Lɛɛ gbɔwɔ ɓa 36
36
1Besalɛlə, Oholiavə, da nuąi kpɔ Yai-Laa ə di kɔ́ a kili mɛ̨nį kɔ́lɔn ŋąą da yɛlɛ, di pɛli bɛlɛ́ mąą həɠɛɛ nwɔ kóló kɛ pələ kɔ́lɔn ɉi. Mąąnɛ̨ɛ̨ di mɛ̨nį kəlee kɛ, yɛ bələi Yai-Laa ə mo la. 2Moisə ə Besalɛlə da Oholiavə təli, da nuąi kpɔ Yai-Laa ə di kɔ́ a kili, di kəlee di kɛi pa góló ɓa, a di kwəinɛ̨ɛ̨, diɛ góló kɛ. 3Ɉɛnŋąąi kpɔ Israɛlə lonnii di paa la bɛlɛ́ mąą həɠɛɛ mąą mɛ̨nį ɓa, di ɉon Moisə yəi, diɛ gólóɠaa kɛ la, kɛlaa, nuą di kɛi lɔ pa a da kɛnɛ̨ yələwala pɔ tɛitɛi kəlee. 4Ya ɓə ɲɛlɛ kóló kɛ nuąi kɛi góló huwui tamąąi tii kɛ bɛlɛ́ mąą mɛ̨nį ɓa, di kəlee di həɠə góló kɛɛnąą di pa, 5diɛ Moisə ɓa: «Yii nuą daa paa la, aa kɛnɛ̨ aa tɛɛ, yii ku kaa bɔ mą, aa tɛɛ gólóɠaai Yai-Laa ə vaa ɓo diɛ.» 6Moisə ə mo, di ɉukulɔ daa kwəi nuą diɛ, diɛ kɛ diɛ: «Nɛ̨ą da hinąą, nu ta hvo kɛa pa a hɛn da bɛlɛ́ mąą həɠɛɛ mąą mɛ̨nį ɓa.» Nuą di kpəla kɛa paa ɓa a hɛnŋąą. 7Ɉɛnŋąą di paa la, da pɛli kɛ gólóɠaa kɛi, gbəli yɛ lɛɛ.
Bɛlɛ́ mąąhəɠɛɛ
8Nuąi kpɔ kɛ di yɛlɛɛ góló kɛ nuą lɔwai, di bɛlɛ́ tɔɔ, di bɛli, di dɔɔ a həɠə ɓɛla pow, gwəlɛɛ, gbɔluɔ mu tɛɠiɛ, viliɓoɔ, gbɔluɔ gbələ tətə, di mąąkpɛ malakaɠaa mąą nįnįn gɛ mą. 9Ɉəɠə ɓɛla tɔ̨nɔ̨ kwɛa pələ ə kɛ a yee laa mą pow hveelɛ kɔ́w mɛ̨ihaaɓa, ɉəɠə ɓɛla tɔ̨nɔ̨ ɲąą kɛnɛ̨ pələ ə ɓo a yee laa mą nąąn, ɉəɠə ɓɛla kəlee kɛ pələ ə kɛ lɔ ti. 10Di ɉəɠə ɓɛla lɔɔli hee gee la di nɔɔli takpɛliɠaa hee lɔ tii gee la. 11Ɉəɠə ɓɛla lɔɔli dɔlɔɔ ti nwɔ həɠə ɓɛla kpəlii tii di gbulɔn ɲɛli kɛ a yeekali kpɔluɔ mu tɛɠiɛ, di gɛ lɔ tii a ɉəɠə ɓɛla veelɛnąą. 12Ɉəɠə ɓɛla tɔlɔɔ kpulɔn ɲɛli ə kɛ pow lɔɔli, ə ɓo lɔ nwɔ̨nɔ̨ tii veelɛnąą ɓa. 13Di ɉəɠə ɓɛla kpɛa-kpɛa hveelɛi tii hee gee la, a ɉəɠə kpulɔn gwɛliɠaa, gəlee ə kɛ lɔ yɛ həɠə ɓɛla tɔ̨nɔ̨.
14Yili pulu, di həɠə ɓɛla pow kɔ́w tɔ̨nɔ̨ pala a ɓolu ləɠa di gɛ a ɉəɠə pɛlɛ́ veelɛnąą, yili ɓə kɛi Yálá hee pɛlɛ́ mɛ̨i kpulu. 15Ɉəɠə ɓɛlai tii dɔ̨nɔ̨ gbən dɔɔ ɉu a kɛ a yee laa mą pow haaɓa, ɲąą kɛnɛ̨ yee ə ɓo a yee laa mą nąąn. Bow kɔ́w tɔ̨nɔ̨i tii kəlee ə kɛ a bɛliɛ a gee. 16Di ɉəɠə ɓɛla nɔɔli hɔlɔɔn gee la, di pənə di mɛ̨idai ti hɔlɔɔn gee la. 17Di yɛli pow lɔɔli hɛlɛn ɉəɠə ɓɛla gbəliɠaa wəlila a ɲɛli pow lɔɔli, di veelɛnąą nwɛi kɛ ti nwɔ̨nɔ̨ pow lɔɔli. 18Di wolo bɛlɛɛ pow lɔɔli pɛli ɉəɠə ɓɛla wəli la a ɓala kwɛli, ə gɛ, ɉəɠə ɓɛla kpɛa-kpɛa hveelɛi tii, diɛ pɛli di yee tooi gee hu, gəlee di kɛ a həɠə ɓɛla tɔ̨nɔ̨. 19Di ɓɛlaa hilɛ kɔ́lɔ kpɔlu da huwɔ kɔ́lɔ paa, di bɛlɛ ɉəɠə pɛlɛ́ veelɛ nąą tii mɛ̨i, ə kɛ a mɛ̨i kɛ hɛn.
