Korɛntə dɔlɔɔ 15
15
Kristə nwun mɛ̨nį ə kulɔ haa yəi
1Ną́n nonnii, gáá gili tooi ká ɲą gɛ́ kaa: Nwɛlɛɛ lɛlɛɛi ŋą́ naa həli káá, yai ka ká yee hee mu, ka kąnąnŋąą mai, 2ɛlɛɛ, yai ɉaalai ɓə ka káá pai ɓaloi la, akɛ ka ká yee kanąn mą, yɛ bələi ŋį́ naa həli la kaa; ka wala yili kɛ tii, ká wɔɔ laa na laa a lɛɛ a kpɛli.
3Tɔlɔɔ, yii ŋį́ ɉɔlɔɓo ɲą́ą́ gbinįi, ya ɓə ŋį́ naa həli káá; gɛ́ kaa: Gu wɔɔ nɛ̨ŋɛ̨nŋaa mąą mɛ̨nį ɓə Kristə ə haa la, yɛ bələi bɛ̨ɛ̨i la; 4Di noo, voló haaɓa yələ, ə nwun yɛ bələi bɛ̨ɛ̨ la. 5Yili pulu, ə gbɔwɔ lɛ Sefasə ɓa, yili pulu, gɛla pow kɔ́w hveelɛi.
6Yili pulu, ə gbɔwɔ lɛ nąn nonnii nwun nɔɔli ɓa a gii, mɔlɔɓɛlaa kaa ni yɛnɛ̨ɛ̨, ɛlɛɛ, daɠaa daa haa. 7Yili pulu, ə ə gbɔwɔ lɛ Ɉakə ɓa, da gɛlaɠaa kəlee. 8Kpɔ kɛa a gbɛla mąą, ə gbɔwɔ lɛ mą́ą́, ɲą́ą́i yɛ nɛ̨ɛ̨nu yəi kala lon. 9Mąąhɔlɔɓo, ɲą́ą́ ɓə gɛlaɠaa lɔwai a nogolaamun, a ɲą́ą́i mą́ą́ hvo nɛ̨ɛ̨li di hvo kɛ mą́ą́: kɛla; mąąhɔlɔɓo, ŋį́ gbɔn mɔ̨nɔ̨ɓo. 10Kɛlaa, laai kələi gáá ɉu ŋɛ̨i, Yálá ŋą mɛ̨inɛ̨ɛ̨ halai li; ɛlɛɛ, ŋą mɛ̨inɛ̨ɛ̨ tii ə gɛ mą́ą́, hvo lɛɛ li a kpɛli. Kɛlaa yaamun, ŋą́ą́ kólo kɛ aa tɛɛ gɛlaɠaa kəlee diɛ, ɲą́ą́ hvə li, Yálá ŋą mɛ̨inɛ̨ɛ̨i gaa ɲə́i, ya ɓə. 11Ə kɛ a ɲą́ą́, ə kɛ a diɛ, yili ɓə ku kaa naa həlii, ɛlɛɛ, yili ɓə ká laa na.
