɛli kaa, ə́ yee hee mu; hvo gaai, ə́ yee heei ŋɛ̨i yáá mo mú, gaa ɲɛ̨́i ɓa yɛ, kwa Yálá kwa ku kee kaa. 11Mɛ̨inɛ̨ɛ̨ ŋɛ̨i ŋį́ paa la, ə́ yee hee mu. Mąąhɔlɔɓo, Yálá ə ɲɛ̨i lɛlɛɛ hee mą́ą́, yii kpɔ ŋį́ kɛ bɔ, gəlee kaa ɲə́i.»
Ɉakɔbə ə kpala kpɔ Esau la, yili ə ɲee hee mu. 12Esau yɛ Ɉakɔbə ɓa: «Gwəli, ŋį́ ə́ tɔɔ bələi.»
13Ɉakɔbə yɛ Esau ɓa: «Nwɔ́ mɛ̨nį nąmu, ə́ kili kaa ɉu yɛ́ lɛapɛlɛɛ hiɛ kɛ laa walaai, ɛlɛɛ, ɓɛlaa kɔ̨nwɔ̨leeɠaa da nįŋɛ̨ kɔ̨nwɔ̨leeɠaa kaa ɲə́i, nuą ka kpɔlu di la a mɔlɔ, ə mą kɛ a hvóló tɔ̨nɔ̨ hiɛ, daatɛlɛɛ pɛlɛɛɠaa da haa. 14Yili ɓa, gɛ́ nwɔ́ mɛ̨nį nąmu ə tɛɛ dɔ́wɔ, gáá pulu gɛ́ pa kwa nɛapɛlɛɛɠaa da daatɛlɛɛɠaa, ku kaa pai ku həli nwɔ́ mɛ̨nu nąmu ɓa Seirə.»
15Esau yɛ Ɉakɔbə ɓa: «Nuąi ŋɛ̨i bɔ́, gáá bələ tɔ̨nɔ̨ lɛɛi ɓɛ, ka diɛni ka pa.»
Ɉakɔbə yɛ mą: «Ə gɛ di lə kɛ, yáá nwalawalaamun gɛ a ə́ ɲɛ̨i lɛlɛɛ heɛ mą́ą́.»
16Mąą yələi, Esau ə bulu pənə yɛ li Seirə. 17Ɉakɔbə yaan, yɛ li Sukotə, nąą ɓə ə daa pu laa, da nwɔ taatɛlɛɛɠaai yii kə́lə́, yili ɓə gɛ, diɛ nąą laa hee a Sukotə, mukulaa ɓaa: «Kə́lə́ la.»
Ɉakɔbə ə hee Sisɛmə
18Həɠəi Ɉakɔbə ə mo Aramə, ə pa a gɔlɔi pɔ̨nɔ̨ɔ̨, ə hee Sisɛmə daai, Kanaan lɔi hu. Hvo hee daai leelee, ə hee nąą kwɛlɛ. 19Ɉakɔbə ə gɛɛnąą tii ya Sisɛmə nąn Hamɔrə lonnii yəi a walikwələ nwun dɔ̨nɔ̨; nąą ɓə ə taa pu laa. 20Ə haláá kulɔi pɛli gɛɛnąąi tii, ə naa hee a: Yálá, Israɛlə nwɔ Yálá.
Currently Selected:
Gɔwɔ tɔɔi 33: BKPDCG
Highlight
Copy
Compare
Share
Want to have your highlights saved across all your devices? Sign up or sign in
