Matayo 25
25
Mala 'ba mïnzö ngulu 'butë
1“Mï kadra nani damöku 'ba komorïyë atëdï kaa mïnzö ngulu 'butë mati oba lamba 'bënnï ï'bënnï yaga zi kutrë da 'bïyësï. 2Muyï tëmï zë na vo lumë muyï na vo komokandi. 3Ma vo lumë oba lamba 'bënnï mora obannï yënï wa'do dë nnï aba. 4Ma vo kö'du yɔlɔ obannï yënï mï maṛanji lamba 'bënnï aba. 5'Bïyësï kadra konda aba mï tayi, zë biya ayetonnï nano alëpïnnï gbɔ ko'do.”
6“Mï kutë yɔndɔ kudu awi yaga iya henye: ‘Kinye ëdï bïyësï! Asi 'e yaga zi kutrë dɔ mo!’
7“Neene biya mïnzö ngulu 'butë ne alironnï rïyë akɔ'jɔnnï lamba 'bënnï. 8Ma vo lumë iyannï zi zë ma vo komokandi henye, ‘Ï'dï 'e zi ze kya 'ba yënï 'bee, lamba 'beze ëdï tï'bë tölu.’ 9Zë aya'bannï henye, ‘'E 'e, anza dë kyɔ 'dö kö'du ze 'e aba. Tagɔmo ï'bë 'e zi zë mati ëdnnï kogo yënï ogo 'e kyamo kö'du 'e.’
10“Mora mati zë ëdïnnï da gërï 'bënnï zi kogo yënï, 'bïyësï ɔkɔ. Mïnzö muyï mati ëdïnnï nzɔ ï'bënnï loko mo aba mï karama 'ba oze. Isi ha loko gbɔ.
11“Yaa agamo'e ayinnï kpa. Zë iyannï henye, ‘Kyedre! Kyedre! Ayëhu ha loko zi ze!’
12“Mora mo aya'ba henye, ‘Ma yada zi 'e tïnyö, ma yɔlɔ 'e dë.’
13“Hereene ëdï 'e bi kida aba, ga kö'du ayɔlɔ 'e ko'do mo mandere kadra mo dë.
Mala 'ba vo ko'dɔ lɔɔ
14“Löhu, atëdï kaa kora ëdï tï'bë bi lasi, mo ako'jo vo ko'dɔ lɔɔ 'bënï 'e ise ga wa 'bënï zi zë. 15Zi ma kölö mo ï'dï kpuluku muyï 'ba kɔhi, zi ma vere mo ï'dï kpuluku rïyö, zi ma vere kpuluku kölö, ma kölö te mï tɔ'bɔ 'bɔmo. Neene mo ï'bë mï bi lasi 'bënï. 16Kora mati ïrï kpuluku muyï ne ï'bë kandi ï'dï kɔhi 'bënï ne zi ko'dɔ lɔɔ i'ja kpuluku muyï dɔ mo. 17Kpa here, mo mati kpuluku rïyö ne i'ja kpuluku rïyö dɔ mo. 18Mora kora mati mo ïrï kpuluku kölö ne ï'bë ole ogo mï kaŋo oho kɔhi 'ba kyedre 'bënï ne.”
19“Tapëtï kadra konda kyedre 'ba vo ko'dɔ lɔɔ naniye a'ba alima kiti ga kɔhi ne zë aba. 20Kora mati ïrï kpuluku muyï ne, ika agamo muyï. Mo iya henye, ‘Kyedre, ï'dï zi ma kpuluku muyï. Ongɔ te mi'ja dɔ mo kpuluku muyï.’ 21Kyedre 'bɔmo aya'ba henye, ‘O'dɔ laka, yï vo ko'dɔ lɔɔ laka koma kyedre aba! Ëdï koma kyedre aba 'ba wa gbɔngo, ma kï'dï yï na vo da wakayo. Ayi ayanya mï rakyenyi 'ba kyedre 'bëyï!’
22“Kora mati kpuluku rïyö aba ne ayi kpa. Mo iya henye, ‘Kyedre, ï'dï zi ma kpuluku rïyö, ongɔ te, mi'ja dɔ mo kpuluku rïyö.’
23“Kyedre 'bɔmo aya'ba henye, ‘O'dɔ laka, yï vo ko'dɔ lɔɔ laka koma kyedre aba! Ëdï koma kyedre aba 'ba wa gbɔngo, ma kï'dï yï na vo wadakayo. Ayi ayanya mï rakyenyi 'ba kyedre 'bëyï!’
