Korɛntə veelɛ 1
1
Túwɔ́-woo
1Ɲą́ą́ Polə, ə laa a Yálá lii, ə də́li, əgɛ, ŋą́ kɛ a Jesus Kristə ŋą tímun, kwa gu nąn non Timote ɓə ɉɛɓɛ́i ŋɛ̨i tɛɛi Yálá ŋą kpɔn ɓa, yai gaa Korɛntə, ə mą kɛ, galan nɛai di kaa Akaiə nąą kəlee. 2Kuɔ gu Ną́n Yálá da gu Ną́mu Jesus Kristə di mɛ̨inɛ̨ɛ̨ da liilaa tɛɛ ka pɔ.
Polə ə Yálá hɛɠɛɛ ɓo
3Mąąwiɛ ə kɛ Yálá ɓa, yai a gu Nąmu Jesus Kristə Ną́n, a yai a ɲɛ̨imąąwɛli kaa Nąn, da liilaa Yálá; 4Ya ɓə a gu liilaa, gu wɔ kwəi pilimąąɠaa kəlee hu, yɛ gɛ, guɔ pɛli, nuąi kwəi pilimąą hu di liilaai, a liilaai guɔ kpinįlee gwa ɉɔlɔɓo Yálá yəi. 5Gbala ə tɔɔ, bələi lɔ gwa mɔ̨nɔ̨ mįi la kɛnɛ̨ Kristə mąą mɛ̨nį hu, bələ lɔ ɓə, Kristə haalai, gu wɔɔ liilaa hu a kɛnɛ̨ la. 6Mɛ̨nį walawala aa həli kuɔ? Yili kaa a ká liilaa mɛ̨nį da ká ɓalo mɛ̨nį. Liilaa mɛ̨nį aa həli kuɔ? Yili kaa a ká liilaa mɛ̨nį, yai a pɛli gɛi, mɔ̨nɔ̨i ku kaa mįi ká mąą mɛ̨nį ɓa, káá pɛli ká liikpələi ká wɛi mu. 7Ɛlɛɛ, mɛ̨nįi ku ɲɛ̨i kaa dɔwɔ a nwalawalaa, yɛ hvilɛn na ka mąą mɛ̨nį ɓa, ya ka: Ku kili kaa ɉu kuɔ, ku wɔɔ mɔ̨nɔ̨ɠaai ta mįi ka káá moi, bələ lɔ ɓə ka káá pai ku wɔ liilaa ta hɔlɔɓoi la.
8Mąąhɔlɔɓo, nąn nonnii, ku hvo bɔ, ká hvo kɛ kwəi pilimąą hu, mɔ̨nɔ̨ɠaai ku mįi Asi lɔi hu, di nwiɛ pələ kuɔ, ɉee pələ ku hu, vaŋą kɛnɛ̨ pələ ə tɛɛ kuɔ, ku kili hvo kɛ mą, kuɔ kwa lɛɛ kɛ yɛnɛ̨ɛ̨. 9A tɛ̨ą leelee, ku kili ə kɛ kɛa ɉu kuɔ, ku haa hiɛ li. Gɛ pələi tii, ku hvo ku gilitɔɔ ku kpɔwɔ ɓa, kɛlaa ku dɔɔ Yálá ɓa, yai a haa nuą nwun. 10Yaa tii ɓə ku kulɔ ɉaa taa ləi tii yəi, yaa lɔ ɓə nwɔ̨nɔ̨ pai ku kulɔ ɲəi kɛi; yaa tii ɓə ku wɔɔ kilitɔɔmąą laa kaa mą, ya lɔ ɓə pai ku kulɔ ɲəi kɛi. 11Káá kpɛlimąn, ká kɛ ká wɔɔ nąą kɛi ɉu, a Yálá hvɛlii ká kɛ moi kuɔ. Akɛtii, mɛ̨inɛ̨ɛ̨i tii kwa ɉɔlɔɓo a nu kpulu kɛnɛ̨ɛ̨ kɛ mɛ̨nį, yili a kɛ a Yálá hɛɠɛɛɓo mɛ̨nį ku mąą mɛ̨nį ɓa, nu tamąą yəi.
