Matayo 23
23
Kö'du kyënyë 'ba Farasi'e
1Neene Yësu iya zi vïdï kayo vo lö'bö 'bënï ëtï henye: 2“Vo komoyandi 'ba kö'dukï'dï Farasi'e ëtï alimannï mï kyïtï 'ba Mosa. 3Here oro 'e zë o'dɔ 'e ti'de wa mati zë ayadannï zi ye. Mora o'dɔ 'e dë wa mati zë o'dɔnnï, kö'du zë ayɔnzɔnnï ga wa mati zë ayëtïnnï ne dë. 4Zë idannï wayeto ï'dïnnï zë da gu vïdï, mora zë na bi dë nnï ombannï dë zi kïnjë da wisi kala zi yehe zë.”
5“Wa biya zë o'dɔnnï, ëdïnnï ko'dɔ zi vïdï kongɔ. Zë idannï kɔ'di piri konda ga bɔngɔ 'bënnï zi yada zë na laka. Zë ï'dïnnï bɔngɔ kanyi kölökpö gë nnï zi yada zë na vo mötu. 6Zë ɔwɔnnï bi ma koro mï karama, bi lima mati na laka mï bi mötu 'ba Yuda'e. 7Zë ɔwɔnnï zi mëtënnï watɔwɔ aba mï bi 'ba wakogo'e, zi vïdï ko'jonnï zë vo komoyandi.”
8“Mora akako'jo 'e dë ‘Vo komoyandi,’ kö'du ëdï'e nje kyedre aba kölö, 'e biya na öndu. 9Ako'jo 'e vïdï maako dë dakaŋo ‘'bu,’ kö'du ëdï'e 'Bu aba kölö, mo ëdï komorïyë. 10Mandere ako'jo 'e dë ‘Vo komoyandi,’ kö'du ëdï 'e Vo komoyandi aba kölö, Kurïsïtö. 11Ma kyedre ndra mï kutë 'e atëdï na vo ko'dɔ lɔɔ 'bee. 12Kö'du mo mati ïnjë rë nï kyedre akaya'ba lebi, mo mati aya'ba rë nï lebi akïnjë kyedre.”
Vo komoyandi 'ba kö'dukï'dï Farasi ëtï
13“Bu'bu zi 'e vo komoyandi 'ba kö'dukï'dï Farasi ëtï, 'e vo komokandi kyënyë! Isi 'e damöku 'ba komorïyë mï komo vïdï. 'E na bi dee ödu 'e dë, mandere ila 'e zë mati ëdïnnï yɔnzɔ zi tödu.”
14-15“Bu'bu zi ye, vo komoyandi 'ba kö'dukï'dï Farasi ëtï, 'e vo komokandi kyënyë! Alasi 'e ta dakaŋo ranga aba zi ta'da ma kölö mati opi rë nï ku, ëzë mo ayi kölö, o'dɔ 'e mo da rïyö kaa wisi 'ba gehena kaa 'e.”
16“Bu'bu zi ye, vo komoköndu gaga'e! Iya 'e henye, 'Ëzë vïdï maako alömu yëkëlu aba, o'dɔ waako dë, mora ëzë vïdï mati alömu daabo 'ba yëkëlu aba, mo ida nï ku lömu 'bënï aba. 17'E vo komoköndu lumë ne! Ma vala ra ëdï kyedre: daabo, mandere yëkëlu mati o'dɔ daabo na koro? 18Iya 'e kpa henye, ‘Ëzë vïdï maako alömu karasa aba, o'dɔ waako dë, mora ëzë vïdï maako alömu wakï'dï 'ba dɔ mo aba, mo ëdï na kida lömu 'bënï aba.’ 19'E vïdï vo komoköndu! Ma vala ra ëdï kyedre: wakï'dï mandere karasa mati o'dɔ wakï'dï na koro? 20Hereene, mo mati alömu karasa aba, alömu biya wa mati ëdï dɔ mo aba. 21Mo mati alömu yëkëlu aba, alömu mo aba, mo mati ëdï lima mï mo aba. 22Mo mati alömu komorïyë aba alömu kyïtï 'ba Wïrï, mo mati alima dɔ mo aba.