24“Neene vo ko'do lɔɔ mati ïrï kpuluku kölö ayi. Mo iya henye, ‘Kyedre, ma yɔlɔ yï kora vo kyigɔ, umu wa mati ïyï dë, atɔtɔ wa mati ïlï kofo mo dë. 25Here ma na tere mï'bë yaga moho kɔhi 'bëyï ne mï kaŋo. Ongɔ te, kinye wë yï ëdï ne.’ 26Kyedre 'bɔmo aya'ba henye, ‘Yï vo ko'dɔ lɔɔ kyënyë, 'ba vo wëdï! Ayɔlɔ mumu wa mati mïyï dë, tɔtɔ wa mati mïlï kofo mo dë? 27Laka, ï'dï kɔhi 'bama ne kyere mï loko 'ba vo kɔhi sesiye, ëzë ma'ba ma kïrï hulëhu dɔ mo aba.
28“‘Oba 'e kɔhi ne kazi mo ï'dï 'e zi ma ëdï kpuluku 'butë aba ne. 29Kö'du vïdï biya mati ëdï mo aba akï'dï zi mo ndra, mo atëdï mo aba kyɔ. Mo mati anza dë mo aba, gbï le wa mati mo ëdï mo aba akoba kazi mo. 30U'du 'e vo ko'dɔ lɔɔ lumë nani yaga, mï mandölu, bi mati kudu yingɔ ha konyo aba.’
Tïmëlë wanya ëtï
31“Ëzë Wisi 'ba Vïdï ayi mï tëdïkyedre 'bënï, biya malayika'e mo aba, mo akalima da kyïtï 'bënï 'ba tëdïkyedre mï komorïyë. 32Vïdï biya akatɔtɔ komo mo, mo akinye vïdï ma kölö ta ra agamo kaa vo tïmëlë yako inye tïmëlë ta ra wanya. 33Mo akï'dï tïmëlëë da kala nï ma tïrï, wanya'e da kala nï ma gali.
34“Neene vo damöku akiya zi zë mati da kala nï ma tïrï henye, ‘Ayi 'e, 'e mati 'Bu ma ï'dï ya'da ku zi 'e ne, oba 'e wapëtïkala 'bee, damöku ne akɔ'jɔ kö'du 'e kyere kï'dï 'ba damöku aba. 35Kö'du ma na o'bo ï'dï 'e zi ma wa zi konyo, ma na kɔdrɔ ï'dï 'e zi ma wa zi kuwë, ma na vo leze isee ma loko, 36momba bɔngɔ usu 'e ra ma, ma na rakɔɔ ongɔ 'e ga ma, ma mï kamba, ayi 'e kiri ma.’
37“Neene vo tëdïja akaya'bannï zi mo henye, ‘Yere ndala aba dongɔ yï na o'bo dï'dï wakonyo zi yï, mandere na kɔdrɔ kï'dï zi yï wa zi kuwë? 38Ndala aba dongɔ yï na vo leze dise yï loko, mandere omba bɔngɔ dusu rë yï? 39Ndala aba dongɔ yï na rakɔɔ mandere mï kamba dï'bë kiri yï?’
40“Vo damöku akaya'ba henye, ‘Ma yada zi 'e tïnyö, wa mati o'dɔ 'e kö'du ma kölö ma tisi 'ba öndu 'bama nenyee, o'dɔ 'e ne kö'du ma.’
41“Neene mo akiya zi zë mati da gali nï henye, ‘Ï'bë 'e ta ra ma, 'e mati asënë ku, mï wa'do ma ŋburu mati akɔ'jɔ kö'du Satani malayika 'bënï ëtï. 42Kö'du ma na o'bo ï'dï 'e wa dë zi ma konyo, ma na kɔdrɔ ï'dï 'e wa dë zi ma kuwë, 43ma na vo leze isee ma dë loko, momba bɔngɔ usu 'e dë ra ma, ma na rakɔɔ mï kamba ongɔ 'e ga ma dë.’
44“Zë akaya'bannï kpa henye, ‘Yere ndala aba dongɔ yï na o'bo mandere na kɔdrɔ mandere na vo leze mandere omba bɔngɔ mandere na rakɔɔ mandere mï kamba da kɔnyi yï dë?’
45“Mo akaya'ba henye, ‘Ma yada zi 'e tïnyö, wa mati o'dɔ 'e dë kö'du ma kölö 'ba ma tisi nenyee, o'dɔ 'e dë kö'du ma.’ 46Neene zë atï'bënnï mï rayaza ma ŋburu, mora vo tëdïja zi dïdï ma ŋburu.”
Currently Selected:
Matayo 25: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/