Lɛɛ gbɔwɔ ɓa 20
20
Yálá nwɔ tɔ́n bow
1Yálá ɓə nwooɠaa ŋɛ̨i kəlee ɓo, yɛ diɛ:
2«Ɲą́ą́ gáá a Yai-Laa, ka wɔ Yálá, yai ka kulɔ Eziptə luwɔlaa hu.
3«Yálá takpɛli hvo kɛ ka yəi, ə kulɔ Ɲą́ą́ búlú.
4«Mąą nįnįn ɉaɠaa lɔpee ta hvo kɛ ka yəi, ə mą kɛ a yələkɔlɔn ɉu hɛn da kulɔmąą, ə mą kɛ, a lɔi mɛ̨i hɛn da, da yái hɛn da yii gaa lɔi mu gulɔmąą. 5'Hvó pɛlɛ da lííla, hvo kwɛli hvilɛn diɛ; Mąąhɔlɔɓo, ɲą́ą́ Yai-Laa ka wɔ Yálá, gáá a Yálá tolɔɔ, nuąi da yowolaa kulɔ a ɲą́ą́, ŋą́ gwələ kulɔ di lonnii diɛ, da yiliɠaai di wɔɔ mąnįn bulu mąnįnŋąą diɛ. 6Kɛlaa, nuąi da nwɛ́lila kɛ diɛ lɛɛ nwɔ́ tɔ́n nwooɠaa pulu, ŋą́ mɛ̨inɛ̨ɛ̨ kɛ di lonnii diɛ, da di mąnįn bulu mąnįnŋąą diɛ gee mɛ̨i waa tamąą.
7«'Hvó Yai-Laa ə wɔ Yálá laa ɓo kpɛli-kpɛli. Mąąhɔlɔɓo, nui a naa ɓo kpɛli-kpɛli, Yai-Laa a mąą nui hutɔɔ.
8«'Ə́ kili lɛɛ vįitɔɔ yələ hu, Yálá nwɔɔ li. 9'Ya ə́ mąą kóló kɛ hvóló mɛ̨ida yee mu. 10Kɛlaa, voló mɛ̨ihveelɛ yələ, hvįįtɔɔ yələ li, Yai-Laa ə́ wɔ Yálái nwɔɔ li. 'Hva kólói lɔpee ta kɛ a mąą yələ, ə kɛ a yɛ́ kpinįi, ə kɛ a ə́ lon ɉulɔnu, ə kɛ a ə́ lon nɛ̨ɛ̨nu, ə kɛ a ə́ wɔ luwɔ hilɛ da ə́ wɔ luwɔ nɛ̨ą, da ə́ yəi taatɛlɛɛɠaa, ə mą kɛ nwɛ̨ąi gaa ə́ yəi bɛlɛ́n. 11Mąąhɔlɔɓo, Yai-Laa ə yələkɔlɔn, lɔi, gboloyá, da ɉu hɛnŋąą kəlee pɛli hvóló mɛ̨ida yee mu, kɛlaa, ə vįitɔɔ a voló mɛ̨ihveelɛ yələ. Yili ɓə gɛ, Yai-Laa ə lúwɔ́ too vįitɔɔ yələi ti ɓa, ə gɛ a hvóló mąąhəɠɛɛ.
12«'Ə́ lee da ə́ nąn di mąąwiɛ; ya ɓə a gɛ, nɔi ŋɛ̨i Yai-Laa ə́ wɔ Yálá ə dɛɛ ə́ pɔ, ə́ yíi ə kwɛa ɉu.
13«'Hvó nu paa.
14«'Hvó wɛli kɛ.
15«'Hvó nwuɔ̨ kɛ.
16«'Hvó kɛla hvaa ɲɔ̨nwɔ̨ɔ̨ ɓo a ə́ ɓɛlan gaalon naa.
17«'Ə́ ɲɛ̨i hvo kulɔ ə́ ɓɛlan gaalon nwɔ pɛ́lɛ́i pɔ, ə́ ɲɛ̨i hvo kulɔ nɛ̨ą pɔ, ə mą kɛ, a nwɔ luwɔ hilɛ da nwɔ luwɔ nɛ̨ą; ə kɛ a nwɔ nįŋɛ̨, ə mą kpɛli kɛ a nwɔ hoo hvaalən. Ə́ ɲɛ̨i hvo kulɔ ɲəi hɛn lɔpee ta pɔ.»
18Israɛlə nu huwu kəlee di ɲələgbąnąą tíŋąą tii mɛ̨n, da dulu woo, diɛ nwɔ̨n nən gaa, da nwɔ̨n nulu, yɛ kulɔ ɲee hu, di kulɔ pulu, di mąą yɛ kpɛlin. 19Diɛ Moisə ɓa: «Mąąnɛ̨ɛ̨, yɛ́ kpinįi ə́ hvaa ku pɔ, kwa pɛli ku yili mɛ̨n. Kɛlaa, Yálá hvo kɛ gaa mɛ̨nį ɓoi kuɔ, ku hvo pa ləi haa.»
20Moisə yɛ diɛ: «Ka hvo ɲɔw, ka hu kɔ́ɔn mɛ̨nį ɓə Yálá ə paa la, ə gɛ, ka ɲɔw mą, ɛlɛɛ, ka hvo pa ləi nɛ̨ɲɛ̨n ɉəɠə.» 21Nuą di tɔɔ kwɛa la, Moisə ə mąą lɛɠɛ dulɔ kpinįn ɉuwiaa tii ɓa, ɓɛi Yálá ə kɛ laa.
Ɉaláá kulɔ pələ
22Yai-Laa yɛ Moisə ɓa: «Mɛ̨nįi ŋɛ̨i ɓo Israɛlə lonnii diɛ, yɛ diɛ: ‹Kaa kpinįi kaa gaa, kaa diɛ: Yələkɔlɔn ɉu ɓə ŋą́ lɛɛ laa, gɛ́ pələ ɓo kaa. 23Mąą hvo nɛ̨ɛ̨li, ka hvo mą́ą́ mɛ̨nį kɛ yɛ halii di bɛli a wali kwɛli, awala kɛ ti, a hɛni. Ɛlɛɛ, mąą hvo nɛ̨ɛ̨li ka hvo ɉaliɠaa tii ta pɛli. 24Ka nwɔ́ haláá kulɔi pɛli a pɔlɔ, kaa haláá kulɔ laa mą́ą́, a haláái da gəlee kələn, da ponaa kulɔ haláá, a ka wɔ taatɛlɛɛɠaai bɛlɛ-pɛlɛɛɠaa da gbɛa-kpɛaɠaa, ɓɛi lɔpee gáá pai hvaai mą, diɛ náá mąąwiɛ laa. Ŋą́ pa ka pɔ, gɛ́ lúwɔ́ too kaa. 25Kɛlaa, ka kɛ bɔ ka haláá kulɔi pɛli mą́ą́ a kwɛni, mąą hvo nɛ̨ɛ̨li, ka hvo gwɛni mąą haɠa, mąąhɔlɔɓo, kwɛli pɔɔ a kɛ mą, a kɛ ti, kaa mąąliɓi. 26Ka hvə nwɔ́ haláá kulɔi tɛ yələi kwɛaa la, di hvo pa ɉaláá laa həli mun gbuwulu kaa.›»
Currently Selected:
Lɛɛ gbɔwɔ ɓa 20: BKPDCG
Highlight
Share
Compare
Copy
Want to have your highlights saved across all your devices? Sign up or sign in