Haaɓɛlaa nwun mɛ̨nį
12Kwa kɛli naa həlii kuɔ kɛ: Kristə ə nwun, ə kulɔ haa yəi, lə mɛ̨nį ɓa, ká taɠaa da kɛ diɛ, haaɓɛlaa nwun mɛ̨nį hvo laa? 13Akɛ haaɓɛlaa nwun mɛ̨nį hvo ɉu, Kristə yaa kpɛli hvo nwun ni, 14ɛlɛɛ, akɛ Kristə hvo nwun ni, a kɛ tii, ku wɔɔ kalan nwoo kaa a lɛɛ, ká wɔɔ laa na laa ə ɓo a kpɛli. 15Yili a kɛ tii, gɛla wooi ku kaa moi yɛ hvilɛn na Yálá ɓa, gaa a lɛɛ, mąąhɔlɔɓo, akɛ haɓɛlaa nwun mɛ̨nį hvo a tɛ̨ą, kɛ tii, gwaa lɛɛ pɛlɛ Yálá ɓa, kuɔ kɛ, Yálá ə Kristə nwun, a mɛ̨nį gɛ yaan hvo nwun ni. 16Akɛ haaɓɛlaa nwun mɛ̨nį hvo a tɛ̨ą, kɛ tii, Kristə hvo nwun ni. 17Ɛlɛɛ, akɛ Kristə hvo nwun ni, ká wɔ laa na laa kaa a kpɛli-kpɛli, ka káá ni ká wɔ nɛ̨ŋɛ̨nŋaa hu. 18Akɛ kani tii, nuąi haa Kristə hu laa hu, di nwun na aa pili. 19Akɛ gwaa gu kilitɔɔ Kristə ɓa, yɛnɛ̨ɛ̨ mąą mɛ̨nį ɓa lɔ, gu mąą wɛliɛi ə tɛɛ nuą kəlee ɓa.
20Kɛlaa, kpaa-o! Hvo tii, Kristə ə nwun gbɔ haa yəi a tɛ̨ą leelee, yaa ɓə a nu dɔlɔɔ, yɛ kulɔ haa yəi. 21Yii yan, nu tɔ̨nɔ̨ háálai ɓə haa ə paa la, nu tɔ̨nɔ̨ háálai lɔ ɓə nwɔ̨nɔ̨, haaɓɛlaa nwun mɛ̨nį ə paa la. 22Yii yan Adamə hu ɓə nu kəlee di haa la, nu kəlee da yɛnɛ̨ɛ̨ hɔlɔɓo Kristə hu, a ba yələ; 23kɛlaa, nu kəlee da dɔɔi: Kristə ɓə tɔwɔ, a həɠə laa, nuąi di kaa Kristə yeekɔnma. 24Yili pulu ɓə, yɛnɛ̨ɛ̨ ŋąą a kpɛɛ la, ɓɛlɔwai gaa pai dɔɔlaa tɛɛi la Nąn Yálá pɔ, a kpɛɛ kɛa a heemɛ̨ilaa kəlee, heeɓolaa kəlee, da huwalawala kəlee hukalaa. 25Mąąhɔlɔɓo, hvo kɛli ə hééɓolaa kɛ, ə lɛɛ ɉu, ə ɲowoɠaa kəlee too gɔ́wɔ mu. 26Ɲowo gbəlii gaa pai ɉukalai, ya ɓaa: Haa. 27Mąąhɔlɔɓo aa gəlee too gɔwɔ mu.
Kɛlaa, ɓɛlɔwai gaa pai kɛi la mą: «Hɛn gəlee aa pɛlɛ gɔwɔ mu», ə kulɔ nui hɛn gəlee pɛlɛ gɔwɔ mu, bulu. 28Ɛlɛɛ, ɓɛlɔwai Yálá kaa pai hɛn gəlee pɛlɛi la gɔwɔ mu, non yaa kpɛlimąn, a pɛlɛ, nui hɛn gəlee pɛlɛ, ə gɛ, Yálá ə kɛ a hɛn gəlee, gəlee hu.
29Akɛ yili hvo mą, nuąi da kɛ di mąąwaai haa nuą mąą mɛ̨nį ɓa, lə ɓə di kaa gwɛlii? Akɛ kpɔ haaɓɛlaa nwun mɛ̨nį hvo a tɛ̨ą? Lə mɛ̨nį ɓa, da di mąąwaa di mąą mɛ̨nį ɓa? 30Ɛlɛɛ, kuɔ kpɛli lə mɛ̨nį ɓa lɔwai kəlee kwa hvaa mą kuɔ mɔ̨nɔ̨ mįi? 31Yələ kəlee, gáá tɔɔni haa wolo la, ną́n nonnii, gáá moi káá a tɛ̨ą, káá ɓə a nwɔ́ɔ́ kpɔwɔɲąą kɛnɛ̨ gu Nąmu Kristə hu. 32Kɔ́ pɛlɛ mɛ̨nį huwɔ hvulúɠaa diɛ Efɛsə, lə kpɔ ɓə yili a ɉəli mą́ą́, akɛ ŋą́ mąn nɔ kɛ nu kanŋaa di wɔɔ kiliŋąhiɛ ɓa? Akɛ haaɓɛlaa di hva nwun, gu gu laa mįi, gu gu kpələ, hvo gaai, gwa tínąą haa.
