Daniel 7

Nan Naipailaan Nan Matagotago Ay Enggana Ken Daniel

7:1, 9-14

1Isnan omona ay tew-en ay nintotolayan din si Belsazar id Babilonia dat ipaiitaw Apo Dios si Daniel isnan esay labi ay mangipagtek ken siya isnan naayda. Insolatna nan iniitawna et siya dana.

9“Isnan menboyboyaak daet maiyolnos nan katokdotokdowan di ali dat tomokdo nan natatago ay enggana ay nan manakabalin ay Dios isnan tokdowana ta men-okom. Nan badona et mapolapolaw ay kaneg nan kapolawan ay kapes ya mapolapolaw gedan nan bookna. Kaneg menbidbidang nan napipilidan ay tokdowana dapay menbegbegang nan pilidna. 10Men-ay-ayos ay kaneg ginawang nan apoy ay magapgapo isnan kad-ana. Kalibolibo nan wada isdi ay mensilsilbi ken siya ya kamilyomilyon nan tomatakdeg isnan sagangna ay maokom. Dat menlogi nan men-okomanda dadapay bilagen nan deeyday liblo.#7:10 Basaenyo nan tap-in nan maipanggep nan liblo isnan Naipagtek 20:11-15.

11Isnan menboyboyaak daket dengen ay men-et-etek ya menlaslastog nan ban-eg ay sakgod nan maikap-at ay animal daket ilaen ay pateyenda dadat itep-a nan awakna isnan apoy et madadael. 12Dat makaan nan panakabalin nan iib-an san animal ngem napalobosanda ay matago is siawyan pay.

13Dat issan labi et wada pay nan inilak ay kaneg ipogaw ay somagsag-en ay naitatapi isnan liboo et omey issan kad-an san natatago ay enggana ta maipalang. 14Dat maagtan is panakabalin, dayaw ya kalebbengan tapno am-in nan ipogaw isnan kailiili isnan nateketeken ay ipogaw ya kali et silbiyanda siya. Maid kombos nan panakabalina ya nan mentolayana et maiwed patenggana.”

Currently Selected:

Daniel 7: xnn

Highlight

Copy

Compare