Lɛɛ gbɔwɔ ɓa 35
35
Ɉəɠə pɛlɛ́ tɔɔ mɛ̨nį
Hviitɔɔ yələ
1Moisə ə Israɛlə lonnii kəlee ŋąąkpɔn, yɛ diɛ:
«Mɛ̨nįɠaai Yai-Laa ə mo yɛ gu gɛ, diɛ ka: 2Hvoló mɛ̨ida yee mu, nuą da di mąą kóló kəlee kɛ, voló mɛ̨ihveelɛ yələ, a kɛ ka yəi a hvóló mąąwiaa, a Sabatə, a Yai-Laa nwɔ hvįįtɔɔ yələ. Nui lɔpee a kóló kɛ a mąą yələi, da baa. 3Ka hvo kɔ̨nɔ̨n ɲili nwɔ̨n ɉee ka yəi bɛlɛ́n a vįitɔɔ yələ, ɓɛi lɔpee ka kɛ laa.»
Israɛlə lonnii di Nįįhɔ̨nwɔ̨ kulɔ
4Moisə yɛ Israɛlə lonnii diɛ, mɛ̨nįi Yai-Laa ə mo ya ka:
5«Ka hɛnŋąą kulɔ a Yai-Laa nwɔɔ. Nui gwəinɛ̨ɛ̨, ə naa gwəi mɛ̨inɛ̨ɛ̨ kɛ Nąmu ɓa: hɛni, wali kwɛli, ɓala kwɛli, 6həɠə ɓɛla kpɔluɔ mutɛɠiɛ, gbɔluɔ gbele tətə, viliiɓoɔ, gwəlɛɛ, ɓooli ləɠa, 7Ɓɛlaa hilɛ kɔ́lɔ, di gbɔlu, nini kɔ́lɔ həɠə da kpitili, 8nwɔ̨n ɉee wulɔ, hɛn gun nɛ̨ɛ̨ɠaa a mąątí wulɔ pɛli hɛn, da lansan, 9berilə kwɛni da kwɛni lɛlɛɛ a gilɛn ɉəɠə mąą pu la da gəŋə mɛ̨i həɠə. 10Ɛlɛɛ, yɛlɛ kɛ nuąi kpɔ ka lɔwai, di pa, kólóɠaai Yai-Laa ə vaa ɓo, di gɛ, diɛ ɓaa: 11Bɛlɛ́ lon da gələ, mɛ̨i kpulu həɠə ɓɛla kpulɔn ɉɛnŋąą, bɛlɛ́ tɔɔ wuluɠaa, nwulu yiiɠaai da di laa di ɓɛlaa mɛ̨i, nwulu hɔlɔnŋąą, da di hvilɛn ɉiiɠaa. 12Mįnɛ̨ kəhi da gbəŋə wuluɠaa, naa kalan da ɉəɠə ɓɛlai da bɛlɛ ɲɛ̨i tɔwɔ. 13Daɓali da gbəŋə wuluɠaa, gwɛlɛ hɛnŋąą kəlee da ɉaláá lɔpɛin. 14Nwɔ̨n ɉee hɛn da gwɛlɛ hɛnŋąą, nwulɔ nwɔ̨n ɉee hɛn da nwɔ wulɔ. 15Lansan haláá kulɔ kəhi, da gbəŋə wuluɠaa, mąątí wulɔ, lansan di kaa pai gələn ɉi, da ɉəɠə ɓɛlai da ɉɛlɛn bɛlɛ́ laaləi. 16Ɉaláá hɛn da gəlee kələn gulɔ kəhi, da gɛɛli dɔɔ ɲɛ̨i tɔwɔ a ɓala kwɛli, gbɔnŋąą da gwɛlɛ hɛnŋąą kəlee, gəgən da gɔwɔɠaa; 17ɉəɠə ɓɛlaɠaa da ɉɛlɛn ɉaláá kulɔi ɲɛ̨i tɔwɔ, nwulu, da ɉu hon nwuluɠaa, da ɉəɠə ɓɛlai a kɛ gala laaləi; 18bɛlɛ́ tɔɔ wuluɠaa, gwəli tɔɔ wuluɠaa da ɲɛliɠaa, 19ɉaláá həɠəɠaai da kɛ góló kɛi ɉu, ɲokolo həɠəi a Aarɔn da nonnii di wɔɔ, yai da gɛ diɛ bɛlɛ́ mąąhəɠɛɛ mu.»
