Matayo 24
24
Kyïnë ndundu 'ba kɔɔ
1Yësu ila yëkëlu ëdï tï'bë 'de, vo lö'bö 'bɔmo ayinnï zi mo zi ko'jo kö'du kuvö 'ba yëkëlu. 2Mo ako'jo henye, “Ongɔ 'e wa nenyee ku ti'de? Ma yada zi 'e tïnyö, yïtö ma kölö kinye atɔsɔ dë da agamo, biya aku'du kaŋo.”
Riti wayaza aba
3Mati Yësu ëdï lima da Döku 'ba Olivo, vo lö'bö'e ayinnï zi mo na liwo. Zë iyannï henye, “Ayada zi ze, ndala aba nenye ako'dɔ rë nï, a'di ra atëdï na kyïnë tayi 'bëyï 'ba ndundu 'ba kɔɔ?”
4Yësu aya'ba henye, “Ëdï 'e bi kida aba, vïdï maako 'bo'ba 'e dë. 5Kö'du vïdï kayo atayinnï mï ru ma, akiyannï henye, ‘Ma, Kurïsïtö,’ ako'bannï vïdï kayo. 6Akowo 'e kpɔrɔ wehe ndɔndɔ 'ba wehe aba, mora ongɔ zi mo anza 'e dë na rakaga. Wa ma here ne ako'dɔ rë nï, mora ndundu mo ëdï gba zi tayi. 7Vïdï atënyï da vïdï, damöku atënyï ra damöku. Madöyï atëdï kinzikinzi aba mï bi kutu kutu. 8Biya nenyee ëdïnnï biyeto tɔɔ 'ba ko'jo.
9“Neene akï'dï 'e zi yaza, kï'dï zi koli, vïdï biya akiyi 'e ga kö'du ma. 10Mï kadra nani vïdï kayo akotɔ dë nnï tëmï koma, akogo akiyi vïdï ma kölö agamo, 11nëbï kayo 'ba vo ndɔndɔ kalaya ko'ba vïdï kayo. 12Ga kö'du tara 'ba kö'du kyënyë, tɔwɔ ma ndra atövu na kyëyï, 13mora mo mati ɔrɔ ŋbïrï mï ndundu mo akayɔmɔ. 14Kö'du yöyö laka 'ba damöku nenye akayëtï mï damöku biya na kö'du yada zi vïdï ti'de neene ndundu mo atayi.”
Wa kyënyë ma ndra
15“Here ëzë ongɔ 'e tɔrɔ mï bi koro wa kyënyë mati o'dɔ wayaŋa, ame'do kö'du mo kpuru nëbï Daniyele, 'bï'dï vo ko'jo mo, ma yɔlɔ ï'jö kö'du yɔlɔ, 16neene zë mati ëdïnnï mï Yuda 'bahonnï mï döku'e. 17'Bï'dï vïdï maako dë komo lembe loko 'bënï tï'bë kaŋo zi koba wa maako yaga ta loko. 18'Bï'dï vïdï maako mï yaka dë tï'bë hulëhu zi koba bɔngɔ 'bënï. 19Hala atëdï na kyënyë mï ko'do naniye zi mbara'e ma ɔmɔnnï, ma'e 'ba kongɔ ga gisiluru! 20Amötu 'e taho 'bee 'banza dë mï tona mandere mï ko'do 'ba Sabata. 21Kö'du ani watɔɔ kyedre atëdï, anza dë kpiliri tëmï biyeto 'ba damöku le yaanya aba, atanza dekpe kpiliri löhu. 22Ëzë ko'do naniye ikye dë kudu, vïdï maako ɔmɔ dë, mora ga kö'du 'ba jeli 'ba ko'do naniye akaya'ba kudu. 23Mï kadra nani ëzë vïdï maako iya zi 'e henye, ‘Ongɔ 'e te, kinye Kurïsïtö ëdï ne!’ mandere, ‘Nani mo ëdï!’ oma 'e dë. 24Kö'du Korisitɔ'e 'ba vo ndɔndɔ, nëbï'e 'ba vo ndɔndɔ akalaya, ako'dɔnnï kyïnë kyedre kö'du koro'e ëtï zi ko'ba gbï le ma ajeli ëzë atɔ'bɔ. 25Ongɔ 'e te, ma yada ku zi 'e dagba ta komo 'ba kadra.
26“Here ëzë vïdï maako ayada zi ye, ‘Nani mo ëdï, yaga mï dalïpï,’ ï'bë 'e dë yaga; mandere, ‘Kinye mo ëdï mï loko,’ oma 'e dë. 27Kö'du kaa bikanyi mati ayi ta humïrë ëdï na kongɔ gbï le mï damïrë, here atëdï tayi 'ba Wisi 'ba Vïdï. 28Bi mati yöku ëdï 'dɔmo, ani langa'e akatɔtɔ rë nnï.”
