Lɛɛ gbɔwɔ ɓa 32
32
Israɛlə ə Yálá nwɔ mįnɛ̨i kala
Di Nįŋɛ̨ lon bɛli a hɛni
1Yii kɛa nuą di gaa diɛ Moisə aa lamu ɲee ɓa, nuą di pa a di kpulu Aarɔn kwɛlɛ diɛ mą: «Ə́ muhəɠə, ə́ hali pɛli kuɔ, ə pələ kulɔ a kuɔ, hvó gaai, Moisə ŋɛ̨i ku kulɔ Eziptə lɔi hu, ku ɲɛ̨i hvo kɛa mą, mɛ̨nįi laa mą, ku hvo gɔlɔn.»
2Aarɔn yɛ diɛ: «Nwəlii kwɛliɠaa tii ka nɛ̨ąni, ka lonnii hinąą da ka lonnii nɛ̨ąą wəlii a hɛni, ka pa a diɛ bɔ́.»
3Nuą kəlee di pa a nwəlii kwɛliɠaa, di dɛɛ Aarɔn pɔ. 4Aarɔn ə ɉon di yəi, ə bɛli a nįŋɛ̨ lon mąą nįnįn. Nąąlɔwai, nuą diɛ kɛa kɛ diɛ: «Israɛlə ka gu wɔ yálái ka; yai gu kulɔ Eziptə lɔi hu.»
5Yili nąą kaai Aarɔn ə mo, ə nɛɛ mą, ə haláá kulɔi pɛli nįŋɛ̨ lon mąą nįnįn tii lííla. Yili pulu, ə nolo ɓo, yɛ diɛ: «Tínąą hvólói kaa a Yai-Laa nwɔ hɛli.» 6Mąą yələ laa ɓoɔ, yələwala pɔ, nuą di haláá kulɔ nįŋɛ̨ lon tii ɓa, yii da gəlee kələn, da nɛ̨ɛ̨laa haláá. Nu kəlee di hee kɛa, diɛ di laa mį́i, diɛ di kpələ, yili pulu, di di muhəɠə diɛ kwəinɛ̨ɛ̨ kulɔ.
7Nąąlɔwai Yai-Laa yɛ Moisə ɓa: «Pənə ə́ yɛɛ, mąąhɔlɔɓo, ə wɔ́ nuąi ŋɛ̨i ə́ di kulɔ Eziptə lɔi hu, daa di kɔ́hɔɓo. 8Niɛwooɠaai ŋɛ̨i ŋį́ dɛɛ, di pɔ, daa di pulu tɔɔ mą, daa nįŋɛ̨ lon bɛli di kpɔɔ ɓa, diɛ pɛlɛ gɔwɔ mu, diɛ haláá kulɔ mą, diɛ kɛ mą: Israɛlə, ka gu wɔ yálái ka, yai gu kulɔ Eziptə lɔi hu.» 9Yai-Laa yɛ nwɔ̨nɔ̨ Moisə ɓa: «Ŋą́ą́ nuąi ŋɛ̨i mąąkpɛɛ, di kaa a nuąi di wəli walawalaa. 10Yii hu kɛa, Moisə, nɛ́ɛ́ laa ŋį́ nwɔ́ liiŋąnwąnąi yɛɛ di mɛ̨i, gáá gəlee nwun na pilii kpɔ tɛ̨ɛ̨tɛ̨ɛ̨, yili pulu, yɛ́ ɓə kɛa gáá pai ə́ huwu ɓɛlɛi.»