33'Ká hvo ka kpɔwɔ ɓowo: Hiɛ gee pulu ɲɔ̨nwɔ̨ɔ̨, a nu yíi pələ lɛlɛɛ hukala. 34'Ká pənə ká hvilɛn tɛ̨ą pələ mɛ̨i, 'ká hvo nɛ̨ŋɛ̨n ɉəɠɛɛ. Gbala ə tɔɔ, ká taɠaa di hvo Yálá kɔlɔn, gáá yili ɓoi a ká nwumɛ̨ mɛ̨nį.
Kɔlɔi pai kɛi nuąi da nwun, diɛ
35Kɛlaa, nu taɠaa kaa pai kɛi diɛ: «Haa nuą kaa pai nwun ɉii ləi? Kɔlɔ ləi ɓə pai kɛi diɛ?» 36Ə́ hupu pələ ləi ŋɛ̨i yɛ́i! Hvó gɔlɔn yɛ kɛ, hɛn yá ɉin, a wala haa hva, ɓɔn? 37Hɛn yá nɔ nɔi mu, hva kɛ a nwulu, a kɛ a gɔw; yɛ pələi mɔ̨nun gaa la, a wala kɛ ti, hihɛn gɔw takpɛli. 38Yili pulu, Yálá ɓə a kɔ́lɔ tɛ ma, yɛ pələi gaa la bɔ, a dɛɛ hihɛnŋąa kəlee pɔ a gulaa gee mu.
39Yálá nwɔ pɛli hɛn gəlee kɔ́lɔ hvə tɔ̨nɔ̨, gulaa gee mu: Nu nwɛi kaa a dee, huwɔ nwɛi yɛ ɓo a dee, nwɛ̨nį nwɛi yɛ ɓo a dee, ɛlɛɛ, hɔ̨nwɔ̨lee nwɛi yɛ ɓo a dee.
40Yələkɔlɔn ɉu kɔ́lɔ kaa mą, lɔi mɛ̨i kɔ́lɔ ə ɓo mą. Gəlee lɛlɛ pələ hvo tanɔ̨n. 41Hvóló lən gɛ pələ kaa a dee, ɲąnįn nwɛi yɛ ɓo a dee, pɛmɛ̨lɛ̨n-gɔwɠaa di wɛi ə ɓo a dee. Pɛmɛlɛngɔwɠaa lɔwai, di lən gɛ pələ kulaa gee mu.
