Lɛɛ gbɔwɔ ɓa 21
21
Kóló kɛ nuą da tolaaɠaa di mąą mɛ̨nį
1«Bələi mąąnɛ̨ɛ̨ ka ɲɛnɛ̨ɛ̨ yíi ɓo la, bələ ka. Ɉukulɔ diɛ, yɛ diɛ: 2‹Yá Hebreu lon da hon a tolaa, a kóló kɛ yɛ́ kwɛlan mɛ̨ida yee mu. Gwɛlan mɛ̨ihveelɛnąą, yá nɛɛ gbɔwɔ ɓa. 3Akɛ yaa tɔ̨nɔ̨ ɓə pa, yaa tɔ̨nɔ̨ lɔ ɓə a li. Akɛ nɛ̨ą ə lɛɛ mą yɛ pa, da nɛ̨ą lɔ ɓə da li. 4Akɛ dolaa honmun a nɛ̨ɛ̨nu tɛɛ dolaa hulɔnu pɔ, a lon gaa mą, nɛ̨ɛ̨nu da nonnii da lɛɛ a dolaa honmun nwɔɔ; ɉulɔnu yaa tɔ̨nɔ̨ lɔ ɓə a li. 5Kɛlaa, nuwɔ a kɛ diɛ: «Ną́mu wɛli kaa mą́ą́, da nɛ̨́ą ə mą kɛ nónnii, və́ bɔ, və́ lɛɛ gbɔ́wɔ́ ɓa.» 6Nąmu a li la Yálá pɔ, ə dɔɔ bɛlɛ́ laaləi gbon ma, a wala kɛ ti, gbon gwɛlɛ, ə nwəli ɓɔ a kwɛli. Da gɛ ti a kɛ kɛa tíi nąmu ɓa a yələ kəlee.
7«‹Nu ta a non nɛ̨ɛ̨nu tolaa hee, mąą nɛ̨ɛ̨nui hva pɛli kulɔi dolaa pɛlɛ́ mu, yɛ bələi dolaa hinąą da kulɔ la. 8Nwɛli a wala kɛ nąmu ɓa, ɛlɛɛ, a wala gɛ a nɛ̨ą, mąąnɛ̨ɛ̨ ə dɛɛ, di nwun mąąɓo. Nąmu hva pɛli dolaa heei nu takpɛli ɓa, a gɛ ti, aa ɲaba lɔ mą. 9Kɛlaa a kɛ diɛ, gaa lɛɛi non ɲəi a nɛ̨ą, mąąnɛ̨ɛ̨ ə mąą mɛ̨nį kɛ yɛ bələi nu a non nɛ̨ą mąą mɛ̨nį kɛ la. 10A nɛ̨ɛ̨nu takpɛli həɠə a nwɔɔ, mąą hvo nɛ̨ɛ̨li, hvo nɛ̨ɛ̨nu tɔlɔɔ ti kɔ̨nɔ̨n da kulɔ ma, da mąą həɠəɠaa, ə mą kɛ, ɲíi pɛlɛ́n mɛ̨nį hu. 11Awala mɛ̨nį haaɓai tii ɲɛ̨i kulɔ, nɛ̨ɛ̨nu dɔlɔɔ a pɛli ə kulɔ bɛlɛ́n, wali mɛ̨nį hva kɛ ɉu.
Mɛ̨nįi nu a gɛ di baa
12«‹Nui lɔpee a nu ta kɛlɛ, a baa, mąąnɛ̨ɛ̨ di mąą nu paa. 13Kɛlaa, akɛ hvo hee mɛlan dɔwɔ baa mɛ̨nį ɓa, Yálá lɔ ɓə yili kɛ ti, gáá pai kɛɛnąąɠaa lɛi yɛ́, nui ti mɛlan mun baa a dɛɠi pələ, yɛ pɛli mąąkilɛi laa. 14Kɛlaa, nu a hvilɛn nu pulu, yɛ kɛ ə baa a gbąnąlaa, ə mą kɛ aa li nwɔ́ haláá kulɔi ta ɓa, yá gulɔ laa, di baa.