11Kɛlaa, Moisə ə nɛ̨ɛ̨mąą hvə Yai-Laa ɓa, yai a nwɔ Yálá yɛ mą: «Ə́ líílaa! Yai-Laa, lə mɛ̨nį ɓa yá ə́ lii ŋąnwąną nuąi ŋɛ̨i pɔ? Yɛ́ lɔ ɓə di kulɔ Eziptə lɔi hu a ə́ wɔ yee walawala laa, yii hɛn da hva tɔɔ na. 12Akɛ yá nuąi ŋɛ̨i kəlee nwun na pili yɛ pələi tii yaa mo la, Eziptə nuą kaa pai kɛi diɛ: ‹Ə́ di kulɔ lɔ Eziptə lɔi hu a gbąnąlaa, ə gɛ, ə́ di nwun na pili ɓɛ, ɲee koo mu, di laa ə kpɛɛ ɓɛ lɔi mɛ̨i.› Ee kə! Yai-Laa! Ə́ líí laa, Hvó mɛ̨nį ɲɔ̨n naa ə́ wɔ́ nu huwui ɓa. 13Ə́ kiliŋąhiɛ ə́ wɔ tínuąi diɛ, diɛi ɓaa: Abrahamə, Isaakə, da Israɛlə, diɛi wɔlɔ ə́ ə́ kwɛla diɛ a ə́ kpɔwɔ, yɛ́ kɛ diɛ: ‹Ŋą́ ka huwu ɓɛlɛ, ŋį́ damą yɛ yələkɔlɔn ɉu pɛmɛ̨lɛ̨n-gɔw, ɛlɛɛ, nɔi ŋɛ̨i ŋą́ vaa ɓo kaa, ŋį́ gəlee tɛɛ ka huwu pɔ, ə kɛ a di kwɛlin a yələ kəlee da nwɔɔ.›»
14Mɛ̨nį nwąnąąi Yai-Laa ə kɛi pa naai nwɔ nu huwui ɓa, ə yili həɠə mą.
15Moisə ə pənə ə ɲee yɛɛ, gwɛni ɓɛla hveelɛi ŋɛ̨i Yálá nwɔ ton ə kɛ mą bələ kəlee hveelɛi, yɛ ɓo ɲəi. 16Gwɛni ɓɛlaɠaa di kɛ a Yálá kɛ tíi, ɉɛɓɛ́ɠaai kɛ mą, Yálá ɓə bɛ̨ɛ̨, ɉaɠaa gwɛni ɓa. 17Nąąlɔwai, Ɉosue ə nuą tómą woo mɛ̨n, yɛ Moisə ɓa: «Kɔ kɔ́ woo kaa tɔɔi muwu la!»
18Moisə yɛ mą:
«Kɔ nɛ̨ɛ̨ nuą diɛ woo hvəli,
kɔ́ kalaa nuą diɛ woo hvəli nwɔ̨nɔ̨.
Kɛlaa, yii tooi nwə́lii, gaa a wələ woo.»
19Di kɛɛ lɛɠɛi muwu la, di nįŋɛ̨ lon gaa, nuą daa wələ yɛli tinɛ̨n mą. Moisə lii ə holi kpɔ kɛnɛ̨, gwɛni ɓɛlaɠaa ti kɛ ɲəi, ə bili, gəlee hu ə yali ɲee kɔ́wɔ la. 20Nįŋɛ̨ lon tii di bɛli, Moisə ə gələn, ə vuŋɔ, ə bu yái, ə ɲá tɔɔ Israɛlə lonnii la. 21Moisə yɛ Aarɔn ɓa: «Lə ɓə nuą ŋɛ̨i di gɛ a yɛ́, yaai ə́ di yee lɔ nɛ̨ŋɛ̨n gɛnɛ̨i ŋɛ̨i hu?»
22Aarɔn yɛ Moisə ɓa: «Nwɔ́ mɛ̨nį nąmu, hvó ə́ líiholi! Yɛ́ kpinįi gbaɠala kaa yɛ́, nuą ŋɛ̨i di wɔ kiliŋąhiɛ a li lɔ mɛ̨nį ɲɔ̨n bɔ pələ. 23Di kɛ mą́ą́: ‹Hali pɛli ə́ dɛɛ ku pɔ, ə pələ kulɔ a kuɔ; hvó gaai, Moisə ŋɛ̨i ku kulɔ Eziptə lɔi hu, mɛ̨nįi aa laa mą, ku hvo gɔlɔn.› 24Ŋą́ di mąąningɛ, gɛ́ diɛ: ‹Gbɛɛ ɓə hɛni kaa ɲəi?› Di gulɔ di wəliiɠaa, di dɛɛ bɔ́, ŋį́ ɉəɠeen nwɔ̨n ɉu, ŋį́ bu ə kɛ a nįŋɛ̨ lon ŋɛ̨i.»
