Daniel 12

Nan Katongpalan Nan Nakwani

12:1-13

1Kanan nan anghel en, “Isnan deey ay timpo et awnit wada nan esay napateg ay anghel ay kangadan is Michael ay mangbanbantay ken dakayo ay Israelita. Et awnit wada nan ligat ay kapilmiyan enggana isdin naboliwan nan il-ili. No omdan nan deey ay timpo et am-in kayo ay naisolat nan ngadana isnan liblon Apo Dios et maisalakan. 2Nan epdas natey et kasinda matago. Nan tap-ina ken daida et awnit matagotagoda ay eng-enggana dapay nan tap-ina et maibabainda ya maid patenggan nan dosada. 3Nan masilib et awnitda somilang ay kaneg nan pat-an di daya ya nan nangipalinteg isnan ngawi ay ipogaw et awnitda gedan somilang ay eng-enggana ay kaneg nan talaw isnan daya.” 4Danat kanan ken sak-en en, “Daniel, ilikepmo et nan liblo dakat pigketan ta enggana is kombos di batawa. Isnan wani et awnit ado nan ipogaw ay mangkayat ay mangtek isnan kayat ay kanan nan om-ommat ngem apedda menbanbannog et kedeng.”

5Dat sak-en ay si Daniel et inilak nan dowa ay lalalaki ay tomatakdeg isnan mensinombangil ay benget nan ginawang. 6Dat sooten nan esang ken daida isnan anghel ay tinmatakdeg isnan oson nan ginawang en, “Ay kaat di kabayagna esapay ommat nan naayda ay kaskasdaaw ay banag?” 7Dat ingaton nan anghel nan makanawan ya makanigid ay ledengna id daya daket dengngen ay mensapata siya isnan ngadan nan matatatatago ay Dios danat kanan en, “Awnit tolo ya kagedwa ay tew-en. No makwas nan maaamisan nan ipogaw Apo Dios et awnit ommat et am-in nan naayda ay banag.”

8Dinngek nan kinwanina ngem egayko naawatan isonga daket sooten ay mangwani en, “Ngem Apo, intoy ikakan datona ay makwas?” 9Danat kanan, “Bay-am Daniel tay nan naayda ay kali et masapol adi maipagpagtek ta engganay omdan nan kombosna. 10Adoado nan awnit madalosan. Nan makedse et awnit adida maawatan nodi mentotoloyda ay makedse ngem nan masilib et awnitda maawatan. 11Menlogi isnan menpatengaan nan winakgat ay men-idatdatonan ay siya abes nan menlogiyan nan kad-an di kadodogis isnan pangiilaan Apo Dios isnan Templo et awnit esay libo ya dowanggasot et siyampoo ay agew nan makwas. 12Nagasat nan matalek ay mamati enggana ay makwas nan sinlibo ya tolonggasot et tolompoo ya lima ay agew. 13Et sik-a Daniel, itoltoloymo ay mamati enggana isnan kombosna. Awnitka matey ngem awnitka kasin matago ay mangdawat isnan gon-gonam isnan maodi ay agew.”

Currently Selected:

Daniel 12: xnn

Highlight

Copy

Compare