15«‹Nui a gaamun da kɛlɛ, mąąnɛ̨ɛ̨ di paa.
16«‹Nui a nu kan nwuɔ̨, akɛ aa gbɛa nɔwɔtɔɔ, a wala kɛ ti a kɛ nii ɲəi, mąąnɛ̨ɛ̨ di nwuɔ̨mun tii baa.
17«‹Nui a gaamun da lalan, mąąnɛ̨ɛ̨ di baa.
Kɛlɛ ɓo da nu mąą nwąną mɛ̨nį
18«‹Nuą da kɛi gɔ́, dɔ̨nɔ̨ ə mɛlan gɛlɛ a kwɛni, a wala kɛ ti a ɲee kpuwulu; ɛlɛɛ mąą nu hva haa, kɛlaa, ə ɲɔ̨n bili ɉu; 19Ɛlɛɛ yɛ pɛli muhəɠəi, yɛ kulɔ yɛnɛ̨ɛ̨, tunwɔ̨n ə ɓo ɲəi, nui gɛlɛɓo kɛ, da nɛɛ laa, kɛlaa, volóɠaai mɛlan a gɛ laani, mąąnɛ̨ɛ̨ ə yili hálá mą, ɛlɛɛ, ə ɉali kɛ, ə lɛɛ ɉu ə ɓalo.
20«‹Nu a nwɔ luwɔ kɛlɛ a gbɔn, ə kɛ a hulɔnu ə kɛ a nɛ̨ɛ̨nu, ə lɛɛ gbɔnɔ mu, mąąnɛ̨ɛ̨ di di nwąną kulɔ mą. 21Kɛlaa, nui di gɛlɛ, a hvóló tɔ̨nɔ̨ a wala kɛ ti hvóló hveelɛ kɛ, ə ɓo ni a vulú, di hva di nwąną kulɔ, mąąhɔlɔɓo, di ɲa a wali.
22«‹Hinąą da kɛi gɔ́, da kɛlɛ koonɛ̨ą ta hu, ɲəi ə kala, kɛlaa, nɛ̨ɛ̨nu hva haa, nui mɛ̨nįi tii wulu a lɛɛ nwuɔ̨, a nɛ̨ɛ̨nui tii yee kulɔ ɉu a hɛn nɛ̨ɛ̨nu ɉilɛ a vaa ɓo, ɛlɛɛ, a nwali tɛɛ yɛ bələi giti tee nuą da mo la. 23Kɛlaa, ɲɔ̨nwɔ̨ɔ̨ a kulɔ ɉu, mąąnɛ̨ɛ̨ ə yíi yɛnɛ̨ɛ̨ tɛɛ a yíi yɛnɛ̨ɛ̨ hɔ̨nwɔ̨ 24Ə́ ɲɛ̨ikɔw tɛɛ a ɲɛ̨ikɔw hɔ̨nwɔ̨, ɲin a ɲin ɉɔ̨nwɔ̨, yee a yee hɔ̨nwɔ̨, kɔ́wɔ a kɔ́wɔ hɔ̨nwɔ̨; 25Nwɔ̨n bɔɔ da nwɔ̨n bɔɔ, mąą nwąną da mąą nwąną, kpidilin da kpidilin.
26«‹Nui a nwɔ luwɔ hilɛ, a wala kɛ ti nwɔ luwɔ nɛ̨ą kɛlɛ, ə ɲɛ̨i wolo, mąąnɛ̨ɛ̨ ə nɛɛ gbɔwɔ ɓa a ɲɛ̨ikɔw hɔ̨nwɔ̨. 27Akɛ nwɔ luwɔ hilɛ ɓə awala kɛ ti nwɔ luwɔ nɛ̨ą ɓə, a ɲin gulɔ, mąąnɛ̨ɛ̨ ə nɛɛ gbɔwɔ ɓa a ɲin ɉɔ̨nwɔ̨.
