Lɛɛ gbɔwɔ ɓa 33
33
Di pənə di ɉiɛ kpala tɔɔ
1Yai-Laa yɛ Moisə ɓa: «'Həɠə gɛɛnąą ŋɛ̨i ɓa, ka nuą ŋɛ̨i ə́ di kulɔ Eziptə lɔi hu, ka li, ɓɛi ŋį́ nąą laakwɛlanmo Abrahamə Isaakə da Ɉakɔbə ni diɛ, gɛ́ gwɛ́la kpɔ diɛ a gbɔ́wɔ́ kpinįi, gɛ́ kɛ diɛ: ‹Ka huwu ɓə gáá nɔi ti tɛɛi bɔ.› 2Gáá pai malaka hvilɛn ɉi ka tɔwɔ, ŋį́ Kanaan nuą Amɔrə nuą Hɛtə nuą, Perizi nuą, Hivi nuą, da Ɉebusə nuą kpɛ ka tɔwɔ. 3Ka lɔ nɔi ti hu, ɓɛi hɛn gəlee a lɛlɛ laa; Ɲą́ą́ gbinį lee və́ pai lɛɛi ka lɔwai, gu hvo li laa, mąąhɔlɔɓo, nu huwu nwun nwalawalaa ɓaa a kaa; ə gɛ, və́ pa ka hu kala kpɔ tɛ̨ɛ̨tɛ̨ɛ̨ bələi.»
4Ɓɛlɔwai nuą di mąąwɛli woo ti mɛ̨n na, di kəlee di bu mą a wɔlɔ. Nu ta lɔpee hvo kɛa nwɔ hɛli həɠə too gwąną. 5Yai-Laa yɛ Moisə ɓa: «Mo Israɛlə lonnii diɛ, yɛ́ diɛ: ‹Nu huwu nwun nwalawala ɓaa a kaa, ŋį́ mą kɛ diɛ, gáá lɛɛi ka lɔwai, ə mą kɛ a hvóló tɔ̨nɔ̨ kpɛli, ŋą́ nəi ka hu kala. Ə həli kani kaa! Ka ɉɛli həɠəɠaa kulɔ ka kwąną, bələi gɛ́ ŋį́ pa ka hon na, gɛ́ pɛli bələ kaai.›» 6Israɛlə lonnii di ɉɛli həɠəɠaa kulɔ di kwąną, di həɠə Horɛbə.
Gee kaa kələ
7Moisə ə gelə tɔɔ kwɛa la muwu ɓa, ə naa hee a: Kee kaa kələ. Nui lɔpee a kɛ bɔ ə Yai-Laa kwəi mɛ̨nį kɔ́lɔn, a kulɔ ə li gee kaa kələ mu daa pulu. 8Ɛlɛɛ, Moisə a kɛi kɛ li gee kaa kələ mu, nɔi lonnii kəlee da kulɔ di tɔɔ di yəi bɛlɛ́ laaləi, di ɲɛ̨i ə lɛɛ Moisə ɓa, ə lɔ gee kaa kələ mu. 9Moisə a lɔ kɛ gee kaa kələ mu, dulɔ kpinįn a yɛɛ, ə tɔɔ gələ laaləi, Yai-Laa yɛ mɛ̨nį ɓo Moisə ɓa. 10Nɔi lonnii kəlee di kɛi dulɔ kpinįn gaa, ə ɓo tɔɔ ni gələ laaləi, nu kəlee ə kɛi pɛlɛ niiɓa yɛ kwɛli hvilɛn ɲəi bɛlɛ́ laaləi. 11Yai-Laa ə kɛi pələ ɓo Moisə ɓa, da yaa di ɲɛ̨i heɛ di kee ɓa, yɛ nu a kɛi pələ ɓo mɛlan ma, yili pulu, Moisə ə kɛi pənə yɛ pa muwu la, kɛlaa, bɔ mun ŋɛ̨i kɛ a Nun lon Ɉosue, hvo kɛi tee gee kaa kələ mu.