23“Bu'bu zi 'e vo komoyandi 'ba kö'dukï'dï Farasi ëtï, 'e vo komokand kyënyë! Ï'dï 'e 'butë, 'ba wa këzïngutru kaa kököwu, miniti, dili kamini aba. Mora ila 'e wa mati ndra na laka 'ba kö'dukï'dï kaa na lakanje, mïkyëyï koma aba. O'dɔ 'e gɔmoyɔnzɔ yaa, kazi jeli ma kyere. 24'E vo komoköndu gaga'e! Oba 'e kɔŋɔ yaga mora ondrɔ 'e jemele.
25“Bu'bu zi ye, vo komoyandi 'ba kö'dukï'dï Farasi ëtï, 'e vo komokandi kyënyë! Akyitɔ 'e ra sikɔ ma ta yaga gbenje aba, mora mï mo zë ndɔ na mïkumbë wakiyi aba. 26Farasi'e vo komoköndu! Dagba mo akyitɔ 'e mï sikɔ gbenje aba, ma yaga akakyitɔ kpa ŋbala.”
27“Bu'bu zi 'e vo komoyandi 'ba kö'dukï'dï Farasi ëtï, 'e vo komokandi kyënyë! 'E kaa dawogo kanyi 'ba gïrï, mati alaya na teme ta yaga mora mï zë ëdïnnï ndɔ na yingɔ yöku vïdï wa biya na ti'da. 28Mï gërï kölö ne, kapa ma yaga alaya 'e zi vïdï tëdïja mora mï ëdï 'e ndɔ komokandi kyënyë, kö'du kyënyë aba.”
Yësu ame'do kö'du riti 'bëzë
29“Bu'bu zi ye, vo komoyandi 'ba kö'dukï'dï Farasi'e ëtï, 'e vo komokandi kyënyë! O'ba 'e dawogo kö'du nëbï'e yeme dawogo 'ba vo tëdïja'e. 30Iya 'e henye, ëzë da lima ze mï ko'do 'ba 'bu ze vu'e, da tanza dë zë aba mï yasi yama 'ba nëbï'e. 31Here, ayada 'e akpa na bi dee, 'e ra kozo'e 'ba zë mati ofonnï nëbï'e. 32Oso 'e wayeri 'ba kö'du kyënyë 'ba 'bu'e vu'e!
33“'E wiri! 'E gisi 'ba wiri kala'bete! Hala ataho 'e kazi riti 'ba gehena! 34Hereene mëdï kutu zi 'e nëbï'e kora 'ba komokandi vo komoyandi ëtï. Kya 'bëzë akofo 'e akatötö 'e, agamo'e akakpökyï 'e mï bi mötu 'bee 'ba Yuda'e, kore gë zë tëmï gawo zi gawo. 35Here, biya yama 'ba vo tëdïja mati alikɔ dakaŋo ne, atayi dee, tëmï yama 'ba vo tëdïja Abele zi yama 'ba Zakariya wisi 'ba Berekiya, mati ofo 'e mï kutë yëkëlu karasa aba. 36Ma yada zi 'e tïnyö, biya nenye atayi da kofo vïdï nenye.
Yësu ɔwɔ Yerusalema
37“Akɔ Yerusalema, Yerusalema, yï mati ofo nëbï'e u'du zë mati utu zi yï ṛï'dï aba, hala mëdï na konda zi tɔtɔ gisi 'bëyï bi kölö kaa ma yëru atɔtɔ gisi 'bënï hu förö nï, mora omba dë. 38Ongɔ te, loko 'bëyï ila ku zi yï na mï mbiya. 39Kö'du ma yada zi yï, ongɔ ma dekpe löhu le akiya henye, ‘Ya'da ëdï mo mati ayi mï ru 'ba Yere.’”
Currently Selected:
Matayo 23: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/