Lɛɛ gbɔwɔ ɓa 19
19
Yálá da Israɛlə di mįnɛ̨ həɠə
Yálá ə kɛ bɔ da Israɛlə di mįnɛ̨ həɠə
1Israɛlə lonnii kulaa Eziptə lɔi hu, ɲąnin ɉaaɓa tɛɛ pulu, di həli Sinai nɔi pun ɉu. 2Di həɠə Refidimə, diɛ li Sinai nɔi pun ɉu, Israɛlə lonnii di di wɔ ɓuwui pɛlɛ nɔi pun ɉu, ɲee tənən ma. 3Moisə nwɛi, ə tɛ, Yálá pɔ pələ da yaa di di kee kaa.
Yai-Laa ə lɛɛ ɲee hu, ə Moisə təli, yɛ mą: «Mɛ̨nįɠaai ŋɛ̨i hukulɔ Ɉakɔbə yəi bɛlɛ́n nuą diɛ, ə́ díɓoi ŋɛ̨i laa həli Israɛlə lonnii diɛ, yɛ́ diɛ: 4‹Mɛ̨nii ŋą́ naa Eziptə ɓa, kaa kpinįi ka gaa, bələi ŋį́ ka kpəŋə la, Kuwɔ́ koon ɉu, gɛ́ pa a kaa bɔ́ pələ. 5Ə həɠə yiihu ɓa, ka ka wəli tɔɔ nwóó ɓa, kaa lɛɛ nwɔ́ mįnɛ̨i pulu, ka kɛ a gwɛ́lin gɛnɛ̨mun, nu huwuɠaa kəlee lɔwai; mąąhɔlɔɓo, ɲą́ą́ ɓə lɔi kəlee kaa a nwɔ́ɔ́. 6Ka wɛi, gáá pai ka kɛi a nwɔ tɔɔlaa hu haláá laa həli nuą, a nu huwu mąąhəɠɛɛ.› Nwooɠaai mąąnɛ̨ɛ̨ ə́ mo Israɛlə lonnii diɛ, diɛ ka ti.»
7Moisə ə pa, ə nɔi kalanɉonŋąą təli, ə nwooɠaai ti kəlee ɓo diɛ, yɛ bələi Yai-Laa ə dí la. 8Nu kpɔn gəlee ə nwoo mu hon a gee, diɛ mą: «Mɛ̨nįɠaai kpɔ Yai-Laa ə mo, ku kaa pai gəlee kɛi.» Moisə ə nuą woo laa həli Yai-Laa ɓa.
9Yai-Laa yɛ Moisə ɓa: «Gáá pai ŋį́ həli kpɔ yɛ́ tulɔ kpinįn ɉuwia hu, nɔi lonnii diɛ pɛli nwóó mɛ̨n ɉii, ɓɛlɔwai gáá pai kɛi pələ ɓoi la yɛ́, diɛ pɛli laai ə́ la a yələ kəlee.» Moisə ə nɔi lonnii woo laa həli Yai-Laa ɓa.
Moisə da Yálá di di kee kaa Sinai yee nwuɔ̨
10Yai-Laa yɛ Moisə ɓa: «Li ə́ mo Israɛlə lonnii diɛ, di di mąąhəɠə háákələi da tinąą; di di mąą həɠəɠaa waa. 11Di kɛ pələ ə kɛ a bɛliɛ a voló haaɓa yələ, mąąhɔlɔɓo, voló haaɓa yələ ɓə Yai-Laa kaa pai yɛɛi la Sinai yee nwuɔ̨, nɔi lonnii kəlee ɲɛ̨i ɓa. 12Ɓɛi mąąnɛ̨ɛ̨ nuą di kpəla laa, nąą lɛ diɛ, yɛ diɛ: ‹Ka lii hvo kpələ, ka hvo tɛ ɲee ɓa, ka hvo kpɛli tunwɔ̨n ɲee koo mu.› Nui lɔpee a tunwɔ̨n ɲee ɓa, da baa. 13Nui a gulɔ nwəlii, a ɉɔn ɲɔ̨n tii kɛ, nu ta hvo ɲee tunwɔ̨n mąą nu ɓa, kɛlaa, da ɉɔɔ a kwɛni ə haa, a wala kɛ ti, da mon a tonwą; ə kɛ a taatɛlɛɛ, ə mą kɛ a nu kan, mąą hvo nɛ̨ɛ̨li hvo lɛɛ yɛnɛ̨ɛ̨. Ɓɛlɔwai dulu woo kaa pai tɔɔi la, nu taɠaa kaa pai tɛi ɲee ɓa.»
