Lɛɛ gbɔwɔ ɓa 31
31
Yálá hee pɛlɛ́ mu kóló kɛ nuą
1Yai-Laa yɛ Moisə ɓa:
2«Ə́ wəli tɔɔ! Ŋą́ą́ Besalɛlə həɠə ɉu, yaai gaa a Uri lon yɛ ɓo a Hurə mąnįn Ɉuda huwuhu. 3Ŋą́ą́ gɔ́ a Yálá nwɔ Kilii, ə gɛ, mɛ̨nį hu kpɛ kili, nwun gɛ ɉulaa, da mɛ̨nį kɔ́lɔnŋąą ə kɛ ɲəi, yɛ pɛli yɛlɛ kɛi la. 4Yɛ pɛli kólóɠaa kili ɓoi yɛ gɛ a yɛlɛ, a hɛni a wali da ɓala kwɛli. 5Yɛ pɛli kwɛni walawala lɛlɛɛɠaa mąą haɠai; bɛliɛ wulu haɠai, yɛ pɛli kóló huwui lɔpee gəlee kɛi. 6Ŋą́ą́ Ahisamakə lon Oholiavə hvilɛn bɔ a mąąkpɔn mąą ɓomun; gaa a Dan huwuhu mun da. Ɛlɛɛ ŋą́ą́ mɛ̨nį hu kpɛ kili tɛɛ gilimąą nuą tii dɛitɛi pɔ; Mɛ̨nįɠaa kpɔ tii ŋį́ ə́ tí la, diɛ pɛli gəlee kɛi. Mɛ̨nįɠaa tii ɓaa: 7Gee kaa kələ; Mįnɛ̨ kəhi naa kalan ti mɛ̨i, gələ mu hɛnŋąą kəlee. 8Ɉaláá kulɔi da gwɛlɛ hɛnŋąą kəlee, nwulɔ nwɔ̨n ɉee hɛn, yai bɛliɛ a hɛni leelee, da bɔ hɛnŋąą kəlee; lansan gələn ɉaláá kulɔi, 9ɉaláá kulɔi tii da daatɛlɛɛɠaa kələn naa Yálá ɓa, da gwɛlɛ hɛnŋąą kəlee. Ɲá pu hɛnɲaŋą kɛnɛ̨ da gɔwɔɠaa. 10Ɉaláá laa həli həɠəɠaa yai a Aarɔn nwɛi, da nonnii, 11nwulɔ mąąhəɠɛɛ da ɉiɛ nuą diɛ, lansan ə́ kaa pai gələn ɉii bɛlɛ́ mąąhəɠɛɛ mu, mąąnɛ̨ɛ̨ di di kɛ kpɔlɔ ti ɲą́ą́lee, yɛ bələi ŋį́ ə́ tí la.»
Túwɔ́ yələ mąą mɛ̨nį
12Yai-Laa yɛ Moisə ɓa:
13«Mo Israɛlə nuą diɛ, yɛ́ diɛ: Ka nwɔ́ túwɔ́ yələɠaa mąąwiɛ. Mąąhɔlɔɓo, gwa kaani gu lɔwai mɛ̨nį kɔ́lɔn bələ li a yələ kəlee. Ə gɛ, nuą diɛ pɛli gbaɠala kaai diɛ kɛ Ɲą́ą́ Yai-Laa, ɲą́ą́ ɓə ka mąąhəɠə. 14Mąąnɛ̨ɛ̨ ka túwɔ́ yələ mąąwiɛ, mąąhɔlɔɓo, hvóló mąąhəɠɛɛ li ka yəi. Nui a volói tii ɓɛlɛkpɛɛ mą, mąąnɛ̨ɛ̨ di baa. Ɛlɛɛ, nui a kóló kɛ a mąą yələ, mąąnɛ̨ɛ̨ di naa kulɔ Israɛlə lonnii lɔwai. 15Hvóló mɛ̨ida yee mu, nuą da di mąą kólóɠaa kɛ. Kɛlaa, voló mɛ̨ihveelɛ yələ, vįitɔɔ yələ li. Volói tii kaa a Yai-Laa nwɔɔ. Nui lɔpee a kóló kɛ a túwɔ́ yələ da baa. 16Mąąnɛ̨ɛ̨ Israɛlə lonnii di túwɔ́ yələ mąą mɛ̨nį ɲɛ̨i kulɔ, di di hvitɔɔ la, yələ kəlee mɛ̨nį li kpɛɛ hvo mą. Kwɛlan gəlee yee mu. 17Yili ɓə pai kɛi kwa Israɛlə lonnii ku lɔwai a kili lɛɛ ɉu hɛn, diɛ kɛ Yai-Laa ə yələkɔlɔn da lɔi di pɛli a hvóló mɛ̨ida, mɛ̨ihveelɛ yələ ə vįitɔɔ, ə vina kulɔ.»
18Yii kɛa Yálá ə kpɛɛ a mɛ̨nįɠaa tii ɓoɔ Moisə ɓa, Sinai yee nwuɔ̨, ə mįnɛ̨ kwɛni ɓɛla hveelɛi tɛɛ bɔ, yii Yálá yaa kpinį ə bɛ̨ɛ̨ a ɲee.
Currently Selected:
Lɛɛ gbɔwɔ ɓa 31: BKPDCG
Highlight
Copy
Compare
Share
Want to have your highlights saved across all your devices? Sign up or sign in