Tayi 'ba Wisi 'ba Vïdï
29“Kandi tapëtï watɔɔ 'ba ko'do naniye, kadra atëdï na mandölu, yehe ï'dï bikanyi 'bënï dekpe; kyëlu'e akalëpïnnï ta komo fɔli, ida ra 'ba komorïyë akakɔhɔ rë nnï. 30Mï kadra nani kyïnë 'ba Wisi 'ba Vïdï akalaya mï fɔli, biya vïdï 'ba dakaŋo akalu'bë. Zë akongɔnnï Wisi 'ba Vïdï tayi mï maro'ba 'ba fɔli, kyigɔ kyedre 'ba tëdïkyedre aba. 31Mo akutu malayika 'bënï 'e wako'jo tawo 'ba torombeta aba, zë akatɔtɔnnï vïdï jeli 'bɔmo tëmï buluku sowɔ, tëmï ndundu ma kölö 'ba komorïyë zi agamo.
Kaga kyëlu
32“Yaanya aba ayandi kö'du yɔlɔ nenye kazi kaga kyëlu: Kandi ëzë ngora mo ïnzï ku, mbili yëyu 'bɔmo asi yaga, ayɔlɔ 'e umu ëdï kara. 33Gbï here, ëzë ongɔ 'e biya wa nenyee, ayɔlɔ 'e ëdï kara, kara ha loko. 34Ma yada zi 'e tïnyö, kofo vïdï nenye alaga dë le biya wa nenyee o'dɔ rë nï ku. 35Komorïyë dakaŋo aba akalaga, mora me'do 'bama alaga dë.”
Ko'do kadra aba ayɔlɔ dë
36“Vïdï maako ayɔlɔ dë ko'do nani mandere kadra, gbï le malayika'e mï komorïyë, mandere Wisi, mora nje 'Bu. 37Kaa ëdï mï ko'do 'ba Nowa, here atëdï mï tayi 'ba Wisi 'ba Vïdï. 38Kö'du mï ko'do gba ta komo wini koso, vïdï ëdïnnï wakonyo, wakuwë, rakoze, rakï'dï mï rakoze, le zi ko'do mati Nowa ödu mï töŋbö, 39zë ayɔlɔnnï dë wa mati ako'dɔ rë nï le wini koso ayi oba zë biya 'de. Nani atëdï mï tayi 'ba Wisi 'ba Vïdï. 40Kora rïyö atëdïnnï mï yaka, ma kölö akoba agamo akila. 41Mbara rïyö atëdïnnï wakuhu kala aba da yïtö, ma kölö akoba agamo akila.”
42“Hereene ëdï 'e bi kida aba, ga kö'du ayɔlɔ 'e dë mï ko'do vala ra Yere 'bee atayi. 43Mora ayɔlɔ 'e nenye: Ëzë vo kyeti liŋɔ ayɔlɔ mï kadra vala 'ba yɔndɔ vo logo ëdï tayi, mo akalima bi kida aba ila loko 'bënï dë zi tödu mï mo. 44Here ëdï 'e kpa nzɔ, ga kö'du Wisi 'ba Vïdï atayi mï kadra mati anza 'e dë komo kï'dï aba gɔ mo.”
Vo kalima koma vo kazi koma aba
45“Ëyï ra ëdï vo koma kyedre vo ko'dɔ lɔɔ komokandi aba, mati kyedre ï'dï na vo da 'ba ko'dɔ lɔɔ mï liŋɔ 'bënï zi kï'dï zi zë wakonyo 'bëzë mï kadra ma laka? 46Atëdï na laka zi vo ko'dɔ lɔɔ nani mati kyedre 'bɔmo i'ja mo ko'dɔ here ëzë mo a'ba. 47Ma yada zi 'e tïnyö, mo akï'dï mo na vo da wa 'bënï biya. 48Mora ëzë vo ko'dɔ lɔɔ nani ëdï na vo kö'du kyënyë iya na bi dë nï henye, ‘Kyedre 'bama ëdï lima ani kadra konda aba,’ 49mo ayeto ku'bö aboka'e 'ba ko'dɔ lɔɔ nï aba, zi wakonyo wakuwë na kyënyë aba. 50Kyedre 'ba vo ko'dɔ lɔɔ nani atayi mï ko'do mati mo anza dë komo kï'dï aba gɔ mo, mï kadra mati mo ayɔlɔ dë. 51Mo akikye mo na nzoyi, akï'dï mo mï bi 'ba vo komokandi kyënyëë, bi mati kudu atëdï yingɔ ha konyo aba.
Currently Selected:
Matayo 24: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/