Korɛntə veelɛ 3

Mįnɛ̨ nįnɛ̨ hu kolo kɛ nuą

1Kuɔ ɓə mɔ̨ɔ̨ kuɔ ku pa tɔɔ nwɔ̨nɔ̨, kuɔ ku kpɔwɔ lɛ káá a ku mąątɛ̨nɛ̨ pələ? Awala kɛ tii, ku kpɔwɔ mąą liɛwoo kɛ hɛɓɛ́ kɛ mɛ̨nį mąąkpaan gaa kuɔ, kuɔ paa la ká pɔ? A wala kɛ ti, káá dɛɛ ku pɔ, yɛ bələi yili mąąkpaan gaa la nu takpɛliɠaa diɛ? 2Káá ɓə a ku wɔɔ hɛɓɛ́i, ɉɛɓɛ́i tii pɛ̨ɛ̨i ku nii hu, nu kəlee di gɔlɔn, diɛ mo. 3Gəlee ə mą kɛ, ka káá a hɛɓɛ́i Kristə ə bɛ̨ɛ̨, galihvaɓoɔ kuɔ, kuɔ naa həli; hvo pɛ̨ɛ̨ li a hɛɓɛ́-yá, kɛlaa, bɛ̨ɛ̨i a Yálá hvulúmąą ŋą Kilii yee pɔɔ, hvo pɛ̨ɛ̨ li kwɛni ɓɛla mɛ̨i, kɛlaa, bɛ̨ɛ̨i nuą kili pɔ.

4Bələ kpɔ ɓə gaa la ku kwəi Yálá ɲɛ̨i ɓa, Kristə háálai. 5Ə kɛ ŋɛ̨i kwa pɛli lɛɛi ku kpɔwɔ ɓa, ku kpɔwɔ hvan ɉu, kuɔ pɛli mɛ̨nį lɔpee ta kɛi, yili hvəə, ku hvaŋą a həɠə Yálá yəi. 6Yaa ɓə a hvaŋą tɛɛ ku pɔ, kuɔ pɛli kɛi a mįnɛ̨ nįnɛ̨ hu kóló kɛ nuą, mįnɛ̨ nįnɛ̨i tii hvo a hɛɓɛ́ kɔw, kɛlaa, gaa a Kili-Mąąhəɠɛɛ ŋą mɛ̨nį; hvo gaai, dɔn ɉɛɓɛ́, a nu paa, kɛlaa, Kili-Mąąhəɠɛɛ nwɛi, a yɛnɛ̨ɛ̨ tɛɛ nu pɔ.

7Dɔ́n nwooɠaa tii pɛ̨ɛ̨i kɛ kwɛnį ɓɛla mɛ̨i, dɔn tii a nu paa, Moisə ɓə kɛ a ŋą tímun. Bələi mąn ə kɛ la tii, ə kɛli mąąwiɛlaa kɛnɛ̨ hɔlɔɓo ɲəi, mąąwiɛlaa tii ɓə kɛli Moisə ɲɛ̨ilai lən, Israɛlə lonnii di hvo kɛli pɛli di ɲai heei ɲɛ̨ilai, yá pa, hvo lamun mą, 8gu hvo mun kɛ, Yálá nwɔ Kilii ŋą kóló, nwɔ mąąwiɛlaa hva mɔ̨ɔ̨ kɛnɛ̨ ə tɛɛ yili ɓa? 9Akɛ dɔ́n a nu nwun na pili, ŋą kolo nwɔ mąąwiɛlaa kaa tii, gu hvo mun kɛ, tələnmolaa ŋą kolo nwɛi, yee hva mɔ̨ɔ̨ tɛɛ yili ɓa? 10Gaa tii a tɛ̨ą, golo tɔlɔɔ ŋą mąąwiɛlaa tii, da mɔ̨ɔ̨ gɔɔn háákələi mąąwiɛlaa ɓa? Nu hva kpɛli gɔɔn ɉii gee ɓa, háákələi nwɛi kɛnɛ̨i dɛɛ mą. 11Gbala ə tɔɔ, akɛ hɛn lamun hvo kɛ mą, mąąwiɛ pələ ə kɛ tii, gu hvo mu kɛ, mɛ̨nįi kpɛɛ hvo mą?

12Ku ɲɛ̨i kɛɛ mɔ̨ɔ̨ mɛ̨nį taaləi tii tɔwɔ, yili ɓə a ku wɔɔ laa na laa hvaŋą kɛ ɉu. 13Ku hvo gɛi yɛ Moisə, yai kɛi həɠə pɛlɛ ɲɛ̨ilai, ə gɛ Israɛlə lonnii di hvo nəi pa volo tɔ̨nɔ̨ kɛɛponoi tii, kpɛɛi lɔwai kaa. 14Kɛlaa, di kili hu ə kpinį, ə mą kɛ yiihu ɓə, da kɛli mįnɛ̨ həɠɛɛ tɔlɔɔ hu woo ɓo, ɉəɠə ɓɛlai tii kaa lɔ ni laa, hvo ni həɠə li laa; mąąhɔlɔɓo, Kristə hu ɓə a həɠə la laa. 15A tɛ̨ą, hááɓa háá, di mą nwɔ̨nɔ̨ kɛ Moisə ŋą hɛɓɛ́i ɓoi, həɠə pɛlɛɛi lɔ ni di kili mɛ̨i. 16Kɛlaa, nui aa gili tínɛ̨n gu Nąmu pɔ pələ, yaa lɔ ɓə gili mɛ̨i aa həɠə. 17Mąąhɔlɔɓo, gu Ną́mu kaa a Kili, yaan, ɓɛi gu Ną́mu-Nįi kaa laa, nąą ɓə lɛɛ gbɔwɔ ɓa laa kaa laa. 18Ɛlɛɛ, gu kəlee kpɔ, ɉəɠə ɓɛla aa həɠə gu ɲɛ̨i, gu Nąmu ŋą mąąwiɛlaa ta aa həli guɔ, gu ɲɛ̨ilai mąą aa hvalən, gwaa kɛ a gulɔmąą, gu wɔ mąąwiɛlaa ta yɛ pɛlɛ lɔ mą a yələ kəlee gu Nąmu haalai, yai a Kili.

Currently Selected:

Korɛntə veelɛ 3: BKPDCG

Highlight

Copy

Compare