28«‹Nįŋɛ̨ a nu túwɔ́ ə baa, mąąnɛ̨ɛ̨ di nįŋɛ̨i ŋɛ̨i tii paa a kwɛni, ɛlɛɛ, di hvo ɉuwɔ mįi. Kɛlaa, mɛ̨nį ta hvo kɛ nįŋɛ̨ nąmu wəli pulu. 29Kɛlaa, akɛ nįŋɛ̨ ə kɛi nuą kpuluun a bɔlɔ, ɛlɛɛ, diɛ mo nąmu ɓa, kɛlaa, nąmu hva ɲɛ̨i kɛ mą, mąą nįŋɛ̨i a nu ta paa, da baa a kwɛni, ɛlɛɛ, di nįŋɛ̨ nąmu yaa kpɛli baa. 30Da kɛ mą: «Ə́ kpɔwɔ nwun mąąɓo.» Yii lɔpee da naa nwuɔ̨ a nįį nwun mąąɓo hɛn, mąąnɛ̨ɛ̨, ə dɛɛ. 31Nįŋɛ̨ a mįnɛ̨ hee hulɔnon ma, a wala kɛ ti Nɛ̨ɛ̨non da ɓa, bələ lɔ ɓə da ɉon na. 32Nįŋɛ̨ a mįnɛ̨ hee luwɔ ɓa, ə kɛ a hulɔnu, ə kɛ a nɛ̨ɛ̨nu, nįŋɛ̨ nąmu a wali kwələ pow haaɓa tɛɛ nuwɔ nąmu pɔ. Ɛlɛɛ, di nįŋɛ̨ paa a kwɛni.
33«‹Nu a yálɔwa lɛɛ a naa ɓoɔ, a wala kɛ ti, a yálɔwa tee hvo naa kpulu li, nįŋɛ̨ a wala kɛ ti hoohvaalən a too ɉu, 34mąąnɛ̨ɛ̨ ɲálɔwa nąmu ə bɔɔ kulɔ ɉu, daatɛlɛɛi ti haa a ɉɔ̨nwɔ̨ tɛɛ nąmu pɔ a wali, kɛlaa daatɛlɛɛ powa a lɛɛ a nwɔɔ.
35«‹Nu nwɔ nįŋɛ̨ a nu takpɛli nwɔ nįŋɛ̨ túwɔ́, a baa, da nįŋɛ̨i hulúi ti lɔwɔ́tɔɔ, di nwali ɲąąkwɛlɛ, daatɛlɛɛi ti haa, di ɲąą kwɛlɛ yaa kpɛli mąn. 36Kɛlaa, akɛ nu kəlee di gɔlɔn diɛ kɛ gɛ̨ąi kɛ a bɔlɔ, yɛ mɛlaa túwɔ́, ɛlɛɛ nąmu hva gɛ hvo ɲɛ̨i kɛ mą, mąąnɛ̨ɛ̨ nįŋɛ̨i ti haa, ə bɔɔ tɛɛ a nįŋɛ̨, ɛlɛɛ nįŋɛ̨i ti haa, ə lɛɛ a nwɔɔ.
Taatɛlɛɛ nwuɔ̨ mɛ̨nį
37«‹Nui a taatɛlɛɛ ta nwuɔ̨, ə kɛ a nįŋɛ̨ nwuɔ̨, ə kɛ a ɓɛlaa ə kɛ a ɓolu, ə baa, a wala kɛ ti, ə nɔwɔtɔɔ, mąąnɛ̨ɛ̨ ə nįŋɛ̨ lɔɔli tɛɛ a nįŋɛ̨ tɔ̨nɔ̨ pɔɔi, ə ɓɛlaa nąąn dɛɛ a mɛlaa tɔ̨nɔ̨ pɔɔi, a wala kɛ ti ɓolu nąąn.
Currently Selected:
Lɛɛ gbɔwɔ ɓa 21: BKPDCG
Highlight
Share
Compare
Copy
Want to have your highlights saved across all your devices? Sign up or sign in