Mɛ̨nįɠaai gɛ Polə yɛ ŋą hiɛi yali
12Ku ɲɛ̨i pono mɛ̨nį ɓaa, ku kwəi kili ŋą kɛla wooi a mo kuɔ, ya ɓaa: Ku túwɔ́ yɛnɛ̨ɛ̨ hu, gəlee ə mą kɛ ləi, ká mąą mɛ̨nį hu, a kwəi kwələlaa da mąąhəɠəlaai a həɠə Yálá pɔ, hvo kɛli kɛ a nu kan ŋą kilikɛɲəi laa, kɛlaa, ə kɛ a Yálá ŋą nɛ̨ɛ̨laa. 13Hvo gaai mɛ̨nį takpɛli hvo ku wɔɔ hɛɓɛ́ɠaai hu, ə kulɔ lɔ, yii ká moi, káá ɲąąkaa. Gíli kaa ɉu, gɛ́, ká kɛ ku woo ɲąąkaai kpɔ hələ-tətə, 14gbaa ə tɔɔ, káá gbɛa da wolo ɲąąkaa, káá kɛ, kuɔ ɓə a ká ɲɛ̨i pono mɛ̨nį nwun, yɛ bələi lɔ, ka káá la a kuɔ kpɛli ku wɛi, a gu Nąmu Jesus ŋą hvolói.
15Ɛlɛɛ, gílitɔɔ mɛ̨nį yili ɓa kpɔ ɓə gɛi, gáá la bɔ ŋį́ gbɛa tɛɛ ká pɔɔli pələ, gɛ́ pɛli mɛ̨inɛ̨ɛ̨ kɛi káá a veelɛnąą, 16yili pulu, ŋą́ həɠə ká pɔɔli, ŋį́ li kɛ Masedoanə, ŋą́ həɠə nwɔ̨nɔ̨ Masedoanə pələ, ŋį́ tɛɛ ká pɔɔli pələ, káá kɛa dɔ́ɔ́ bələi, a hɛn mąąkpaan gaa mą́ą́, gɛ́ li Ɉude lɔi hu pələ. 17Giliŋąhiɛ taaləi tii kɛi ŋą́ mo, ŋą́ gɛ mɔ̨ɔ̨ dɛ́ɠíi? Awalawala kɛ tii, gwə́i kiliɠaa kaa lɔ mɔ̨ɔ̨ a nu kan gwəi gili, yai, «ee!» kaa ɉu «kpaa!» yɛ ɓo ɉu? 18Yálá kaa a nwɔ́ kɛla, nwooi ku moi káá, hvo a «ee!» da «kpaa!» 19Mąąhɔlɔɓo, Yálá lon Jesus Kristə, yai ku mąą mɛ̨nį laa həli káá: Ɲą́ą́, Silvɛn, ɛlɛɛ, Timote, hvo kɛli kɛ a: «ee!» da «kpaa!» Kɛlaa yaamun, gaa a «ee!», a yələ kəlee. 20Ɛlɛɛ, mɛ̨nįɠaa kpɔ Yálá ə naakwɛlanmo, yai tii ɓə di kɛ a «ee!» gbɔwɔ kpinį hu. Yili mąą mɛ̨nį ɓa, yaa ti ɉaalai ɓə, gwa kɛ la Yálá ɓa: «mįiną!» Yaa ti mąąwiɛ mɛ̨nį ɓa. 21Nui a gu huwalawala, gwa kááni Kristə hu, yɛ nwulɔ mąąhəɠɛɛ lɔ guɔ, Yálá ɓə, 22ya ɓə gɔlɔn ɉii kɛ guɔ, diɛ pɛli gu kɔlɔn ɉii la a nwɔ nuą; yɛ gu lii laahvɛɛ a nwɔ Kilii, a mɛ̨inɛ̨ɛ̨ tɔlɔɔ.
23Yálá ɓaa a nwɛ́i gɛla, akɛ gáá lɛɛ kɛi, ə báá; mɛ̨nįi gɛ və́ búlú pənə la, və́ paa la Korɛntə daai, nwun mąą: Ka lɛɛ ka ɓɛlɛ mɛ̨i. 24Ə kɛ ŋɛ̨i yɛ kwa hee ká wɔɔ kalan mɛ̨į, ya hvəə, kɛlaa, ku yee pɛlɛ ɓə ku kaa moi ká wɔɔ kwəinɛ̨ɛ̨ ɓa, hvo gaai, galan mɛ̨nį nwɛi, ká yee kaa mą a nwalawalaa.
Currently Selected:
Korɛntə veelɛ 1: BKPDCG
Highlight
Copy
Compare
Share
Want to have your highlights saved across all your devices? Sign up or sign in