25Moisə ə gaa yɛ nuą daa di kwɛli tee, Aarɔn aa kɛ di lɛɛ laa, diɛ di yee lɔ kpɛli-kpɛli mɛ̨nįɠaa hu, di yowoɠaa ɲɛ̨i ɓa. 26Yili hu, Moisə ə tɔɔ daa kpala, yɛ diɛ: «Yai-Laa nwɔ nuą, ka lɛɠɛ mą́ą́!»
Levi huwuhu nuą kəlee di di ɲąą kpɔn gwɛlɛ.
27Yɛ diɛ: «Mɛ̨nį Yai-Laa Israɛlə nwɔ Yálá kaa moi ya ka. ‹Nu kəlee ə nwɔ kɔ-kɔ ɓɔwai kpulɔn ɉąą, ka tɛɛ daa kwəi, bɛlɛ́ɠaa laaləi, ka ka kaayɔwɔɠaa paa da ka ɓɛlaa.›»
28Levi huwuhu nuą di Moisə wooi tii pɔ mɛ̨nį kɛ, nuąi haa a volói tii, da pɛli kɛ nu waa haaɓa kulɔi. 29Nąąlɔwai, Moisə yɛ diɛ: «Kaa kpinįi ɓə kaa ka kpɔwɔ hee a Yai-Laa nwɔ nuą, mąąhɔlɔɓo ka hvo ɲɔw li ka lonnii paai da ka kaayɔwɔɠaa. Gɛ́ Yai-Laa ə́ lúwɔ́ too ka kəlee kaa háákələi.»
Moisə ə nɛ̨ɛ̨mąą hvə Yálá ɓa
30Mąą yələ laa ɓoɔ, Moisə yɛ nuą diɛ: «Kaa nɛ̨ŋɛ̨n gɛnɛ̨ həɠə, kɛlaa, dɛ́ hiɛ ka yiihu Yai-Laa pɔ pələ, gbəli hu, gaa lii hvaai mą ə ka wɔ nɛ̨ŋɛ̨n mąą hvaalɛɛ.»
31Moisə ə pənə ə li Yai-Laa pɔ, yɛ mą: «Nuąi ŋɛ̨i daa nɛ̨ŋɛ̨n gɛnɛ̨ həɠə, daa di kpɔɔ hali pɛli a hɛni. 32Kɛlaa, akɛ yá hvaa mą, ə́ di wɔ nɛ̨ŋɛ̨ŋąą mąą hvaalɛɛ, a wala kɛ ti, ɉɛɓɛ́i ŋɛ̨i Ə́ náá pɛ̨ɛ̨ ɉu nwaa.»
33Yai-Laa yɛ Moisə ɓa: «Nui nɛ̨ŋɛ̨n ɉəɠə mą́ą́, ya ɓə Ŋą́ naa waa nwɔ́ hɛɓɛ́i hu. 34'Li kɛa yiihu a nuą, ɓɛi ŋį́ naa hvaa ɓo yɛ́, ɛlɛɛ, nwɔ́ malaka ɓə pai hvilɛn ɉi ə́ tɔwɔ. Kɛlaa, gáá pai di hutɔɔi a yələ ta, di wɔ nɛ̨ŋɛ̨nŋąąi mąą mɛ̨nį ɓa.»
35Yai-Laa ə nuą kɛlɛ, mąąhɔlɔɓo, di nįŋɛ̨ lon bɛli, Aarɔn ɓə bɛli di yəi.
Currently Selected:
Lɛɛ gbɔwɔ ɓa 32: BKPDCG
Highlight
Copy
Compare
Share
Want to have your highlights saved across all your devices? Sign up or sign in
