Lɛɛ gbɔwɔ ɓa 37
37
Bɛlɛ́ mu hɛnŋąą
1Besalɛlə ə mįnɛ̨ kəhi pɛli a kpitili wulu, gwɛa yee ə ɓo a yee laa mą hveelɛ da gbulɔ, ɲąą kɛnɛ̨ yee ə ɓo a yee laa mą tɔ̨nɔ̨ da gbulɔ, dɔɔ mɛ̨i ə ɓo a yee laa mą tɔ̨nɔ̨ da gbulɔ. 2Ə hɛni yá lɔ mą, nąą kəlee ɉu pələ da gɔlɔ ɓa, ə gwɛlɛ laa a hɛni. 3Ə gbono nąąn bɛli a hɛni, a gɔwɔ nąąn nwɔɔ, ɓɛ pələ gbono hveelɛ, ɓɛ pələ gbono hveelɛ. 4Ə gbəŋə wulu hveelɛ pɛli a kpitili, ə hɛni yá lɔ mą. 5Di nɔ mįnɛ̨ kəhi nwɔ gbonoɠaa hu, diɛ gəhi kpəŋə la.
6Di gəhi laa kalan bɛli a hɛni huwaa hva-hva, gwɛa yee ə ɓo a yee laa mą hveelɛ da gbulɔ, ɲąą kɛnɛ̨ yee ə ɓo a yee laa mą tɔ̨nɔ̨ da gbulɔ. 7Ə mąąkpɛ malakaɠaa hveelɛ pɛli a hɛni, ə di tɔɔ gəhi laa kalan nwəli la hveelɛi ɓa. 8Di dɔ̨nɔ̨ tɔɔ nwəli la ɓɛ pələ, di dɔ̨nɔ̨ tɔɔ nwəli la ɓɛ pələ, di kanąnŋąą gəhi laa kalan ma, nwəli la hveelɛi ɓa. 9Di ɲɛ̨i heɛ gəhi laa kalan mɛ̨i di koon yɛ mɛ̨i kpulu.
Yálá kɔ́ taɓali
10Yili pulu, di taɓali pɛli a kpitili wulu, gwɛa yee ə ɓo a yee laa mą hveelɛ, ɲąą kɛnɛ̨ yee ə ɓo a yee laa mą tɔ̨nɔ̨, dɔɔmɛ̨i ə ɓo a yee laa mą tɔ̨nɔ̨ da gbulɔ. 11Di hɛni yá lɔ mą, di gwɛlɛ laa a hɛni. 12Di ɉee hɛn gɛ mu a yee ɓa ŋą tɔ̨nɔ̨ di hɛni yá lɔ mą di gwɛlɛ laa a hɛni. 13Di gbono nąąn bɛli a hɛni, di di hee nwəli la nąąn ma, gɔwɔ nąąn gwɛlɛ. 14Gbonoɠaai tii lɛɠɛɛ kɛ ɉee hɛn gwɛlɛ, diɛ pɛli gbəŋə wuluɠaa lɔi ɉu. 15Di gbəŋə wuluɠaa pɛli a kpitili wulu, di hɛni yá lɔ mą, ə gɛ diɛ daɓali kpəŋə la. 16Di daɓali ɲą hɛnŋąą pɛli a hɛni gəgənŋąą, gbələkɔɔɠaa da Yálá kɔ́ lɔɔ pu hɛnŋąą.
Nwulɔ nwɔ̨n ɉee hɛn
17Yili pulu, di nwulɔ nwɔ̨n ɉee hɛn bɛli a hɛni huwaa hva-hva, di bɛli, gɔwɔ da gbinį, da gɔnŋąą, gbulɔn naɠaa di kanąnŋąą di kee ɓa, diɛ ɓo lɔ tanɔ̨n. 18Gɔn mɛ̨idai, ɉaaɓa ə kɛ bələ tɔ̨nɔ̨, ɉaaɓa ə ɓo bələ tɔ̨nɔ̨. 19Gɔn mɛ̨idai tii dɛitɛi kəlee gbulɔn ə kɛ ɉu haaɓa, nwun ə ɓo ɲą yɛ yee powa. 20Gbini nwɛi, gbulɔn ə kɛ ɉu nąąn, di nwun ə ɓo di ɲą yɛ yee powa. 21Gɔn veelɛ tɛitɛi kəlee mu, gbulɔn dɔ̨nɔ̨ ə kɛ laa. 22Gbini, gɔnŋąą da gbulɔnŋąą kəlee, di di pu lɔ tanɔ̨n a hɛni huwaa hva-hva. 23Di nwɔ̨n ɉee hɛn mɛ̨ihveelɛ pɛli da nwɔ̨n ɉəɠə hɛnŋąą, ə mą kɛ nuwu kələ hɛnŋąą; gəlee ə ɓo a hɛni huwaa hva-hva. 24Di nwɔ̨n ɉee hɛn da bɔ hɛnŋąą kəlee pɛli a hɛni huwaa hva-hva, kilə pow haaɓa.
Ɉɛn gun nɛ̨ɛ̨ kələn ɉi
25Yili pulu, ə ɉɛn gun nɛ̨ɛ̨ kələn ɉii pɛli a kpitili wulu, gwɛa yee ə ɓo a yee laa mą tɔ̨nɔ̨, ɲąą kɛnɛ̨ yee ə ɓo a yee laa mą tɔ̨nɔ̨, nąą kəlee pɛliɛ a gee, dɔɔmɛ̨i ə ɓo a yee laa mą hveelɛ da mįnɛ̨ɠaa kəlee di puɔ lɔ kɛ tanɔ̨n. 26Di hɛni huwaa hva-hva yá hiɛ daɓali ɓa, mįnɛ̨ɠaa kpɛli mąn, di gwɛlɛ laa a hɛni di dinɛ̨n mą di doo gee hu. 27Di gbono hveelɛ pɛli a hɛni, di nɔ nwəli kwɛlɛ hveelɛi ɓa, diɛ pɛli gbəŋə wuluɠaa lɔi ɉu. 28Di gbəŋə wuluɠaa pɛli a kpitili wulu, di hɛni yá hiɛ mą.
29Di mąątí wulɔ mąąhəɠɛɛ pɛli, da lansan da gələn, nwulɔ pɛli nuą kɛ kóló li.
Currently Selected:
Lɛɛ gbɔwɔ ɓa 37: BKPDCG
Highlight
Copy
Compare
Share
Want to have your highlights saved across all your devices? Sign up or sign in