14Moisə ə ɲee yɛɛ, ə pa nuą pɔ. Ə nuą mąąhəɠə, di di mąą həɠəɠaa waa. 15Yɛ nuą diɛ: «Gɛɛ hvóló haaɓa hvo tɛɛ, mąąnɛ̨ɛ̨, ka mąą mɛ̨nį kəlee ə kɛ a bɛliɛ ɉu, nu ta hvo laa nɛ̨ą kwɛlɛ.»
16Voló haaɓa yələ, yələwala pɔ, yələ gbąnąą tín ə tɔɔ, mąną-mąną ə gɛ, tulɔ kpinįn ɉuwia ə yɛɛ ɲee ɓa, tulu woo kɛnɛ̨ yɛ tɔɔ, nɔi lonnii kəlee diɛ kpɛlin ɓɛi di kɛ laa tɔɔni. 17Moisə ə mo nuą diɛ, di kulɔ ɓɛi di kɛ laa, diɛ li Yai-Laa laakwiɛn ɉi, di tɔɔ ɲee kɔ́wɔ la.
18Sinai yee ə kɛ lɔ a nwɔ̨n nulu. Mąąhɔlɔɓo, Yai-Laa aa kɛ yɛɛ laa nwɔ̨n ɉu, nwɔ̨n nulu ə kɛi tɛ yɛ kpaɠa nwɔ̨n nulu, ɲee yɛ kpɛlin gbɔ kɛnɛ̨.
19Dulu woo ta lɔ ɓə kɛi pɛlɛ mą, ɓɛlɔwai Moisə ə kɛi hvaa la, Yálá yɛ bulu pənə, yələ gbąnąą woo hu.
20Yai-Laa ə lɛɛ Sinai yee tɔ́n na, Ə Moisə təli, Moisə ə tɛ. 21Yai-Laa yɛ Moisə ɓa: «Yɛɛ, ə́ mo nuą diɛ, yɛ diɛ: ‹Di hvo kpuluun, diɛ kɛ di li Yai-Laa pɔ gaa mɛ̨nį ɓa; da gɛ ti, da ləi haa. 22Ə mą kɛ ɉaláá laa həli nuąi da kɛ di mąą lɛɠɛi Yai-Laa ɓa a bɔlɔ, mąąnɛ̨ɛ̨ di di mąąhəɠə; ə gɛ, Yai-Laa hvo pa nəi níiholi di pɔ.›»
23Moisə yɛ Yai-Laa ɓa: «Nuą di hva pɛli tɛi Sinai yee ɓa; hvó gaai, yɛ́ kpinįi yáá ku kilaa pɔ̨nɔ̨, yɛ́ mą́ą́: ‹Yɛli too ɲee ɓa, ə́ ɲɛ̨n naa, ɛlɛɛ, kɛ nuą diɛ: Ɲą́ą́ Yálá mą́ą́həɠɛɛi.›»
24Yai-Laa yɛ Moisə ɓa: «Pənə ə́ yɛɛ, yɛ́ ka Aarɔn ka tɛ. Kɛlaa, ɉaláá laa həli nuą da nɔi nuą, di hvo kɛ di kaa kpuluun ɉi, diɛ tɛ Yai-Laa pɔ; ə gɛ, hvo pa ləi níiholi di pɔ hvo di kɛlɛ!»
25Moisə ə ɲee yɛɛ nuą pɔ, ə nwoo hukulɔ diɛ, yɛ bələi di mo la mą.
Currently Selected:
Lɛɛ gbɔwɔ ɓa 19: BKPDCG
Highlight
Share
Compare
Copy
Want to have your highlights saved across all your devices? Sign up or sign in
