Korɛntə veelɛ 2

1Nwɛ́i, yii ŋį́ naa gwəi, ya ka: Vá pənə və́ pa ká pɔɔli liiɲąnwą hu. 2Gbala ə tɔɔ, ɲą́ą́ ŋɛ̨i ŋą́ ká liikələn ka kwəii, gbɛɛ ɓə pai gwə́inɛ̨ɛ̨i, ə kulɔ lɔ nui ŋą́ niikələn gwəi, bulu? 3Nwɔ́ hɛɓɛ́i pɛ̨ɛ̨ nwun ni kɛ. Və́ kɛ bɔ, ŋą́ pa laa, və́ kɛ liiɲąnwąną hu, a nuąi mąą nɛ̨ɛ̨ di gwə́inɛ̨ɛ̨ di laa pɔɔ. Nwɛ́i náái kpɔ tii na, gɛ́, yii kpɔ hvilɛn na ká mąą mɛ̨nį, nwɔ́ kwəinɛ̨ɛ̨ kaa lɔ a káá kpɛlimąn ká wɔɔ kwəinɛ̨ɛ̨. 4Yili ɓə gɛ, gɛ́ hɛɓɛ́ pɛ̨ɛ̨, gɛ́ dɛɛ káá, mɔ̨nɔ̨ kɛnɛ̨ hu da liikələn gwəi da wɔlɔ kpɔ-kpɔɔ; və́ gɛ tii, ká liiɲąnwąną mɛ̨nį ɓa, kɛlaa, ə gɛ, nwɛlikɛmąąlaa kɛnɛ̨i gwə́i, yɛ hvilɛn na káá, káá pɛli gɔlɔn ɉii.

Polə ə mɛ̨nį ɲɔ̨n gɛnɛ̨ kɛ mun mąąhvaalɛɛ

5Akɛ di nu ta lííholi, ɲą́ą́ hvə di nííholi, kɛlaa, gwa gaa kpɔ tii, 'gu hvo nąą mąą walawala hvo tɛɛ ɲɛ̨n ɉu. 6Yii viɛlaɓoɔ nu taaləi ti mąą mɛ̨nį ɓa ya ɓaa: Ká ɉutɔɔ. 7Viɛlaɓoɔi ká mąąhvaalɛɛ, ká niilaa, ə gɛ, niiɲą hvo pa nəi nwąną hvo tɛɛ ɲɛ̨n ɉu. 8Yili ɓə gɛi, gɛ́ ɉu hvɛli káá, 'ká ɉon a wɛlikɛmąąlaa, 9Gbala ə tɔɔ, ɉɛɓɛ́i ŋą́ dɛɛ káá, yii lɔ kɛ gwə́i, ya ɓaa, ŋį́ ká hukɔɔn, akɛ ká lɛɛ nwoo mu kɛ mɛ̨nį kəlee hu. 10Nui ka mąąhvaalɛɛ, ɲą́ą́ gbɛlimąn, ŋą́ mąąhvaalɛɛ. Mąąhɔlɔɓo, mɛ̨nįi ŋį́ nɛɛ a kpɛli, akɛ mun hɔlɔɔ, ŋį́ mɛ̨nį ta lɛɛ a kpɛli, ŋą́ gɛ tii ká mąą mɛ̨nį ɓa, Kristə ɲɛ̨i ɓa. 11Mąą hvo nɛ̨ɛ̨li, gu hvo gu kpɔwɔ lɛɛ laa ɓilihi hvo gu ɓowo, hvo gaai, gwəi kiliɠaa di hvo loo li guɔ.

Liihɛlɛn ə too Polə ɓa, gwəi ə nɛ̨ɛ̨

12Líi ŋą́ mo Troasə, Kristə mąą wɛlɛɛ lɛlɛɛ laa həli mɛ̨nį ɓa, ɛlɛɛ, gu Ną́mu ə pələ laa ɓo dúwɔ́ kpɔ kɛnɛ̨, 13kɛlaa, níí hvo kɛ laa li gwə́i, mąąhɔlɔɓo, və́ ną́n non Titə kaa. Ŋį́ yələ wala kɛ diɛ, gɛ́ kɛa li Masedoanə lɔi hu.

14Yálá mąmą, yai a gɔ nɛ̨ɛ̨ guɔ a yələ kəlee Kristə haalai, ɛlɛɛ, yɛ gɔlɔn mɛ̨nį mąą kwəinɛ̨ɛ̨ lɛlɛɛ tɛ ku yee hu kɛɛnąą kəlee ɓa. 15Gɛ mɛ̨nį, ku kaa Yálá yəi a Kristə mąą kun nɛ̨ɛ̨ hɛn, ɓalo pələ mɛ̨i da nwun na a pili pələ mɛ̨i. 16Daɠaa di wɛi gaa a haa kun, yɛ li a diɛ haa pɔ, daɠaa di wɛi, ɓalo kun mə, yɛ li a diɛ ɓalo hva kpɛɛ hu. Gbɛɛ ɓə a pɛli kɛi a góló taaləi tii kɛmun? 17Ku hvo yɛ nuąi da kɛ Yálá lawoo kɛi a hɛn gwɛli hɛn. Kɛlaa yaamun, kwa gɛ a kwəi kwələlaa, Yálá ɓə ku tɔɔ la, kwa gɛ Yálá ɲɛ̨i ɓa, kwa kɛ pələ ɓoi Kristə laa hu.

Currently Selected:

Korɛntə veelɛ 2: BKPDCG

Highlight

Copy

Compare