20Israɛlə lonnii kəlee di həɠə Moisə lííla. 21Yili pulu, nui lɔpee nąą wɛli ə kɛ mą, nui lɔpee kɛ naa gwəi mɛ̨inɛ̨ ə kɛ ɲəi, di paa la a Yai-Laa kɔ́ hɛn; Gəlee di kɛ a gee kaa kələ góló kɛ hɛn, da díɓoɠaa pai kɛi mu mąą mɛ̨nį kəlee ɲɛ̨i kulɔ mɛ̨nį, da ɉaláá həɠəɠaa pɛli mɛ̨nį. 22Hinąą da nɛ̨ąąi kɛ di kwəinɛ̨ɛ̨, di kɛi pa a di wəlii kwɛliɠaa, gbonoɠaa da kwɛɛnŋąą, gəlee di ɓo a hɛni, diɛ Yai-Laa kɔ́ la. 23Nuąi kpɔ həɠə kpɔluɔ mu tɛɠiɛ ə kɛ di yəi, da gbɔluɔ gbələ tətə, da mahiɓoɔ, da həɠə kwəlɛɛ pə-pə, ɓolu ləɠa, ɓɛlaa kɔ́lɔ həɠəi di gbɔlu, da nini kɔ́lɔ həɠəɠaa, di kɛi pa a diɛ. 24Nuąi kpɔ da pɛli kɛ pai a hɛn Yai-Laa pɔ, di kɛi pa a: wali kwɛli, ɓala kwɛli. Nuąi kpɔ kpitili wulu ə kɛ di yəi, di kɛi paa la gólóɠaa tii kɛ mɛ̨nį ɓa. 25Nɛ̨ąi kɛ di wəlɛɛ yee pɛnɛ̨, di kɛi yee pɛnɛ̨ diɛ paa la, yee kpɔluɔ mu tɛɠiɛ, gbɔluɔ gbələ tətə, mahiɓoɔ, gwəlɛɛ pə-pə. 26Nɛ̨ąi kɛ di wəlɛɛ ɓolu ləɠa pɛnɛ̨i, di kɛi bɛnɛ̨. 27Galanɉonŋąą diɛ pa a berilə kwɛniɠaa da kwɛniɠaa mąą haɠaa lɛlɛɛɠaa, gilɛn ɉəɠə mąą pu mɛ̨nį ɓa, da gəŋə mɛ̨i həɠə. 28Ə mą kɛ ɉɛn gun nɛ̨ɛ̨ɠaa da nwulɔ nwɔ̨n ɉee mɛ̨nį ɓa, mąątí wulɔ da lansan. 29Ɉinąą mąn nɛ̨ąą mąn, diɛi kpɔ kɛ di kwəinɛ̨ɛ̨, di kɛi di muhəɠə, diɛ pa a hɛnŋąą, gólói Yai-Laa ə Moisə tí la gɛ mɛ̨nį ɓa. Diɛi kɛ di kwəinɛ̨ɛ̨ Yai-Laa pɔ a Israɛlə lon gɛ pələ kpɔ-kpɔ.
Besalɛlə da Oholiavə di di yee pɛlɛ góló ɓa
30Moisə yɛ Israɛlə lonnii diɛ:
«Yai-Laa aa Uri lon Besalɛlə həɠə ɉu, yai gaa a Hurə mąnįn, Ɉuda huwuhu mun. 31Aa gɔ́ a Yálá nwɔ Kilii, ə gɛ, mɛ̨nį hu kpɛ kili, nwun gɛ ɉulaa, da mɛ̨nį kɔ́lɔn ŋąą, yɛ pɛli yɛlɛ kɛi la. 32Yɛ yɛlɛ kóló kulɔ, yɛ hɛni kóló kɛ, wali kwɛli da ɓala kwɛli, 33kwɛni mąąhaɠaa, wulu haɠaa da yɛlɛ kóló lɔpee gəlee. 34Yálá aa mɛ̨nį ɲąąlɛ kili tɛɛ bɔ, yaa da Oholiavə Ahisamakə lon Dan huwuhu mun. 35Aa di kɔ́ a mɛ̨nį kɔ́lɔn gili kɛnɛ̨, diɛ pɛli kóló huwui lɔpee gəlee kɛi a yɛlɛ, kwɛni haɠa kóló, ganą hee kóló, diɛ pɛli həɠə palai a ɲɛ̨i pɛ̨ɛ̨, a viliiɓoɔ, a gbɔluɔ mu tɛɠiɛ, gbɔluɔ gbələ tətə, gwəlɛɛ pə-pə, da yɛlɛ huwui lɔpee gəlee kɛ nuą di wɔ kóló.»
Currently Selected:
Lɛɛ gbɔwɔ ɓa 35: BKPDCG
Highlight
Copy
Compare
Share
Want to have your highlights saved across all your devices? Sign up or sign in