Yálá ə gbɔwɔ lɛ Moisə ɓa
12Moisə yɛ Yai-Laa ɓa: «Yɛ́ kpinį ɓə kɛ mą́ą́: ‹'Li a nuą ŋɛ̨i nɔi ŋį́ naakwɛlanmo diɛ ɉu.› Kɛlaa, nui Ə́ kaa kwa yaa ku tɔɔi, Hvó nɛ li mą́ą́. Ɛlɛɛ yaan ə́ kɛ mą́ą́: ‹Ŋą́ ə́ kɔ́lɔn a ə laa.› Yɛ́ nwɔ̨nɔ̨ mą́ą́: ‹Yáá níí hon.› 13Yii hu, akɛ ŋą́ą́ ə́ líí hon a neelee, mɛ̨nįi ə́ kaa bɔ, nɛ mą́ą́, əgɛ, ŋą́ ə́ kɔ́lɔn a neelee, yá gɛ ti, akɛti ŋą́ą́ Ə́ líí hon gbɔ a tɛ̨ą; Ɛlɛɛ, Ə́ nu huwui ŋɛ̨i kaa a Yɛ́ nu huwu.»
14Yai-Laa yɛ mą: «Ɲą́ą́ gbinį ɓə pai hvįįtɔɔ tɛɛi ə́ pɔ.»
15Moisə yɛ mą: «Yɛ́ kpinį yá wala pa, hvo ku kulɔ gɛɛnąą ŋɛ̨i ɓa, 16nuą da pɛli gbaɠala kaai ləi diɛ kɛ ɲą́ą́ kwa ə́ wɔ́ nu huwui, kwaa ə́ lii hon? Kɛlaa, Yá kɛ ku lɔwai, kwa ə́ wɔ nu huwui ku hva kɛ yɛ bələi nu huwu takpɛliɠaa kaa la lɔi mɛ̨i, yili ɓə a nɛ yɛ kwaa ə́ lii hon.»
17Yai-Laa yɛ Moisə ɓa: «Mɛ̨nįi ŋɛ̨i ə́ mo, gáá pai gɛi ti, mąąhɔlɔɓo, yáá níí hon, ɛlɛɛ, Ŋą́ ə́ kɔ́lɔn a ə́ laa.»
18Moisə yɛ mą: «Ə́ wɔ mąąwiɛ lɛ mą́ą́ ŋį́ gaa.»
19Yai-Laa yɛ mą: «Gáá pai nwɔ́ mąąwiɛ kəlee tɛɛi ə́ ɲɛ̨i, Ŋą́ náá ɓo yɛ, náá ɓaa a: ‹Yai-Laa.› Nui a nɛ̨ɛ̨ mą́ą́, ya ɓə ŋą́ ɲɛ̨i mąąnwɛli kaa.» 20Yálá yɛ mą: «Hvá pɛli ɲɛ̨́i lai gaai, mąąhɔlɔɓo nu hva pɛli gáái, hvo lɛɛ a vulú.» 21Yai-Laa yɛ mą: «Kɛɛnąą ta kaa ɓɛ gwɛ́lɛ, tɔɔ laa kwɛnin mɛ̨i. 22Ɓɛlɔwai nwɔ́ mąąwiɛ kaa pai tɛɛi la, ŋą́ ə́ lɔ gwɛni wolo hu, ŋą́ ɲéé kɛ yɛ́ ə lɛɛ ɉu ŋį́ tɛɛ. 23Yili pulu, ŋį́ ɲéé həɠə ə́ ɲɛ̨i, ə́ búlú pələ kaa, kɛlaa ɲɛ̨ilai nwɛi, nu hva gaa.»
Currently Selected:
Lɛɛ gbɔwɔ ɓa 33: BKPDCG
Highlight
Copy
Compare
Share
Want to have your highlights saved across all your devices? Sign up or sign in
