Korɛntə dɔlɔɔ 16
16
Kpɔnmąą hɛn di gulɔ a Ɉerusalɛmə kalan gbɔn nwɔɔ
1Yii hvilɛn na galan nɛa kpɔnmąą ɓo mɛ̨nį ɓa, káá mąn, kpaaləi ŋį́ nɛ Galatə kalan gbɔnŋaa diɛ, 'ká hvilɛn bulu. 2Lɔwɔ tɛitɛi ŋą hvoló tɔlɔɔ, yii nu tɛitɛi a pɛli ɉɔlɔɓoi, yɛ gulɔ ɲəi hɛnŋaa hu, yɛ naa gwɛlɛ, yɛ bələi ŋą yee pɛli mąą laa kaa la; 'ká hvo bái lɔwai mąąkpɔn, ɉɛnŋaa tii ɲąąkpɔn mɛ̨nį ɓa. 3Ɓɛlɔwai ŋą́ paa la, nuąi ká di həɠə ɉu, ŋą́ dɛɛ di pɔ ŋą́ bɛlɛ hɛɓɛ́ ɓa, də li la Ɉerusalɛmə. 4Akɛ mąąnɛ̨ɛ̨ ɲą́ą́ gbinį ŋą́ li, kwa nuą tii kwa ɉiɛ kulɔ gee pɔ.
Polə ŋą hiɛ kulɔ mɛ̨nį
5Gáá pai Masedoanə hu ɓɔi, gɛ́ pa ka pɔɔli. 6Ŋą́ pa, gu kaa pai lɔwai tawolo kɛi gu kee ɓa, ŋą́ pa, ŋą́ lɛɛ laa ə lɛɛ la ɉu hąmą lɔɔ ə kpɛɛ. A kɛ tii, ɓɛɠaai ŋą́ kɛi pa lii laa, ká kpɔnmąą tɛɛ bɔ́ ŋą́ li laa. 7Yii ŋɛ̨i nwɛi, və́ pai tɛɛi ɉa, a kɛ Ną́mu a hvaa mą, gáá pai yíi kuu tawolo kɛi ka pɔ.
8Kɛlaa, gáá pai lɛɛi ɓɛ Efɛsə daai, ə lɛɛ la ɉu Pantəkotə lɔwai. 9Mąąhɔlɔɓo, pələ kɛnɛ̨ laa aa ɓo gɛ́ kólo tɔwɔ, ɛlɛɛ ɲówoɠaa tamąąi.
10Timote a pa laa, ka ká yee hee mu a nɛlɛɛ, mąąhɔlɔɓo, kwa yaa ɓə ku kaa Ną́mu nwɔ kólói ɓa kuɔ gɛ. 11Nui lɔpee ta hvo mɛlɛkpɛɛ ma, yaamun, ka kpɔnmąą tɛɛ bɔ, ə gɛ, ə nwɔ hiɛ kulɔ liilaa hu, ə gɛ, ə pənə ə pa, ə həli mą́ą́. Mąąhɔlɔɓo, kwa gu nąn nonnii ku kaa mąąkpɔn ɉii.
12Yii ɓaa ną́n non Apɔlɔsə nwɛi, ŋą́ kɛ vaŋąlɔi a yələ kəlee, ə gɛ, ə pa ka pɔɔli, da gu nąn nonnii takpɛliɠaa, kɛlaa, hvo bɔ ni hvo pa laa yiihu. A lɔwai hɔlɔɓo, gaa pai həlii laa ka pɔɔli.
Liɛwoo kpəli da yələ wala too woo
13'Ká lɛɛ a 'ká ɲɛ̨i, 'ká tɔɔ a ká nwąnąi laa na laa pələ mɛ̨i, 'ká ká liikpələ, 'ká ká huwalawala. 14Ka mɛ̨nį kəlee kɛ a wɛlikɛmąąlaa.
15Ną́n nonnii! Mɛ̨nį tɔ̨nɔ̨ ɓə gáá ɉu hvɛlii káá, 'ká kili kaa ɉu, Stefanasə da ɲəi bɛlɛ́n nuą ɓə kɛ a Akaiə nuą dɔlɔɔ, diɛ di kpɔwɔ kɛ a nu mąąhəɠɛɛɠaa di wɔɔ tínuą. 16'Ká lɛɛ nu ɓɛlɛmąąɠaa tii woo mu, da nuąi kóló kɛi kee ɓa, di yee ə ɓo mɔ̨nɔ̨ tɔ̨nɔ̨ hu.
17Stefanasə da Fortunatusə, ɛlɛɛ, Akaikusə di pa mɛ̨nį ɓɛ aa gwə́nɛ̨ɛ̨, yɛ pələi ka hvo la ɓɛ gwɛ́lɛ, yii mą́ą́kpaan ə kɛ mą, daa dɛɛ bɔ́, 18daa níilaa, daa káá kpɛlimąn ká liilaa. 'Ká nu huwu taaləi tii hvaŋąlɔ.
19Yálá nwɔ nu Yálá ŋą kpɔnŋaai Asi lɔi hu, diɛ ka túwɔ́ ɓo. Akilasə da Priska, diɛ kpɛli di kaa ká túwɔ́ɓo, ə mą kɛ gbɔn a kɛ ɲąąkpɔn ɉi di yəi bɛlɛ́n, diɛ kpɛli, diɛ ka túwɔ́ɓo gu Ną́mu hu. 20Nąn nonnii kəlee diɛ ka túwɔ́ɓo.
'Ka ká kee yee tuwɔ ɓo a wɛlikɛmąą túwɔ́.
21Dúwɔ́wooɠaa ŋɛ̨i kaa a ɲą́ą́ gbinįlee ɲə́ə́ pɔɔ.
22Nui gu Ną́mu wɛli hvo mą, mąą nu nɛ̨ŋɛ̨n naa ɓə.
Maranata! (Mukulaa ɓaa: Ną́mu, pa!)
23Gu Ną́mu Jesus ŋą nɛ̨ɛ̨laa ə kɛ ka pɔ.
24Ká kəlee ká wɛlikɛ kaa mą́ą́, gu Ną́mu Jesus Kristə hu.
Currently Selected:
Korɛntə dɔlɔɔ 16: BKPDCG
Highlight
Copy
Compare
Share
Want to have your highlights saved across all your devices? Sign up or sign in