42Bələ lɔ ɓə gaa la, haaɓɛlaa nwun mɛ̨nį hu. Kɔlɔ kɔ́hɔɓoɔ ɓə da nɔ lɔi mu, a nwun, hva kɛa kɛ a gɔhɔɓoɔ. 43Mɛlɛ hva kɛ mą diɛ ɉin, a nwun, yɛ lən a ɲɛ̨i pono. Vįi a kɛ a gbɛɛ di ɉin, ə nwun, naa hvɛɛ a huwalawalalaa; 44Nu kɔlɔ ɓə a kɛ mą diɛ ɉin, a nwun a Yálá-taa kɔlɔ. Akɛ nu kɔlɔ kaa laa, Yálá taa kɔlɔ yaa kpɛli gaa laa. 45Yɛ bələi bɛ̨ɛ̨ la, yɛ mą: «Nu tɔlɔɔ, Adamə, nu kɔ́lɔ ə kɛ mą, nɔ̨ɔ̨ yɛ ɓo ɉu», kɛlaa, Adamə gbɛlamąą, gaa a Yálá-taa mun, ɛlɛɛ, yɛ yɛnɛ̨ɛ̨ tɛɛ nu kanŋaa pɔ. 46Kɛlaa, dɔlɔɔ ɓaa nu kan, Yálá-taa nwɛi hvəə, ə pa kɛa nąą pɔɔ ɓa. 47Nu kan dɔlɔɔi kulɔ pɔlɔ hu, gaa a pɔlɔ; veelɛnąąn ə həɠə yələi. 48Bələi lɔ Adama ə kɛ la, bələ lɔ ɓə Adama lonnii di kɛ la, bələi Yálá-taa mun gaa la, bələ lɔ ɓə, Yálá-taa nuą di kaa la. 49Bələi lɔ gu kɛ la a lɔi mɛ̨i mun mąąnįnįn, pələ lɔ ɓə gu kaa pai kɛi la a yələkɔlɔn ɉu mun mąąnįnįn.
50Yii gɛ́ ŋą́ mo káá, ną́n nonnii, ya ka: Kɔlɔ da ɲąmą di hva pɛli Yálá-taa tɔɔlaa hɔlɔɓoi. Hɛn gɔhɔɓoɔ, hva pɛli hɛn mąąhəɠɛɛ ɉɔlɔɓoi.
51Gáá mɛ̨nį loɔ ta lɛi kaa; gu kəlee gu hvo pai haai, kɛlaa, gu mąą kaa pai hvalin ɉii, 52lɔ tii tanɔ̨n, a nu ɲɛ̨i yalima tanɔ̨n, a dúlú kpɛli hvɛɛi lɔwai. Gbala ə tɔɔ, dúlú woo a pa tɔɔi haa nuą da nwun a di mąąhəɠɛɛ, ɛlɛɛ, guɔn, gu mąą ə hvalin. 53Hvo kɛli gɔlɔ kɔ́hɔɓoɔ ŋɛ̨i mąą ə hvalin, a mąąhəɠɛɛ. Ɉaa kɔlɔi ŋɛ̨i, mąą ə hvalin a yii haa hvo mą. 54Ɓɛlɔwai gɔlɔ kɔ́hɔɓoɔ ŋɛ̨i mąą kaa pai hvalin ɉi la, a mąąhəɠɛɛ, ɉaa kɔ́lɔi ŋɛ̨i mąą ə hvalin a yii haa hvo mą, a kɛ tii, ɉɛɓɛ́ hu woo pɔ mɛ̨nį a kɛ, yai ə kɛ mą: Yee tɛɛmąą aa haa kpələ.
55«Haa! Ə́ wɔ yeetɛɛmąąlaa kaa kɛa mį?
Haa! Ə́ təli kaa mi?»
56Haa təli ɓaa: Nɛŋɛ̨n; nɛ̨ŋɛ̨n yaan, ŋą huwalawala ɓaa: Tɔ́n. 57Káni kookwəi! 'Ká gu Yálá hɛɠɛɛɓo, yai aa yeetɛɛmąąlaa tɛɛ gu pɔ gu gu Ną́mu Jesus Kristə háálai.
58Yili ɓa tii, nwɛ́li kɛ mąą nuą, ka tɔɔ kpąą, ká mąą hvo kpɛlin, gu Ną́mu nwɔ kóloi hu, káá tɛ tɔwɔ a yələ kəlee. Ká gɔlɔn káá: Mɔ̨nɔ̨i ka káá mįi, hvo pai lɛɛi a kpɛli Ną́mu hu.
Currently Selected:
Korɛntə dɔlɔɔ 15: BKPDCG
Highlight
Copy
Compare
Share
Want to have your highlights saved across all your devices? Sign up or sign in