20Di wulu ɓɛlaɠaa pɛli a kpitili, ə kɛ a ɉəɠə pɛlɛ́ ɉee mu hɛn. 21Nwulu ɓɛla tɛitɛi kəlee tɔɔ ɉu ə kɛ a yee laa mą pow, ɲąą kɛnɛ̨ pələ yɛ ɓo a yee laa mą tɔ̨nɔ̨ da gbulɔ. 22Nwulu ɓɛla kəlee ɲin ɉu kulaa kɛ, diɛ pɛli pilii di kee hu. Bələ ɓə di gɛ la a ɉəɠə pɛlɛ́ nwɔ wulu ɓɛlaɠaa kəlee. 23Di wulu ɓɛla pow hveelɛ pɛli ɉəɠə pɛlɛ́ ɉɛɠɛɛ pələ. 24Nwulu ɓɛla pow hveelɛi tii, di kɔ́wɔ ə kɛ di mu hveelɛ a wali kwɛli yɛ pɛli ɲin ɉu kulɔi hveelɛi ti ɓa. 25Ɉəɠə pɛlɛ́ ɲələi pələ, di wulu ɓɛla pow hveelɛ kɛ laa, 26gəlee tɛitɛi kɔ́wɔ yɛ ɓo mu hveelɛ hveelɛ a wali kwɛli. 27Ɉəɠə pɛlɛ́ voló tooi pələ, gbon ɲa pələ, di wulu ɓɛla mɛ̨ida kɛ laa, 28ə pɛlɛ wulu ɓɛla hveelɛ ɓa, ə kɛ ɉəɠə pɛlɛ́ gbon bələ nwəli la hveelɛi tii mąą mɛ̨nį ɓa. 29Nwulu ɓɛla hveelɛi ti lɔwai kulaai kɛ gee ɓa a nɛlɛɛ, kɛlaa, ɲələi pələ nwun ɉeɛ gee ɓa gbono tɔ̨nɔ̨ hu. Bələ ɓə di gɛ la a gəlee hveelɛi. 30Ɉəɠə pɛlɛ́ gbon bələ, wulu ɓɛla mɛ̨ihaaɓa ɓə kɛ laa, gɔwɔ yɛ ɓo pow kɔ́w mɛ̨ida, a wali kwɛli.
31Di naaŋąɠaa haɠa a kpitili wulu, di nɔɔli laa bələ tɔ̨nɔ̨ nwɔ wulu ɓɛlaɠaai kɔ́wɔ mu, 32di nɔɔli laa ɓɛ pələ bələ tɔ̨nɔ̨, di nɔɔli takpɛli laa voló tooi pələ. 33Naaŋą yii ŋɛ̨i pai kɛi ɉąąi, gaa pai laai nwulu ɓɛlaɠaa kəlee hąąi. 34Di hɛni ya hiɛ nwulu ɓɛlaɠaai tii kəlee diɛ da naaŋąɠaa, diɛ ɓə pai kɛi lɔi ɉɛni gbonoɠaai tii hu.
35Di həɠə ɓɛla ta pɛli a viliiɓoɔ da gbɔluɔ-mutɛɠiɛ, ɛlɛɛ həɠə ɓɛla kpɔluɔ gbələ tətə, viliiɓoɔ, diɛ ɓo a yeekali huwalawalaa, di mąąkpɛ malakaɠaa mąąnįnįn ɉəɠə mą a yɛlɛ. 36Di dɔɔmu nąąn bɛli a kpitili wulu, di hɛni yá lɔ mą. Dalanən bɛlɛɛɠaai tii kɛ mą, yɛ ɓo a hɛni, di gɔwɔ kɛ mu nąąn, a wali kwɛli.
37Di həɠə takpɛli pala a bɛ̨ɛ̨ viliiɓoɔ, gbɔluɔ mu tɛɠiɛ yɛ ɓo ɉu, gbɔluɔ gbələ tətə, a yeekali walawala di mąąpu. 38Nɔ̨nwɔ̨ lɔɔli tii, da di ton na hee hviɲɛɠaa, da di wɔ talanənŋąą, hɛni yá lɔɔ gəlee ɓa da gɔwɔ lɔɔli tii gaa a ɓala kwɛli.
Currently Selected:
Lɛɛ gbɔwɔ ɓa 36: BKPDCG
Highlight
Copy
Compare
Share
Want to have your highlights saved across all your devices? Sign up or sign in
